မိူဝ်ႈဝႃး ဝၼ်းတီႈ 27 လိူၼ်ၼူဝ်ႊဝႅမ်ႊပိူဝ်ႊ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ တေတႄႇပၼ်ႇၸၢၵ်ႈ ႁူင်းၸၢၵ်ႈၾႆးၾႃႉထၢၼ်ႇႁိၼ် တီႈဝၢၼ်ႈသီႇၵိပ်ႇ ၸႄႈဝဵင်းပၢင်လွင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉၶိုၼ်း ၼႆယဝ်ႉ။

ဝၢႆးလင် ပီ 2021 သိုၵ်းမၢၼ်ႈယိုတ်းမိူင်းယဝ်ႉၼႆႉ သိုၵ်းမၢၼ်ႈသိုပ်ႇမူၼ်ႉမႄး ႁူင်းၸၢၵ်ႈၾႆးၾႃႉထၢၼ်ႇႁိၼ် တီႈဝၢၼ်ႈသီႇၵိပ်ႇ ႁႂ်ႈၶိုၼ်ႈၸၼ်ႉမႃးလိူဝ်ၵဝ်ႇထႅင်ႈၼႆသေ ယၢမ်းလဵဝ် မူၼ်ႉမႄးယုၵ်ႉမုၼ်း ၶိူင်ႈၸႂ်ႉတိုဝ်းၼႂ်း ႁူင်းၸၢၵ်ႈယဝ်ႉတူဝ်ႈလီငၢမ်းတင်းသဵင်ႈ မၵ်းမၼ်ႈ ႁူင်းၸၢၵ်ႈၾႆးၾႃႉထၢၼ်ႇႁိၼ် ပဵၼ်ၸၼ်ႉ (2) ၼႂ်းဝၼ်းပိုတ်ႇၼၼ်ႉၵႂႃႇ ၼႆယဝ်ႉ။

ၼႂ်းပၢင်ပိုတ်ႇႁူင်းၸၢၵ်ႈၾႆးၾႃႉထၢၼ်ႇႁိၼ် ၸၼ်ႉ (2) ၼၼ်ႉ ႁူဝ်ပဝ်ႈ ၶွမ်ႊမသျိၼ်ႊၾၢႆႇႁဵတ်းၵၢၼ်ႁုၼ်ႈ မုၼ်း ၵၢၼ်ၾႆးၾႃႉ ၽွင်းလူင်မိူင်းႁူမ်ႈတုမ် ဢူးတိၼ်ႇဢွင်ႇသၢၼ်း၊ ဢူးၺၢၼ်ႇထုၼ်း ၽွင်းလူင် ႁွင်ႈၵၢၼ် ၾႆးၾႃႉ မိူင်းႁူမ်ႈတုမ်၊ ဢူးဢွင်ႇဢွင်ႇ ၸွမ်ၽွင်းလူင်မိူင်းတႆး၊ ဢူးၶုၼ်ႇသၼ်ႇလုၼ်ႇ ၽူႈၶဝ်ႈၸုမ်း ၾၢႆႇၵိူဝ်းၵုမ် ငဝ်ႈငုၼ်းၶွင်ႊသီႊၾၢႆႇႁူမ်ႇလူမ်ႈ လႄႈ ၵႅတ်ႇၶႄၸိူဝ်ႉၸၢတ်ႈ၊ ဢူးၶုၼ်ႇယႄးထူၺ်း ႁူဝ်ပဝ်ႈ ၸုမ်းပဢူဝ်း၊ ၶွမ်ႊပၼီႊ (Wuxi Hua Guang (Myanmar) Co., Ltd.)၊ ၶွမ်ႊပၼီႊ ဢေႊတိၼ်ႊ လႄႈ ၶွမ်ႊပၼီႊ မၼေႃးဢေႊယႃႊ ၸိူဝ်းၼႆႉ ၶဝ်ႈႁူမ်ႈၸွမ်း ၼႆယဝ်ႉ။

သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇၶၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ “ႁူင်းၸၢၵ်ႈၾႆးၾႃႉတီႈသီႇၵိပ်ႇၼႆႉ မိူဝ်ႈဢွၼ်တၢင်း ႁဵတ်းဢွၵ်ႇၾႆးၾႃႉလႆႈ ႁႅင်း 90 မႄႊၵဝတ်ႉ။ ယၢမ်းလဵဝ် ပေႃးပၼ်ႇၵၢၼ်လႆႈ ႁူင်းၸၢၵ်ႈၾႆးၾႃႉထၢၼ်ႇႁိၼ် ဢၼ်ၶိုၼ်းႁဵတ်းဝႆႉမႂ်ႇၼႆႉတႄႉ တေႁဵတ်းဢွၵ်ႇႁႅင်းၾႆးၾႃႉလႆႈ 120 မႄႊၵဝတ်ႉ” ၼႆယဝ်ႉ။

လႆႈႁူႉဝႃႈ ထၢၼ်ႇႁိၼ်ဢၼ်ဢဝ်ၸႂ်ႉတိုဝ်း ပၼ်ႇၵၢၼ်ၼႂ်းႁူင်းၸၢၵ်ႈၾႆးၾႃႉၼၼ်ႉ ထၢၼ်ႇႁိၼ်မၼ်းယမ်းတေႉယမ်းဝႃႈလႄႈ ဢမ်ႇႁဵတ်းဢွၵ်ႇပၼ်လႆႈႁႅင်းၾႆးၾႃႉၼမ် ဢမ်ႇၸၢင်ႈပၼ်ၵၢၼ်လႆႈလီလီ။ ယွၼ်ႉၼၼ် ၼင်ႇႁိုဝ်ႁူင်းၸၢၵ်ႈၾႆးၾႃႉတေပၼ်ႇၵၢၼ်လႆႈလီလိူဝ်ၵဝ်ႇၼၼ်ႉ သိုၵ်းမၢၼ်ႈယိုတ်းမိူင်း ၶိုၼ်းၽိူမ်ႉသႂ်ႇၶိူင်ႈၸၢၵ်ႈ ဢၼ်တေႁဵတ်းႁႂ်ႈထၢၼ်ႇႁိၼ် ႁႅင်ႈဝႆးၼၼ်ႉ ၼႆယဝ်ႉ။

ၵၢၼ်ၸႂ်ႉတိုဝ်းႁူင်းၸၢၵ်ႈၾႆးၾႃႉထၢၼ်ႇႁိၼ်ၼႆႉ ႁဵတ်းႁႂ်ႈတုမ်ႉတိူဝ်ႉသၽႃႇဝ ယႃႉလူႉသိင်ႇဝႅတ်ႉလွမ်ႉၵွႆႁႅင်းၵူၺ်းဢမ်ႇၵႃး ယွၼ်ႈထိုင်ပႃးပၢႆးယူႇလီၵူၼ်းမိူင်းၼႂ်းပိုၼ်ႉတီႈ ၸိူဝ်း သုတ်ႇၺႃးဢၢႆၵႂၼ်းမၼ်းၼၼ်ႉႁၢဝ်ႈႁႅင်း တေႉတေႉၼႆလႄႈ ၸိုင်ႈမိူင်းလၢႆလၢႆမိူင်း ၼႂ်းလုမ်ႈၾႃႉ ဢွၼ်ၵၼ်ၶတ်းၸႂ်လူတ်းယွမ်း ဝႄႈပႅတ်ႈလၢႆးတၢင်းဢၼ်ၼႆႉ။

