ၵွၼ်ႇၼႃႈတေထိုင် ဝၼ်းၸတ်းပၢင်လိူၵ်ႈတင်ႈၼႆႉ သိုၵ်းမၢၼ်ႈယိုတ်းမိူင်း တီႉၺွပ်းဢဝ်ၵူၼ်းမိူင်း ၸိူဝ်းၸႂ်ႉတိုဝ်း သိုဝ်ႇတူင်ႇဝူင်းၵူၼ်းသေ ႁဵတ်းသၢင်ႈၼႄၾၢင်ႁၢင်ႈ ႁႂ်ႈပဵၼ်ၵၢၼ်ယႃႉၵဝ်းပၢင်လိူၵ်ႈတင်ႈ လႄႈ ၵၢၼ်ၵမ်ႉထႅမ်ပၼ်ၸုမ်းၾၢႆႇၶတ်းၶၢၼ်ႉၶဝ်ၼၼ်ႉ ႁၢဝ်ႈႁၢဝ်ႈႁႅင်းႁႅင်း။

တႄႇၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊ ထိုင် ၵၢင်လိူၼ်တီႊသႅမ်ႊပိူဝ်ႊၼႆႉ ၵူၼ်းၸိူဝ်းၺႃးတီႉၺွပ်းၵႂႃႇ ယွၼ်ႉၵႂႃႇ ပၼ်ႁႅင်း (Like) ၊ ပိုၼ်ၽႄ (share) ၊ ပၼ်တၢင်းႁၼ်ထိုင် (Comment) ၼၼ်ႉ မီးမွၵ်ႈ 20 ၵေႃႉ။ ၼႂ်းၼၼ်ႉ ပႃးၵူၼ်းမိူင်းတႆးပွတ်းၸၢၼ်း၊ ပွတ်းႁွင်ႇ၊ ပွတ်းဢွၵ်ႇ ၸဵမ်ၸိူဝ်းၼႆႉ။

မိူဝ်ႈဝၼ်းတီႈ 10 လိူၼ်တီႊသႅမ်ႊပိူဝ်ႊၼႆႉ ၼၢင်းယိင်း ဢႃႇယု 60 ပီပၢႆ ၵေႃႉယူႇၼႂ်းၸႄႈဝဵင်းမူႇၸေႊၵေႃႈ ယွၼ်ႉၵႂႃႇတဵၵ်းပၼ်ၺႃး (Like) လွင်ႈတူင်ႉၼိုင် ၵၢၼ်သၢၼ်ၶတ်းပၢင်လိူၵ်ႈတင်ႈ ဢၼ်ၸုမ်းၾၢႆႇၶတ်းၶၢၼ်ႉ သိုၵ်းမၢၼ်ႈၶဝ်ၸတ်းႁဵတ်းၵႂႃႇၼၼ်ႉ ၼႆယဝ်ႉ။

