ႁၢၼ်ႉ200 ပၢႆ ႁိမ်းၸမ် သူၼ်မွၵ်ႇ ဢွင်ႇသၢၼ်း( ဗိုလ်ချုပ်အောင်ဆန်း ) တီႈပၢင်ႇလဵၼ်ႈဢဵၼ်ႁႅင်းၵၢင်ဝဵင်းတူၼ်ႈတီးၸိုင်ႈတႆးပွတ်းၸၢၼ်းၼၼ်ႉ ၾၢႆႇတၢင်းႁွင်ႈၵၢၼ်ၾၢႆႇလဵၼ်ႈႁႅင်းဢွၵ်ႇလိၵ်ႈသင်ႇၶၢႆႉႁႂ်ႈယဝ်ႉတူဝ်ႈၼႂ်းၶၢဝ်းတၢင်း 1 လိူၼ်ဝႃႈၼႆ။

 လိၵ်ႈ ပိုၼ်ၽၢဝ်ႇ ဢွၵ်ႇမႃးမိူဝ်ႈဝၼ်းတီႈ 1 လိူၼ်တီႊသႅမ်ႊပိူဝ်ႊဝႃႈ – တႃႇတေသၢင်ႈ ႁူင်းလဵၼ်ႈႁႅင်းလႄႈ ဢၢင်ႇလဵၼ်ႈၼမ်ႉႁႂ်ႈၶႅမ်ႉလိူဝ်ၵဝ်ႇၼၼ်ႉ ႁႂ်ႈႁၢၼ်ႉၶၢႆၶူဝ်းၶၢႆတၢင်းၵိၼ်ဢၼ်မီးႁိမ်းႁွမ်းၼၼ်ႉ ၶၢႆႉဢွၵ်ႇ   ၼႂ်းၶၢဝ်းတၢင်းၼိုင်ႈလိူၼ်ႁႂ်ႈယဝ်ႉတူဝ်ႈ ၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼႂ်းလိၵ်ႈတႄႉပႃးဝႃႈ တေလႆႈၶၢႆႉပၼ်ၼႂ်းၶၢဝ်းတၢင်း ၼိုင်ႈလိူၼ်ၼႆ ၊ တႄႇလိူၼ်ၼႆႉၵႂႃႇ ၵႃႈႁွင်ႈၵေႃႈၶဝ်ဢမ်ႇၵဵပ်းယဝ်ႉ ၊ ၵမ်ႈၽွင်ႈတိုၵ်ႉ ႁႃႁွင်ႈယူႇ  ၊ ငိၼ်းဝႃႈ ၶဝ်တေယႃႉႁွင်ႈႁၢၼ်ႉၸိူဝ်းၼၼ်ႉသဵင်ႈသဵင်ႈသေ  တေႁဵတ်းႁူင်းလဵၼ်ႈႁႅင်း ဢၼ်မႂ်ႇၼႆ”- ဝႃႈၼႆ ။

ႁၢၼ်ႉ ႁွင်ႈဢၼ်မီးႁိမ်းၸမ် ႁူင်းလဵၼ်ႈမၢၵ်ႇၼင်ႇၼၼ်ႉ မီးၸမ် 200 ပၢႆ ။ ၼႂ်းၼၼ်ႉ မီးႁၢၼ်ႉ ပိုတ်ႇၶိူင်ႈၸၢၵ်ႈရူတ်ႉၶိူင်ႈလႄႈ ႁၢၼ်ႉၶဝ်ႈမုၼ်း ၊ ႁၢၼ်ႉၶိူင်ႈၶွမ်ႊ ။ ၵူၼ်းႁဵတ်းၵၢၼ် ႁႃၸဝ်ႉၵိၼ်ၶမ်ႈၵေႃႈ  ၶၢတ်ႈယူႇသဝ်းဝႆႉၵေႃႈမီးတင်းၼမ်   ။

ၵွပ်ႈပိူဝ်ႈၶဝ်ပၼ်ၶၢဝ်းယၢမ်းၶၢႆႉဢွၵ်ႇလိူၼ်လဵဝ်ၵူၺ်းလႄႈ  တွၼ်ႈတႃႇ ၵူၼ်းႁဵတ်း ၵၢၼ် ႁႃၸဝ်ႉၵိၼ်ၶမ်ႈ ဢိၵ်ႇၸိူဝ်းၸဝ်ႈၶွင်ႁၢၼ်ႉၶဝ်ယၢပ်ႇၽိုတ်ႇၵိၼ်းၸႂ်ဝႆႉ။

ၼၢင်းယိင်းၵေႃႉၼိုင်ႈဢၼ်ၶၢတ်ႈႁွင်ႈယူႇဝႆႉတီႈၼၼ်ႉလၢတ်ႈၽူႈတွႆႇႁွၵ်ႈဝႃႈ -“ႁွင်ႈၸိူဝ်းၼၼ်ႉ ၼိုင်ႈလိူၼ် လႆႈပၼ် 1 သႅၼ် ၊ တွၼ်ႈတႃႇ ၵူၼ်းႁဵတ်းၸဝ်ႉႁႃၶမ်ႈတႄႉသၢင်ႇထုၵ်ႇဢေႃႈ ၊ ၵမ်းၼႆႉ တေလႆႈၶၢႆႉၵႂႃႇယူႇလႂ်ၵေႃႈဢမ်ႇႁူႉ ၊ ၶၢတ်ႈႁွင်ႈယူႇၵေႃႈ ဢမ်ႇငၢႆႈ 5 သႅၼ်ၶိုၼ်ႈၼိူဝ်လၢႆလၢႆ ၊ လႆႈယူႇတီႈႁွင်ႈၼႆႉတင်းပေႃးယူႇပေႃးၵိၼ်ၵူၺ်းဢေႃႈ ၊ ဢမ်ႇၸၢင်ႈႁဵတ်းႁိုဝ် တေလႆႈၶၢႆႉပၼ်ဢေႃႈ”- ဝႃႈၼႆ ။

ယၢမ်းလဵဝ် တီႈဝဵင်းတူၼ်ႈတီႈ မီးၵူၼ်းၵိုၼ်းၶွၼ်ႈ၊  ၵူၼ်းပၢႆႈၽေးသိုၵ်း လႅၼ်လိၼ်တႆး- ယၢင်းလႅင် ၊ ပၢင်လွင်း ၊ ၾၢႆၶုၼ် ၊ လွႆၶေႃ ၸိူဝ်းၼႆႉၵေႃႈ မႃးယူႇသဝ်းၼမ် ။ ၶႄႇ- ၵလႃး – မၢၼ်ႈ ဢၼ်လုၵ်ႉတၢင်းမိူင်းမၢၼ်ႈတူင်ႈပဵင်းၶိုၼ်ႈမႃးၵေႃႈၼမ်။ ႁဵတ်းႁႂ်ႈၶၼ်ၶတ်ႈႁိူၼ်း ဝဵင်းတူၼ်ႈတီႈ ၶိုၼ်ႈထိုင် ၼမ်ႉႁူဝ်သိပ်းသႅၼ်ပျႃး ဝႃႈၼႆ ။

တႃႇတေသၢင်ႈႁူင်းလဵၼ်ႈႁႅင်းဢၼ်မႂ်ႇၼႆႉၵေႃႈလႆႈႁူႉဝႃႈတၢမ်တူဝ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ  မႃးလၢတ်ႈၸဵမ်မိူဝ်ႈ  လိူၼ်မၢတ်ႉၶျ် ပီ 2023 ပုၼ်ႉယဝ်ႉလႆႈႁူႉၼင်ႇၼႆ ။