ဝၢႆးလင်ၶဝ်ႈပိုတ်းယိုဝ်း KK Park ယဝ်ႉဢမ်ႇႁိုင် သိုၵ်းမၢၼ်ႈဢဝ်ၶႅပ်းႁၢင်ႈလႄႈ ႁၢင်ႈတူင်ႉဢၼ်ၶဝ်ပွႆႇမၢၵ်ႇယႃႉႁူင်းၵေႃႇၵၢႆႇၸိူဝ်းၼၼ်ႉတၢင်ႇၶိုၼ်ႈမႃးတၢင်းသိုဝ်ႇၼႅင်ႈသၢၼ် ဢမ်ႇထၢတ်ႇ။

ဝၼ်းတီႈ 12/11/2025 ၼၼ်ႉသိုၵ်းမၢၼ်ႈပိုၼ်ၽၢဝ်ႇဝႃႈ – KK Park ၼႆႉမီး 3 ယွမ်ႇ။ တင်းမူတ်းႁူင်းၵေႃႇၵၢႆႇမီး 635 လင်။ ၼႂ်းၼၼ်ႉ ယႃႉလႅဝ်ႁူင်းၵေႃႇၵၢႆႇၼႂ်း ယွမ်ႇ A ဢၼ်မီးႁူင်းၵေႃႇၵၢႆႇ 148 လင်ၼၼ်ႉ သိုၵ်းမၢၼ်ႈပွႆႇမၢၵ်ႇယႃႉၵူၼ်ႇတႃႇ 110 လင်ယဝ်ႉ- ဝႃႈၼႆ။

ၼင်ႇႁိုဝ် ၵၢၼ်လွၵ်ႇလႅၼ်ၵိၼ်ငိုၼ်းတင်းလုမ်ႈၾႃႉလႄႈလွင်ႈၵေႃႇၵၢၼ်ႁၢႆႉ တေဢမ်ႇၶိုၼ်းႁုၼ်ႈမုၼ်းမီးမႃးၶိုၼ်းၼၼ်ႉ ႁူင်းၵေႃႇၵၢႆႇ ဢၼ်တိုၵ်ႉၵိုတ်းလိူဝ် 525 လင်ၼၼ်ႉၵေႃႈတေသိုပ်ႇယႃႉၵူၼ်ႇလူႉပင်းၵႂႃႇထႅင်ႈ- ဝႃႈၼႆ ။

ၵူၺ်းၵႃႈ ၵူၼ်းၸိူဝ်းပၵ်းတႃပႂ်ႉတူၺ်းတႄႉဢွၼ်ၵၼ်လၢတ်ႈဝႃႈ – ဢၼ်သိုၵ်းမၢၼ်ႈႁဵတ်းၼေယူႇယၢမ်းလဵဝ်ၼႆႉ ပဵၼ်တီႈ KK Park တီႈလဵဝ်ၵူၺ်း ။ ပႆႇၸႂ်ႈဝဵင်းမႂ်ႇသူၺ်ႇၵူၵ်ႉၵူဝ်ႇတင်းမူတ်း။ ၵွပ်ႈၼႆလႄႈ ယင်းပႆႇၸၢင်ႈယုမ်ႇယမ်ဝၢင်းၸႂ်လႆႈဝႃႈ ၸုမ်းၵျႃႊၽျႅၼ်ႉတေဢမ်ႇမီးယဝ်ႉၼႆၼၼ်ႉ။ ပေႃးပဵၼ်တီႈဢၼ်လႆႈၵိၼ်ၸွမ်းၼမ်ႉတူၵ်းၼမ်ႉယွႆႉတႄႉယႃႇဝႃႈတေၽဵဝ်ႈလႃႈ ၶဝ်ယင်းဢဝ်ႁူမ်ႇလူမ်ႈပၼ်လူးၵွၼ်ႇယဝ်ႉ – ဝႃႈၼႆ။

ဢိင်ၼိူဝ်မိူင်းၶႄႇမိပ်ႇငႅၼ်းၸုမ်းယိပ်းၵွင်ႈၵၢင်ႇၸွမ်းလႅၼ်လိၼ်ၶႄႇ ႁႂ်ႈၽဵဝ်ႈမူၺ်ႉၵျႃႊၽျႅၼ်ႉၼႆသေ – ၸုမ်းသိုၵ်းၸၢဝ်းၶိူဝ်းလၢႆလၢႆၸုမ်းၵေႃႈဢွၼ်ၵၼ်ဢဝ်ႁူဝ်ၶေႃႈ ၽဵဝ်ႈမူၺ်ႉၵျႃႊၽျႅၼ်ႉၼႆသေ သၢင်ႈပၢင်တိုၵ်း ပိုတ်းယိုဝ်းသိုၵ်းမၢၼ်ႈ မိူင်းတႆးပွတ်းႁွင်ႇပေႃးလူႉပေႃးႁၢမ်း။ ၵူၺ်းၵႃႈတေႃႇထိုင်ယၢမ်းလဵဝ် ႁိုင်ၼၢၼ်းမႃး ၶၢဝ်းတၢင်း 2-3 ပီယဝ်ႉ ဢမ်ႇၽဵဝ်ႈမူၺ်ႉၵျႃႊၽျႅၼ်ႉလႆႈသေဢမ်ႇၵႃး ၸုမ်းၵျႃႊၽျႅၼ်ႉယင်းပၢႆၼမ်မႃးလိူဝ်ၵဝ်ႇထႅင်ႈလူးၵွၼ်ႇ။

ၵူၼ်းမိူင်းဝဵင်းၼမ်ႉၸၢင်ၸိုင်ႈတႆးပွတ်းၸၢၼ်းၵေႃႉၼိုင်ႈလၢတ်ႈဝႃႈ – ယၢမ်းလဵဝ် ၸုမ်းၵျႃႊၽျႅၼ်ႉ မႃးထိုင်ဝႆႉတၢင်းထုင်ႉပျီႇတူႉၸိတ်ႉ တၢင်းဝဵင်းၼမ်ႉၸၢင်ၼႆႉယဝ်ႉ – ဝႃႈၼႆ။ ၵူၺ်းၵႃႈယူႇတီႈၽူႈတွႆႇႁွၵ်ႈသေ တိုၵ်ႉၸွပ်ႇထၢမ်ႁႃတူၺ်းလွင်ႈၼႆႉယူႇ။

ဢၼ်သိုၵ်းမၢၼ်ႈၶဝ်ႈယိုဝ်းတီႈ KK Park ၼႆႉပဵၼ်ၼႂ်းႁၢင်လိူၼ်ဢွၵ်ႉထူဝ်ႊပိူဝ်ႊ။ ၵူၼ်းႁဵတ်းၵၢၼ်ၼႂ်း KK Park မွၵ်ႈမိုၼ်ႇလႆႈဢွၼ်ၵၼ်ဢွၵ်ႇပၢႆႈ ။ ၵူၼ်းမွၵ်ႈ 4000 ၼႆႉၶၢမ်ႈလႅၼ်လိၼ်ၶဝ်ႈမိူင်းထႆး။