ၸၢႆးပၢၼ်း ဢႃႇယု 40 ပၢႆ ၵူၼ်းမိူင်းပိုၼ်ႉတီႈ ၸႄႈဝဵင်းမူႇၸေႊ ၵေႃႉႁူႉႁၼ်ၸွမ်း လွင်ႈၼႆႉ လၢတ်ႈၼႄတီႈ ၽူႈတွႆႇႁွၵ်ႈဝႃႈ “ပႃႈၼၼ်ႉ မီးယူႇဝႆႉတီႈႁိူၼ်းမၼ်းၵူၺ်း။ ဝၼ်းၼၼ်ႉ ပဵၼ်ဝၼ်းဢၼ် ၸုမ်းလုၵ်ႉၽိုၼ်ႉ/ ၸုမ်းၾၢႆႇၶတ်းၶၢၼ်ႉသိုၵ်းမၢၼ်ႈၶဝ် တိုၵ်းသူၼ်းဝႆႉ ႁႂ်ႈဢွၼ်ၵၼ်ယူႇႁိူၼ်း၊ ဢမ်ႇဢွၵ်ႇတၢင်းၼွၵ်ႈ (အသံတိတ်သပိတ်) ၼႆ။ သိုၵ်းမၢၼ်ႈ တင်း ပ လိၵ်ႈၶဝ်ၼႆႉ တင်ႈၸုမ်းဢၼ်ပၵ်းတႃပႂ်ႉတူၺ်း ဢၵွင်ႉၵူၼ်းၸႂ်ႉၾဵတ်ႉ ပုၵ်ႉ၊ တိၵ်းတွၵ်ႇၼၼ်ႉၼႃႇ။ ပႃႈၵေႃႉၼၼ်ႉၵေႃႈယူႇဝႆႉတီႈႁိူၼ်းၵူၺ်းၼင်ႇၵဝ်ႇ။ သိုၵ်း ႁႄ ယႄး (ပလိၵ်ႈ) ၶဝ် မႃးႁွင်ႉဢဝ်မၼ်းတီႈႁိူၼ်း။ မိူဝ်ႈလဵဝ်ပဵၼ်ႁိုဝ်ပဵၼ်ႁႃၵေႃႈဢမ်ႇလႆႈႁူႉၸွမ်းသင်ထႅင်ႈ။ ၶဝ်ၺွပ်းၵႂႃႇဝႆႉ တီႈႁူင်းပလိၵ်ႈမူႇၸေႊၼႆႉၵူၺ်း” ဝႃႈၼႆ။

ၵဵဝ်ႇလူၺ်ႈ ၵူၼ်းၸိူဝ်းပၼ်ႁႅင်း၊ ၵမ်ႉထႅမ်၊ ပိုၼ်ၽႄ လွင်ႈၵၢၼ်မိူင်း လႄႈ ႁဵတ်းသၢင်ႈလွင်ႈ တူင်ႉၼိုင်ၾၢင်ႁၢင်ႈ ႁႂ်ႈပဵၼ်ၵၢၼ်ယႃႉၵဝ်းပၢင်လိူၵ်ႈတင်ႈလူႉၼၼ်ႉ ၸိူဝ်းၺႃးတီႉၺွပ်း ၵႂႃႇၼၼ်ႉ ဢမ်ႇၵႃး ၵူၼ်းမိူင်းမၢၼ်ႈထုင်ႉပဵင်းၵူၺ်း ၵူၼ်းမိူင်းတႆးပွတ်းႁွင်ႇ၊ မိူင်းတႆးပွတ်းၸၢၼ်း၊ မိူင်းတႆးပွတ်းဢွၵ်ႇၵေႃႈ ၺႃးတီႉၺွပ်း ဢဝ်လိူင်ႈဝႆႉ လူၺ်ႈၾိင်ႈမိူင်း ၵၢၼ်ယႃႉၵဝ်းပၢင်လိူၵ်ႈတင်ႈ မတ်ႉတႃ 23 (က) ဝႆႉ တင်းၼမ်။

မိူဝ်ႈဝၼ်းတီႈ 17/12/2025 ယၢမ်းဝၢႆးဝၼ်း မွၵ်ႈ 2 မူင်းၼၼ်ႉ ၵူၼ်းၸၢႆး ဢႃႇယု 35 ပီ ၵေႃႉၼိုင်ႈ တီႈပွၵ်ႉ (6) ဝဵင်းဢေး တႃႇယႃႇ ၸႄႈဝဵင်းတူၼ်ႈတီး ၺႃးသိုၵ်းမၢၼ်ႈတီႉၺွပ်းဢဝ် ၵႂႃႇ။ ယၢမ်းလဵဝ် ထုၵ်ႇဢဝ်လိူင်ႈဝႆႉ တီႈႁူင်းပလိၵ်ႈ ဝဵင်းဢေးတႃႇယႃႇ ၼႆယဝ်ႉ။