ၽွင်းလၢႆလၢႆၸိုင်ႈမိူင်းၼႂ်းလုမ်ႈၾႃႉ ၶတ်းၸႂ်ဢိုတ်းႁပ်းၵိုတ်းပႅတ်ႈ ႁူင်းၵၢၼ်ၾႆးၾႃႉ ဢၼ်လႆႈၸႂ်ႉတိုဝ်းထၢၼ်ႇႁိၼ်ယူႇၼႆႉ သိုၵ်းမၢၼ်ႈယိုတ်းမိူင်းသမ်ႉ ႁူမ်ႈမိုဝ်းၵၼ်တင်း ၸဝ်ႈ ၵၢၼ်ပၢႆးမၢၵ်ႈမီးလူင် ၶွမ်ႊပၼီႊ ဢေႊတိၼ်ႊ (ဧဒင်) ဢၼ်ဢူးၶျိတ်ႉၶၢႆႇ ပဵၼ်ၸဝ်ႈၶွင်ၼၼ်ႉသေ ႁၢင်ႈႁႅၼ်းတႃႇပၼ်ႇၵၢၼ်ၶိုၼ်း ႁူင်းၸၢၵ်ႈၾႆးၾႃႉထၢၼ်ႇႁိၼ် ႁႂ်ႈႁႅင်းၾႆးၾႃႉ ဢွၵ်ႇၼမ်လိူဝ်ၵဝ်ႇထႅင်ႈ 30 မႄႊၵဝတ်ႉ ၼႆယဝ်ႉ။

မိူဝ်ႈပီ 2015 ႁွင်ႈၵၢၼ်ၽွင်းလူင်ၾႆးၾႃႉ ၶၢတ်ႈပၼ်ၶွမ်ႊပၼီႊမိူင်းၶႄႇ Wuxi Hua Guang ႁဵတ်းၵၢၼ် ပၼ်ႇၸၢၵ်ႈႁူင်းၾႆးၾႃႉထၢၼ်ႇႁိၼ်တီႈဝၢၼ်ႈသီႇၵိပ်ႇ။ ထၢၼ်ႇႁိၼ်ဢၼ် ၸႂ်ႉတိုဝ်းတီႈႁူင်းၸၢၵ်ႈၼၼ်ႉသမ်ႉ တေႃႉဢဝ်တီႈ ၶွမ်ႊပၼီႊၶုတ်းထၢၼ်ႇႁိၼ် ဢေႊတိၼ်ႊမႃးၵူႈပီ ၼႆယဝ်ႉ။

ယွၼ်ႉႁူင်းၸၢၵ်ႈ လႄႈ ၵၢၼ်ၶုတ်းထၢၼ်ႇႁိၼ် (မိူင်ထၢၼ်ႇႁိၼ်) သေ ၵူၼ်းမိူင်းသီႇၵိပ်ႇ ထူပ်းၽေးၼမ်ႉႁႅင်ႈ၊ ဢမ်ႇမီးၼမ်ႉတႃႇၵိၼ်တႃႇၸႂ်ႉ၊ ရေႃးၵႃႇတၢင်းပဵၼ်ႁၢႆႉႁႅင်း၊ လုၵ်ႈ ဢွၼ်ႇၵိူတ်ႇမႃးမႂ်ႇၵေႃႈ ဢမ်ႇၵႅၼ်ႇၶႅင် ဢမ်ႇတဵမ်ထူၼ်ႈ၊ လိုၼ်းသုတ်း ဢဝ်သဵၼ်ႈၶူၼ်ႁူဝ်ၵႂႃႇၵူတ်ႇထတ်းတီႈမိူင်းဢေႃးသတေးလျႃးသေ လႆႈႁူႉၶေႃႈတွပ်ႇဝႃႈ မီးထၢတ်ႈၵွင်ႉသၢၼ် ၼႂ်းသဵၼ်ႈၶူၼ်ႁူဝ်လုၵ်ႈဢွၼ်ႇ ၼႆယဝ်ႉ။

ၵွပ်ႈၼၼ် မိူဝ်ႈဝၼ်းတီႈ 30 လိူၼ်ဢွၵ်ႉထူဝ်ႊပိူဝ်ႊ ပီ 2019 ၵူၼ်းမိူင်းၼႂ်းထုင်ႉသီႇၵိပ်ႇ ၵူႈၸၢဝ်းၶိူဝ်း ၼပ်ႉႁူဝ်ႁဵင်ၵေႃႉ ၸင်ႇၽွမ်ႉၵၼ်လုၵ်ႉႁိုၼ်ႇသၢၼ်ၶတ်း ႁႂ်ႈၵိုတ်းပၼ် ၵၢၼ်ၶုတ်းထၢၼ်ႇႁိၼ် လႄႈ ၵၢၼ်ပၼ်ႇႁူင်းၸၢၵ်ႈၾႆးၾႃႉထၢၼ်ႇႁိၼ် ၼႆႉယူႇ။

