ပီ 2025 ၼႆႉ ၵူၼ်းမိူင်းၸိူဝ်းၽုၵ်ႇသွမ်ႈ ၶဝ်ႈပိူၵ်ႇ၊ ၶဝ်ႈၵၢပ်ႇ ၼႂ်းၸႄႈဝဵင်းသႅၼ်ဝီ ဢမ်ႇလႆႈၵႃႈၶၼ်သုင် ၸွမ်းၼင်ႇယိူင်းဢၢၼ်း ဝႆႉလႄႈ ၸဝ်ႈသူၼ် ႁူပ်ႉတၢင်းယၢပ်ႇၽိုတ်ႇ ။

ၶၢဝ်းၽုၵ်ႇၶဝ်ႈၵၢပ်ႇ ၶၢဝ်းဝၢၼ်ႇၵႃႈ သွမ်ႈၼႃး ယၢမ်းလႆႈသႂ်ႇတိုၼ်းလၢင်းၼၼ်ႉ ၵႃႈၾုၼ်ႇထၢတ်ႈ လႄႈ ၵႃႈၸၢင်ႈႁႅင်းၵူၼ်းသမ်ႉ လႆႈပၼ်ၼမ်သေ ၽွင်းထိုင်ၶိင်ႇၶၢဝ်းဢဝ်ၶၢႆမႃးသမ်ႉ လႆႈၵႃႈၶၼ်ထုၵ်ႇ (ၵႃႈၶၼ်ပေႃး) ၼႆ ၼၢင်းၵျႃႇ ၸဝ်ႈသူၼ်ၶဝ်ႈၵၢပ်ႇ ၼႂ်းၸႄႈဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။

“မိူဝ်ႈၽွင်းႁဝ်းႁဵတ်းၼၼ်ႉ ၵႃႈၾုၼ်ႇထၢတ်ႈ ၼိုင်ႈထူင်ၼႆႉ လႆႈပၼ်ယူႇ 1 သႅၼ်ပျႃးပၢႆ၊ ၵႃႈၸၢင်ႈႁႅင်းၵူၼ်းၼိုင်ႈဝၼ်း 2 မိုၼ်ႇ။ ၵေးလၢင်းၼႃးႁဝ်းတၢင်းမူတ်းၼႆႉ ၼိုင်ႈတူင်ႈ ဢေႇသုတ်းမၼ်း ႁဝ်းလႆႈၸႂ်ႉယူႇမွၵ်ႈ 15 သႅၼ် တေႃႇ 20 သႅၼ်ပျႃး။ ၵမ်းၼႆႉၽိူဝ်ႇထိုင်ၵမ်း ပၢတ်ႇၶဝ်ႈ၊ ပေႃႉၶဝ်ႈမႃးသမ်ႉ ပီၼႆႉ ၾူၼ်ၵေႃႈသမ်ႉၵဝ်း။ ၵမ်ႈၽွင်ႈၼႆႉ ပၢတ်ႇဝႆႉၺႃးၾူၼ် ၼႃႇ ၶဝ်ႈတႄႉလႆႈယူႇၺႃးၶဝ်ႈဝူး (ၶဝ်ႈလူႉ)ၵူၺ်းယဝ်ႉဢိူဝ်ႈ။ ပီၼႆႉပၢႆသလိူဝ်ၶၼ်ၶဝ်ႈဢမ်ႇလႆႈၵႃႈမိူၼ်ပီၵၢႆ သမ်ႉပၢႆမႃးၺႃးၶဝ်ႈဝူးထႅင်ႈၼၼ်ႉၼႃႇ။ ယိုင်ႈၶႅၼ်းႁဵတ်းႁႂ်ႈၶဝ်ႈႁဝ်းဢမ်ႇလႆႈၶၼ်မၼ်းသုင်ၼၼ်ႉၶႃႈၼႃႇ။”