မိူဝ်ႈဝၼ်းတီႈ 16/12/2025 ၼၼ်ႉသမ်ႉ ၼုမ်ႇၸၢႆး ဢႃႇယု 31 ပီ ၸိုဝ်ႈဢၵွင်ႉၾဵတ်ႉပုၵ်ႉ Aung Kyaw Hein ယူႇပွၵ်ႉဝဵင်းၵႅဝ်ႈ ၼႂ်းဝဵင်းတႃႈၶီႈလဵၵ်း မၼ်းတႅမ်ႈသႄႉသွမ်း ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေၼမ်းၸတ်းၼႆႉ ၼိူဝ်ၼႃႈလိၵ်ႈၾဵတ်ႉပုၵ်ႉမၼ်းလႄႈ သိုၵ်းမၢၼ်ႈတီႉၺွပ်းဢဝ်ၵႂႃႇသႂ်ႇၶွၵ်ႈၶင်သေ ပိုတ်ႇလိူင်ႈဢဝ်တၢင်းၽိတ်းဝႆႉတီႈ ႁူင်းပလိၵ်ႈႁွင်ႈလိုၵ်ႉဝႆႉ ဝႃႈၼႆ။

လိူဝ်ၼၼ်ႉ ၼၢင်းယိင်း ဢႃႇယု 34 ပီ ယူႇပွၵ်ႉ (3) ဝဵင်းႁၢႆးဝူဝ်း ၸႄႈဝဵင်းၵၢတ်ႇလေႃႉၵေႃႉၼိုင်ႈ ၸိုဝ်ႈၾဵတ်ႉပုၵ်ႉ Phyu ၼႆၼၼ်ႉၵေႃႈ သိုပ်ႇပိုၼ်ၽႄႈ (Share) လိၵ်ႈဢၼ်တႅမ်ႈ ထတ်းသၢင်ဝႆႉ ၼိူဝ်ပၢင်လိူၵ်ႈတင်ႈဢမ်ႇလီၼၼ်ႉလႄႈ ၺႃးသိုၵ်းမၢၼ်ႈတီႉၺွပ်းဢဝ်ၵႂႃႇ ပိုတ်ႇလိူင်ႈဢဝ်တၢင်းၽိတ်းဝႆႉ တီႈႁူင်းပလိၵ်ႈႁၢႆးဝူဝ်းမိူၼ်ၵၼ် ။

ပူၼ်ႉမႃးဝၼ်းတီႈ 16 လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇပၢၵ်ႇလၢတ်ႈဢွၵ်ႇမႃး ပဵၼ်တၢင်းၵၢၼ်ဝႃႈ ၵူၼ်းၸိူဝ်းၺႃးသိုၵ်းမၢၼ်ႈတီႉၺွပ်းၵႂႃႇ လူၺ်ႈ “ပၵ်းပိူင် ဢၼ်ၵႅတ်ႇၵင်ႈ လွင်ႈယႃႉၵဝ်းပၢင်လိူၵ်ႈတင်ႈ ပႃႇတီႇၸုမ်ႇၵူႈ” ၼႆႉ ၵူၼ်းၸၢႆးမီး 201 ၵေႃႉ၊ ၼၢင်းယိင်းမီး 28 ၵေႃႉ ႁူမ်ႈသဵၼ်ႈမီး 229 ၵေႃႉယဝ်ႉ ဝႃႈၼႆ။

တႃႇၸတ်းၵၢၼ်လွင်ႈႁူမ်ႇလူမ်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းယၢမ်ႈပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ်ဝႆႉဝႃႈ ၵူၼ်းၸိူဝ်း ဢုပ်ႇလၢတ်ႈ၊ သူၼ်းသေႃႇ၊ လူင်းမိုဝ်းႁဵတ်း သၢင်ႈ ထတ်းသၢင်၊ ပိုၼ်ၽႄႈ လွင်ႈတၢင်း ဢၼ်တေၸၢင်ႈႁဵတ်းႁႂ်ႈတုမ်ႉယွၼ်ႈထိုင်ပၢင်လိူၵ်ႈတင်ႈၼၼ်ႉ တေၵူတ်ႇထတ်းသေ ဢဝ်လိူင်ႈၵႂႃႇၼၵ်းၼၵ်းၼႃၼႃ ၼႆယဝ်ႉ။