ႁူင်းၾႆးၾႃႉထၢၼ်ႇႁိၼ်သီႇၵိပ်ႇၼႆႉ တင်ႈယူႇႁိမ်းဝၢၼ်ႈသီႇၵိပ်ႇ ၸႄႈဝဵင်းပၢင်လွင်း ၸႄႈတွၼ်ႈတူၼ်ႈတီး။ ႁူင်းၵၢၼ် တေႇပၼ်ႇမိူဝ်ႈပီ 2001 ၼၼ်ႉသေ လႆႈၶုတ်းထၢၼ်ႇႁိၼ် ပၼ်ႇၶိူင်ႈၸၢၵ်ႈႁူင်းၾႆးၾႃႉၼႂ်းပီ 2005။

မိူဝ်ႈပူၼ်ႉမႃး ၵူၼ်းမိူင်းထုင်ႉသီႇၵိပ်ႇၼပ်ႉႁူဝ်ႁဵင်ႁူမ်ႈၵၼ်ၼေၵၢင်ၸႂ်သၢၼ်ၶတ်း မိူင်ထၢၼ်ႇႁိၼ်လႄႈ ႁူင်းၸၢၵ်ႈၾႆးၾႃႉထၢၼ်ႇႁိၼ်ၼႆႉမႃး လၢႆလၢႆပွၵ်ႈယဝ်ႉၵေႃႈ ၶွမ်ႊပၼီႊ လႄႈ လူင်ပွင်ၸိုင်ႈ ဢမ်ႇထွမ်ႇသဵင် ၵၢင်ၸႂ်ၵူၼ်းမိူင်း ။ ယင်းတိုၵ်ႉသိုပ်ႇၶုတ်းထၢၼ်ႇ၊ မူၼ်ႉမႄး ယုၵ်ႉမုၼ်းႁူင်းၸၢၵ်ႈသေ ၶတ်းၸႂ်ပၼ်ႇၵၢၼ်ႁႂ်ႈၼမ်လိူဝ်ၵဝ်ႇထႅင်ႈယူႇ။

လႆႈႁူႉဝႃႈ တႃႇၶူင်းၵၢၼ် ႁူင်းၸၢၵ်ႈၾႆးၾႃႉထၢၼ်ႇႁိၼ်ၼႆႉ ၶွမ်ႊပၼီႊမိူင်းၶႄႇ လူင်းတိုၼ်းလၢင်းဝႆႉၸွမ်း ႁူမ်ႈသဵၼ်ႈ 47 လၢၼ်ႉ တေႃႊလႃႊ။ ၶွမ်ႊပၼီႊမိူင်းၶႄႇမႃးၶၢတ်ႈဢွင်ႈလိၼ် တီႈလူင်ပွင်ၸိုင်ႈ ႁွင်ႈၵၢၼ်ၽွင်းလူင်ၾႆးၾႃႉ တႃႇ 22 ပီ၊ ၼိုင်ႈပီလႂ် လႆႈပၼ်ၵႃႈၶၢတ်ႈ 1.18 လၢၼ်ႉတေႃႊလႃႊ ၼႆယဝ်ႉ။

ၼင်ႇႁိုဝ် ႁူင်းၸၢၵ်ႈၾႆးၾႃႉထၢၼ်ႇႁိၼ်တေပၼ်ႇၵၢၼ်လႆႈလီငၢမ်းၼၼ်ႉ ၼိုင်ႈပီ လူဝ်ႇၸႂ်ႉတိုဝ်း ထၢၼ်ႇႁိၼ် 8 သႅၼ်တၼ်ႊ ၼႆယဝ်ႉ။