ႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉ ၼၢင်းယေႈၶမ်း (ႁွင်ႉ) JK Sophia သၢဝ်ၼမ်ႉၶမ်း ၵေႃႉလႆႈႁပ်ႉၸုမ်ႈၼၢင်းငၢမ်း မိူင်းႁူမ်ႈတုမ် (Miss Grand Myanmar 2025) ဢၼ်ၵႂႃႇၶေႉၶဵင်ႇ Miss Grand International သေပွၵ်ႈၶိုၼ်း ဝၢၼ်ႈၵိူတ်ႇမိူင်းၼွၼ်းၼၼ်ႉဝႄႉၶဝ်ႈပၼ်ႁႅင်းၸုမ်းၵူၼ်းၼုမ်ႇပီႈၼွင်ႉတႆး ပီႈၼွင်ႉၶၢင်တီႈဝဵင်းၵူတ်ႉၶၢႆ။
မိူဝ်ႈဝၼ်းတီႈ 10/11/2025 လိူၼ်ၼူဝ်ႊဝႅမ်ႊပိူဝ်ႊ မၼ်းၼၢင်းႁွတ်ႈၽႅဝ်ဝဵင်းၵူတ်ႉၶၢႆသေ ၵႂႃႇပၼ်ႁႅင်းလုၵ်ႈဢွၼ်ႇတီႈ ႁိူၼ်းပူၵ်းပွင် ၵူၼ်းၼုမ်ႇဢမ်ႇၶႅင်ႁႅင်း (မသန်စွမ်း နှင့် လူငယ်ဖွံ့ဖြိုးရေးဂေဟာ) ဝဵင်းၵူတ်ႉၶၢႆ ။ လဵင်ႉၶဝ်ႈမုၼ်း လႄႈ တၢင်းၵိၼ်ၸိူဝ်းမီးၽွၼ်းလီတႃႇ ၵူၼ်းဢမ်ႇၶႅင်ႁႅင်း၊ လူႇတၢၼ်းယိုၼ်ႈပၼ်ငိုၼ်းၵမ်ႉၸွႆႈတွၼ်ႈတႃႇ ႁိူၼ်းပူၵ်းပွင်ၵူၼ်းၼုမ်ႇ ဢမ်ႇၶႅင်ႁႅင်း ။
ၽွင်းမၼ်းၼၢင်းပွၵ်ႈၶိုၼ်းႁိူၼ်းၼၼ်ႉ မိူဝ်းဝႄႉၶဝ်ႈပၼ်ႁႅင်း ၸိူဝ်းႁၢင်ႈႁႅၼ်းတႃႇၶေႉၶဵင်ႇ ၼၢင်းငၢမ်း Miss Grand Muse ဝဵင်းမူႇၸေႊ သေၸင်ႇသိုပ်ႇဢွၵ်ႇၶၢဝ်းတၢင်း မိူဝ်းတီႈဝၢၼ်ႈၵိူတ်ႇမိူင်းၼွၼ်း (ၸႃႇတိ) မၼ်းၼၢင်း တီႈဝဵင်းၼမ်ႉၶမ်း။
မိူဝ်ႈဝႃး ဝၼ်းတီႈ 13/11/2025 ယၢမ်းဝၢႆးဝၼ်း 2 မူင်း ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းၼမ်ႉၶမ်း ၸတ်းပၢင်ႁပ်ႉတွၼ်ႈမၼ်းၼၢင်း။ မၼ်းၼၢင်းႁူပ်ႉထူပ်း ပီႈၼွင်ႉ၊ ဢူၺ်းၵေႃႉ၊ ၵူၼ်းၼုမ်ႇ လႄႈ ၽူႈယႂ်ႇၵူၼ်းလူင် တီႈပၢင်ႁပ်ႉတွၼ်ႈ။ ၵိၼ်ၶဝ်ႈသွႆး ထူဝ်ႇၽူးဢုၼ်ႇႁူမ်ႈၵၼ်။ ဝၢႆးၼၼ်ႉမၼ်းၼၢင်း မွပ်ႈငိုၼ်းၵွင်ၵၢင် တႃႇၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်း ၼမ်ႉၶမ်း တႃႇ 200 တေႃႊလႃႊ လႆႈႁူႉၼင်ႇၼႆ။
ၼၢင်းယေႈၶမ်း (ႁွင်ႉ) JK Sophia ၼႆႉ ပဵၼ်သၢဝ် ပွၵ်ႉၵွင်းၼွင်ၸၢင်ႉ ဝဵင်းၼမ်ႉၶမ်း မိူင်းတႆးပွတ်းႁွင်ႇ ၵႂႃႇၶဝ်ႈ ႁူမ်ႈၶေႉၶဵင်ႇ Miss Grand Myanmar 2025 တီႈဝဵင်းတႃႈၵုင်ႈသေ လႆႈႁပ်ႉသူးပဵၼ်ၼၢင်းငၢမ်း ထီႉၼိုင်ႈ ၼႂ်းမိူင်းႁူမ်ႈတုမ်ၵူၺ်းဢမ်ႇၵႃး လႆႈသိုပ်ႇၵႂႃႇၶဝ်ႈၶေႉၶဵင်ႇ ၼၢင်းႁၢင်ႈလီ Miss Grand International 2025 တီႈမိူင်းၵွၵ်ႇ ၸိုင်ႈထႆးပႃးထႅင်ႈ။
ၽွင်းမၼ်းၼၢင်းၶဝ်ႈၶေႉၶဵင်ႇ ၼၢင်းႁၢင်ႈလီ တီႈမိူင်းမၢၼ်ႈ၊ မိူင်းထႆးၼၼ်ႉ ၼုင်ႈၶူဝ်းတႆးႁၢင်ႈလီ၊ လၢတ်ႈၵႂၢမ်းတႆး၊ ဢဝ်ပႃးၾိင်ႈထုင်းတႆး လႄႈ ၶဝ်ႈသွႆးတႆး ႁဵတ်းလွင်ႈတူင်ႉၼိုင် (Performance) ၼႄပႃး ႁႂ်ႈပဵၼ်လွင်ႈၸၼ်ၸႂ် ၵူၼ်းတင်းလုမ်ႈၾႃႉ။
JK Sophia ၼႆႉပဵၼ်လုၵ်ႈတႆး-ၶၢင်ၸၢပ်ႈၵၼ်။ မၼ်းၼၢင်းမီးဢႃယု 22 ပီ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