တႄႇႁူဝ်လိူၼ် တီႊသႅမ်ႊပိူဝ်ႊၼႆႉမႃး ပလိၵ်ႈ/သိုၵ်းမၢၼ်ႈပႂ်ႉ ၵူတ်ႇထတ်း တီႉၺွပ်း ယိုတ်းဢဝ် ၵႃး ၸိူဝ်းဢမ်ႇမီးဝတ်းဝႂ်လၢႆႊသိၼ်ႊတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းမႃးၶိုၼ်းႁၢဝ်ႈႁႅင်း   ။   

ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်း တီႈတၢင်း သီႇယႅၵ်ႈ ၾႆးၶဵဝ် ၾႆးလႅင် ၼႂ်းၵၢင်ဝဵင်းလႄႈ ၸွမ်း ၵဵတ်ႉလၢၼ်ႇ တၢင်း ၶဝ်ႈ ဢွၵ်ႇဝဵင်းတူၼ်ႈတီးၶိုၼ်းႁၢဝ်ႈႁႅင်း။   ပေႃးပဵၼ်ရူတ်ႉၵႃးဢမ်ႇမီးဝႂ် ၵူၼ်းၶပ်းဢမ်ႇမီးဝႂ်ၸိူဝ်းၼႆႉ  ယိုတ်းဢဝ်သေဢမ်ႇၵႃး လွၵ်ႇငိုတ်ႈပႃးဝႃႈ သင်မႃးထၢမ်ဢဝ်ငိုၼ်းထုတ်ႇဢဝ်ၶိုၼ်းၼႆၸိုင် တေတီႉၺွပ်းပႃးၸဝ်ႈၵႃး – ဝႃႈၼႆထႅင်ႈ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ၸမ်ပီသဵင်ႈယဝ်ႉလႄႈပလိၵ်ႈမၢၼ်ႈၶဝ် တႄႇတီႉၺွပ်းၶိုၼ်းယဝ်ႉ ၊ တလဵဝ် ၶဝ်တီႉႁႅင်းၼႃႇ ၊သင်တီႉလႆႈၼႆႉ ဢမ်ႇဢဝ်ငိုၼ်းထုၵ်ႇလႆႈမိူၼ်ၵူႈပွၵ်ႈယဝ်ႉ ၊ လွၵ်ႇဝႆႉပႃးဝႃႈ ပေႃးၽႂ်ဢဝ်ငိုၼ်းမႃးထၢမ်ထုတ်ႇၼႆ တေတီႉပႃးၵူၼ်းၼႆလူးၵွၼ်ႇ”- ဝႃႈၼႆ ။

ၼႂ်းဝၼ်းတီႈ 13/12/2025 ယၢမ်းၵၢင်ဝၼ်း 12 မူင်း ပလိၵ်ႈမၢၼ်ႈ ပႂ်ႉၵူတ်ႇထတ်း တီႉၺွပ်းၵႃး ၸိူဝ်းဢမ်ႇမီးလၢႆႊသိၼ်ႊ တီႈၼိူဝ်သဵၼ်ႈတၢင်း ၵႂႃႇႁူင်းယႃ ၶၢႆႇမဵတ်ႉတႃႇ( ခိုင်မေတ္တာ )  ၊ ၼႂ်း ဝၼ်းလဵဝ်တီႉၺွပ်းယိုတ်းဢဝ်ၵႃး ဢမ်ႇမီးလၢႆႊသိၼ်ႊ 80 ပၢႆ  ဝႃႈၼႆ။

ၵႃးၸိူဝ်းဢၼ်ပလိၵ်ႈမၢၼ်ႈတီႉၺွပ်းၵႂႃႇၼၼ်ႉၵမ်ႈၼမ်  ပဵၼ်ၵႃးႁိူၼ်းလႄႈ ၊ ၵႃးၵူၼ်းပဵၼ် ဢၼ်မႃးယူတ်းယႃတူဝ်၊  ၵႃးလုၵ်ႈႁဵၼ်း ၸိူဝ်းမႃးႁပ်ႉၸုမ်ႈၶူး ၸိူဝ်းၼၼ်ႉ  လႆႈႁူႉၼင်ႇၼႆ။

မိူၼ်ၼင်ႇၼႆ ၼႂ်းဝၼ်းတီႈ 10/12/2025 ၼၼ်ႉၵေႃႈ ပလိၵ်ႈသိုၵ်းမၢၼ်ႈပႂ်ႉၵူတ်ႇထတ်းၵႃး ၸိူဝ်းဢမ်ႇမီးဝႂ်လၢႆႊသိၼ်ႊ ၸွမ်းၵဵတ်ႉလၢၼ်ႇ မိူင်းပွၼ်ႇ တီႉၺွပ်းယိုတ်းဢဝ်ၵႃး ၸိူဝ်းတေမႃးႁပ်ႉၸုမ်ႈၶူး တီႈဝဵင်းတူၼ်ႈတီး ။

