ၸွမ်ၽွင်းလူင်မိူင်းထႆး သင်ႇၵိုတ်း လွင်ႈတေႃႇဢႃယု ဝႂ်ၶႂၢင်ႉယူႇသဝ်းၼႂ်းမိူင်းထႆး ပၼ်တီႈႁႅင်းၵၢၼ် ၵူၼ်းမိူင်း ၵမ်ႊပေႃႊတီႊယိူဝ်ႊ (Cambodia) မွၵ်ႈ 1 သႅၼ်ၵေႃႉ ဝႃႈၼႆ။

မိူဝ်ႈပၢၼ် ၸွမ်ၽွင်းလူင်မိူင်းထႆး ၵေႃႉၵဝ်ႇၼၼ်ႉ လႆႈပိုၼ်ၽၢဝ်ႇပၼ်ၶႂၢင်ႉဝႆႉ ႁႂ်ႈႁႅင်းၵၢၼ် ၵူၼ်းမိူင်း ၵမ်ႊပေႃႊတီႊယိူဝ်ႊ ၸိူဝ်းဝတ်းဝႂ်မူတ်းဢႃယုၼၼ်ႉ သိုပ်ႇယူႇသဝ်းၵႂႃႇလႆႈထႅင်ႈ တီႈၼႂ်းမိူင်းထႆး။ ၵူၺ်းၵႃႈယၢမ်းလဵဝ် ၸွမ်ၽွင်းလူင်ၵေႃႉမႂ်ႇ ပၢၵ်ႈပႅတ်ႈ ၶေႃႈတႅပ်းတတ်းၼၼ်ႉသေ တေၶိုၼ်းမူၼ်ႉမႄးထတ်းသၢင်ၵႂႃႇလီလီ ထႅင်ႈၵမ်းၼိုင်ႈ ဝႃႈၼႆ။

ၼႂ်းပၢင်ၵုမ် ၸုမ်းလူင်ပွင်ၸိုင်ႈ ဢၼ်ၸတ်းႁဵတ်း ၼႂ်းဝၼ်းတီႈ 19 လိူၼ်ဢေႃးၵၢတ်ႉသ် (August) ပူၼ်ႉမႃးၼၼ်ႉ တႅပ်းတတ်းဝႃႈ တေလူတ်းယွၼ်ႇပၼ်ႁႅင်းၵၢၼ် ၵူၼ်းမိူင်း ၵမ်ႊပေႃႊတီႊယိူဝ်ႊ၊ မိူင်းလၢဝ်း၊ မိူင်းႁူမ်ႈတုမ်မၢၼ်ႈ လႄႈ မိူင်းဝႅတ်ႉၼမ်း ၸိူဝ်းဝတ်းဝႂ်မူတ်းဢႃယု သိုပ်ႇယူႇသဝ်းႁဵတ်းၵၢၼ်ၵႂႃႇလႆႈ ၼႂ်းမိူင်းထႆးထႅင်ႈ 1 ပီ၊ ပိူဝ်ႈတႃႇလူတ်းယွမ်းပၼ်ႁႃ လွင်ႈႁႅင်းၵၢၼ်ဢမ်ႇၵုမ်ႇထူၼ်ႈ ဝႃႈၼႆဝႆႉ။

ၵူၺ်းၵႃႈ ၼႂ်းဝူင်ႈၼႆႉ ၸွမ်ၽွင်းလူင်မိူင်းထႆး ဢၼုထိၼ်ႊ ၸီႉသင်ႇၵႂႃႇဝႃႈ ႁႂ်ႈၵူတ်ႇထတ်းဝတ်းဝႂ်ႁႅင်းၵၢၼ်လႄႈ ႁဵတ်းၸွမ်းပၵ်းပိူင်မၢႆမီႈ မီးဝႆႉ။ သင်လူတ်းယွၼ်ႇၵၢၼ်ၵူတ်ႇထတ်း ၸိုင် ၸၢင်ႈမီးပၼ်ႁႃတေႃႇ လွင်ႈႁူမ်ႇလူမ်ႈၼႂ်းဝၼ်းမိူဝ်းၼႃႈ ဝႃႈၼႆ။

လွင်ႈၼႆႉ ၸွင်ႇၵဵဝ်ႇၵွင်ႉၵၼ်တင်း လွင်ႈၵူၼ်းသိုၵ်းထႆး ယဵပ်ႇၺႃးမၢၵ်ႇမႅင်းၾင်လိၼ် ႁိမ်းလႅၼ်လိၼ် မိူင်းထႆး တင်း မိူင်းၵမ်ႊပေႃႊတီႊယိူဝ်ႊ ႁိုဝ်ၼႆတႄႉ ဢမ်ႇလၢတ်ႈဝႆႉတႅတ်ႈတေႃး။ ၽွင်းမိူဝ်ႈတိုၵ်ႉဢဝ်ႁူမ်ႇလူမ်ႈယူႇတီႈလႅၼ်လိၼ်ၼၼ်ႉ ယွၼ်ႉၵႂႃႇယဵပ်ႇၺႃးမၢၵ်ႇမႅင်းၾင်လိၼ်သေ ၵူၼ်းသိုၵ်းထႆး မၢတ်ႇၸဵပ်း 4 ၵေႃႉ၊ တႃႇၵေႃႉၼိုင်ႈ လႆႈမႆႈၸႂ်ႁႅင်းဝႆႉ။
ဝၢႆးလင်ၼၼ်ႉ ၼႂ်းဝၼ်းတီႈ 10/11/2025 ၸွမ်ၽွင်းလူင်မိူင်းထႆး လႆႈပိုၼ်ၽၢဝ်ႇယင်ႉၵိုတ်း လွင်ႈတေပွႆႇပၼ်ၶိုၼ်းၵူၼ်းသိုၵ်း မိူင်းၵမ်ႊပေႃႊတီႊယိူဝ်ႊ ၸိူဝ်းၺႃးတီႉၺွပ်းဝႆႉၼၼ်ႉ ၼႆယဝ်ႉ။