ၶဝ်ႈဢၼ်လီ ဢၼ်ၶႅမ်ႉလိူဝ်ပိူၼ်ႈသုတ်းၼႆႉ ၼိုင်ႈၸေႃးလႆႈယူႇ 3 သႅၼ်ပၢႆၵူၺ်းလႄႈ ၶဝ်ႈၸိူဝ်းဢၼ်ပၢတ်ႇၺႃးၼႂ်းဝၼ်းၾူၼ်တူၵ်း သေ ယမ်းၾူၼ်ၼၼ်ႉ ယိုင်ႈၶႅၼ်းလႆႈဢေႇ ဝႃႈၼႆ။

ၵူၼ်းမိူင်းပိုၼ်ႉတီႈၸိူဝ်းယူႇသဝ်း ၼႂ်းၸႄႈဝဵင်းသႅၼ်ဝီၼႆႉ ၵမ်ႈၼမ်ႁဵတ်းၵၢၼ်ၽုၵ်ႇၶဝ်ႈ လႄႈ ၶဝ်ႈၵၢပ်ႇ ၼမ်သုတ်းသေ သူင်ႇၶၢႆတေႃႇမိူင်းၶႄႇ။ ၸိူဝ်ႉၾၼ်း တင်း ၽုၼ်ႇထၢတ်ႈ လႄႈ ယႃႈယႃၶႃႈမူင်ႈမႅင်းၵူႈသႅၼ်းသႅၼ်းၵေႃႈ ၵမ်ႈၼမ်ၸႂ်ႉတိုဝ်း ၶူဝ်းၶွင် ဢၼ်ၶွမ်ႊပၼီႊၶႄႇႁဵတ်းဢွၵ်ႇ ။

ၼၢင်းဢွင်ႇ ဢႃႇယု 40 ပၢႆ ၸဝ်ႈသူၼ်ၶဝ်ႈၵၢပ်ႇ ၼႂ်းၸႄႈဝဵင်းသႅၼ်ဝီလၢတ်ႈၽူႈတွႆႇႁွၵ်ႈဝႃႈ “ၽုၵ်ႇၶဝ်ႈၵၢပ်ႇၵေႃႈ တူဝ်ထိူၼ်ႇၵဝ်းၼႃႇၶႃႈ ပီၼႆႉ။ ၶၼ်ၶဝ်ႈၵၢပ်ႇၵေႃႈ ဢမ်ႇလႆႈၵႃႈမိူၼ်ပီၵၢႆ” ဝႃႈၼႆ။

ၸႄႈဝဵင်းသႅၼ်ဝီၼႆႉ ယၢမ်းလဵဝ် ပဵၼ်ၸုမ်းသိုၵ်းၵဝ်ႈၵၢင်ႉ (MNDAA) ၵုမ်းၵမ် ပၼ်ႇၵၢၼ်ၽွင်းငမ်းဝႆႉ။ ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈမႃး ၵၢၼ်ၵႃႉၶၢႆ၊ ၵၢၼ်ၽုၵ်ႇသွမ်ႈၵူႈလွင်ႈလွင်ႈ ဢမ်ႇပၼ်ႇလွႆႈလႆႈလီငၢမ်း။ ၼွၵ်ႈလိူဝ်ၼၼ်ႉ ၸုမ်းသိုၵ်းၵဝ်ႈၵၢင်ႉ ၵဵပ်းသိုၵ်းမႂ်ႇ၊ ယွၼ်းၶွၼ်ႇၼႂ်းၵၢၼ်ၵႃႉၶၢႆ၊ ၶွၼ်ႇၵူႈလွင်ႈလွင်ႈယူႇၵူႈလိူၼ်လႄႈ ႁဵတ်း ႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ႁူပ်ႉတၢင်းယၢပ်ႇၵိၼ်းၸႂ် ၼႂ်းၶၵ်ႉၵၢၼ်ႁႃလဵင်ႉၼႃႈႁိူၼ်း ၵူၼ်းမိူင်းသႅၼ်ဝီၶၢင်းပွင်ႉၼင်ႇၼႆ။