  ပဵၼ်ၵႃးလုၵ်ႈႁဵၼ်း တၢင်းဝဵင်းမိူင်းသၢတ်ႇ ၊ ၵဵင်းတွင်း ၊ လၢင်းၶိူဝ်း ၊ ပၢင်လူင် ၊ ၼမ်ႉၸၢင် ၸိူဝ်းၼႆႉၵူၺ်းဢမ်ႇၵႃး တီႈဝဵင်းႁူဝ်ပူင်းၼၼ်ႉ ဢၼ်တီႉၺွပ်းဝႆႉပႃးၸဝ်ႈၵႃးသေ  ပိုတ်ႇလိူင်ႈဢမူႉဝႆႉၵေႃႈမီး ဝႃႈၼႆ။  

ၼၢင်းယိင်းၵူၼ်းမိူင်းဝဵင်းႁူဝ်ပူင်းလၢတ်ႈၽူႈတွႆႇႁွၵ်ႈဝႃႈ -“ တီႉၺွပ်းတီႈၵဵတ်ႉမိူင်းပွၼ် ၊ လႆႈႁူႉဝႃႈ တီႉၺွပ်းဝႆႉၵူၼ်းႁေႃႈၵႃးမွၵ်ႈ 20 ၵေႃႉၼႆႉ ၊ ဢဝ်လိူင်ႈဝႆႉလူၺ်ႈဢမူႉ ႁေႃႈၵႃးဢမ်ႇမီးဝႂ်လၢႆႊသိၼ်ႊၼႆ ၊ ၵူၼ်းတႄႉ ပေႃးၶႂ်ႈလွတ်ႈၼႆ တေလႆႈပၼ် 30 သႅၼ်ၼႆႉ ၊ ၵႃးတႄႉ ဢမ်ႇပၼ်ၶိုၼ်း ၶဝ်ယိုတ်းပႅတ်ႈ”- ဝႃႈၼႆ ။

လိူဝ်ၼၼ်ႉတႄႇႁူဝ်လိူၼ်ၼႆႉမႃး ပလိၵ်ႈသိုၵ်းမၢၼ်ႈ ၶဝ်ႈပွၵ်ႉဢွၵ်ႇပွၵ်ႉ ပၼ်လဵပ်ႈၵူတ်ႇထတ်း ယၢမ်းၵၢင်ၶမ်ႈၵၢင်ၶိုၼ်းမႃးႁၢဝ်ႈႁႅင်းလႄႈ ၵူၼ်းႁဵတ်းၵၢၼ်ၽွင်းၵၢင်ၶမ်ႈၵၢင်ၶိုၼ်း ၵိုင်ႇလီၾၢင်ႉ ၵႂႃႇမႃးၵူဝ်ႇၺႃးတီႉၺွပ်းၵႂႃႇၾိုၵ်းၵၢၼ်သိုၵ်း – ၵူၼ်းပိုၼ်ႉတီႈလၢတ်ႈ ။

ၾၢႆႇၼိုင်ႈ တီႈဝဵင်းတူၼ်ႈတီးၼႆႉ မၢႆမီႈသိုၵ်း မႃႊသျႄႊလေႃႊ ဢၼ်ဢွၵ်ႇဝႆႉၸဵမ်မိူဝ်ႈသိုၵ်းမၢၼ်ႈတႄႇယိုတ်းဢႃႇၼႃႇၸိုင်ႈမိူင်းပုၼ်ႉၼၼ်ႉ တိုၵ်ႉမီးယူႇ။ သိုၵ်းပႆႇလူတ်းယွၼ်ႇပူတ်းပၼ်ၶိုၼ်း။ ၵွပ်ႈၼႆသင်ဝႃႈ ၺႃးတီႉၸွမ်းတၢင်း ယၢမ်းၵၢင်ၶမ်ႈၵၢင်ၶိုၼ်းၼႆ တႃႇတေလွတ်ႈၶိုၼ်းပဵၼ်ဢၼ်ယၢပ်ႇၽိုတ်ႇတႄႉတႄႉ- ၼၢင်းယိင်း ၵူၼ်းၶၢႆၶူဝ်းတီႈဝဵင်းတူၼ်ႈတီးလၢတ်ႈၼင်ႇၼႆ။

တႄႇသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇလႆႈတၢင်ႇဝႆႉမၢႆၾၢင် (လၢႆႊ သိၼ်ႊ) ဝႆႉၸိူဝ်းၼၼ်ႉယဝ်ႉ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလမ်းတီႉၺွပ်းရူတ်ႉၵႃးသေ တေႃႇထိုင်ဝၼ်းမိူဝ်ႈၼႆႉ ပလိၵ်ႈသိုၵ်းမၢၼ်ႈ ၵူတ်ႇထတ်း ဝတ်းဝႂ်လၢႆႊသိၼ်ႊ မီးၸမ် 7လိူၼ်ယဝ်ႉ  ႁဵတ်းႁႂ်ႈၵူၼ်းၵႂႃႇမႃးယၢပ်ႇၽိုတ်ႇၵိၼ်းၸႂ်ၼႆယဝ်ႉ ။