မိူင်းၶူဝ်ႊရီႊယိူဝ်ႊၸၢၼ်း ၸတ်းႁဵတ်းပၢင်တွပ်ႇလိၵ်ႈ သူႊၼိူင်ႊ (Suneung )ႁိုင်ၶၢဝ်းတၢင်း 13 ၸူဝ်ႈမူင်း၊ ပၢင်တွပ်ႇလိၵ်ႈ ၶၢဝ်းယၢမ်းႁိုင်လိူဝ်ပိူၼ်ႈသုတ်း ၼႂ်းလုမ်ႈၾႃႉ ဝႃႈၼႆ။

ၼႂ်းၶၢဝ်းယၢမ်း ၸတ်းႁဵတ်းပၢင်တွပ်ႇလိၵ်ႈယူႇၼၼ်ႉ လႆႈပိၵ်ႉဢိုတ်းပၼ် ႁၢၼ်ႉတၢင်းၶၢႆ၊ ၼင်ႇႁိုဝ် သဵင်ႁိူဝ်းမိၼ် တေဢမ်ႇလင်မေႃးသုၵ်ႉယုင်ႈၼၼ်ႉၵေႃႈ လႆႈသုတ်ႉၶၢႆႉပၼ် ၶၢဝ်းတၢင်းသၢႆၵၢၼ်မိၼ် ၸဵမ်ၸိူဝ်းၼႆႉ။

ပၢင်တွပ်ႇလိၵ်ႈၼႆႉ ၸတ်းႁဵတ်းၼႂ်းလိူၼ် ၼူဝ်ႊဝႅမ်ႊပိူဝ်ႊၵူႈပီ၊ ပဵၼ်ပၢင်တွပ်ႇလိၵ်ႈ ဢၼ်တေတႅပ်းတတ်းပၼ် ဢၼႃႇၵၢတ်ႈမိူဝ်းၼႃႈ လုၵ်ႈႁဵၼ်း ဝႃႈၼႆ။

ပၢင်တွပ်ႇလိၵ်ႈ သူႊၼိူင်ႊ (Suneung) ပီၼႆႉ ၸတ်းႁဵတ်းၵႂႃႇ ၼႂ်းဝၼ်းတီႈ 13/11/2025 ၼႆႉ။ မီးလုၵ်ႈႁဵၼ်း တူဝ်ႈမိူင်းၶူဝ်ႊရီႊယိူဝ်ႊၸၢၼ်းပတ်းပိုၼ်ႉ ၶဝ်ႈႁူမ်ႈတွပ်ႇလိၵ်ႈ 550,000 ပၢႆ ပဵၼ်ဢၼ်ၼမ်လိူဝ်ပိူၼ်ႈသုတ်း ၼႂ်းၶၢဝ်းတၢင်း 7 ပီ။

ၽႃႇသႃႇ ဢၼ်လုၵ်ႈႁဵၼ်းၶဝ် လႆႈတွပ်ႇၼႆႉ ပဵၼ်ပၢႆးၼပ်ႉ(mathematics )၊ ဢင်းၵိတ်ႉ (English)၊ ၾၢႆႇၵၼ်ၵူၼ်း ဢမ်ႇၼၼ် ပၢႆးသၢႆႊ (social or natural sciences)၊ ၽႃႇသႃႇလိၵ်ႈလၢႆးၼွၵ်ႈမိူင်း (foreign language) လႄႈ ႁၢၼ်ႇၵျ (Hanja) တူဝ်လိၵ်ႈၶႄႇၵဝ်ႇၵႄႇ ဢၼ်ၸႂ်ႉၼႂ်းၵႂၢမ်းလၢတ်ႈလိၵ်ႈလၢႆး ၶူဝ်ႊရီႊယိူဝ်ႊ၊ ၶေႃႈထၢမ်ႁူမ်ႈသဵင်ႈမီး 200 ပၢႆ။

ပၢင်တွပ်ႇလိၵ်ႈၼႆႉ လမ်ႇလွင်ႈတႃႇတေလႆႈၶႂၢင်ႉၶဝ်ႈႁဵၼ်း ၼႂ်းၸၼ်ႉၸွမ်သေဢမ်ႇၵႃး တႃႇတေလႆႈၵၢၼ်ငၢၼ်း၊ ငိုၼ်းလိူၼ်ၼမ်ဢေႇ၊ တႃႇယူႇသဝ်းၵႂႃႇမိူဝ်းၼႃႈ လႄႈ လိူၵ်ႈၵူႈႁူမ်ႈၸၢတ်ႈပၢၼ်ၸိူဝ်းၼႆႉၵေႃႈ လမ်ႇလွင်ႈပႃး ၼႆယဝ်ႉ။

လိူဝ်ၼၼ်ႉ ပဵၼ်ပၢင်တွပ်ႇလိၵ်ႈ ဢၼ်ၸၢမ်းၼမ်ႉၵတ်ႉ လွင်ႈယိူၼ်ႉၵၼ်ႈ လုၵ်ႈႁဵၼ်းၶဝ်ဢၼ်ၼိုင်ႈ ဝႃႈၼႆ။