သိုၵ်းမၢၼ်ႈလႄႈၸုမ်းပျီႇတူႉၸိတ်ႉႁူမ်ႈၵၼ် ထႅမ်ႁႅင်းသိုၵ်းၶဝ်ႈၵူတ်ႇထတ်း KK Park ႁူင်းတေႃႇလွင်းလႄႈ သုၼ်ၵျႃႊၽႅၼ်ႉ တီႈသူၺ်ႇၵူၵ်ႉၵူဝ်ႇၼၼ်ႉသေ ႁဵတ်းႁႂ်ႈၵူၼ်းႁဵတ်းၵၢၼ် ၼပ်ႉႁူဝ်ႁဵင်ၵေႃႉ (28 ၸိုင်ႈမိူင်းၼႂ်းလုမ်ႈၾႃႉ) ပၢႆႈလိပ်းပၢႆႈတၢႆၵေႃႉႁူးၵေႃႉတၢင်း။
ၵူၼ်းႁဵင်ပၢႆပၢႆႈၶဝ်ႈမိူင်းထႆး ၊ ၼႂ်းၼၼ်ႉပႃးၵူၼ်းမိူင်းမၢၼ်ႈ၊ ၼီႊပေႃႊလ်၊ ဢိၼ်ႊတီႊယႃႊ၊ ၶႄႇ၊ ပင်ႊၵလႃႊၻဵတ်ႉသျ်၊ သီလင်းၵႃ၊ ၾိလိပ်ႉပိၼ်ႊသ်ၸိူဝ်းၼႆႉ ။
ဝၼ်းတီႈ 31/10/2025 ၼႆႉ မိူင်းဢိၼ်ႊတီႊယႃႊ ပိုၼ်ၽၢဝ်ႇပဵၼ်တၢင်းၵၢၼ်ဝႃႈ – တေသူင်ႇႁိူဝ်းမိၼ်ၵႂႃႇႁပ်ႉၵူၼ်းမိူင်းၶဝ် 500 ၵေႃႉ ဢၼ်လုၵ်ႉတီႈ KK Park သေပၢႆႈၶၢမ်ႈလႅၼ်လိၼ်ထႆးၵႂႃႇမီးဝႆႉ တီႈမႄႈသွတ်ႇ မိူင်းထႆး ဝႃႈၼႆ။
လွင်ႈၼႆႉ ၸွမ်ၽွင်းလူင်ၸိုင်ႈထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ ၵေႃႈလၢတ်ႈတီႈသိုဝ်ႇၶၢဝ်ႇထႆးဝႃႈ – လူင်ပွင်ၸိုင်ႈမိူင်းၵြႃး ဢိၼ်ႊတီႊယႃႊ ယွၼ်းတၢင်းၸွႆႈထႅမ်တီႈမိူင်းထႆး ၊ ႁႂ်ႈႁိူဝ်းမိၼ်ၵြႃးမႃးလူင်းတီႈမႄႈသွတ်ႇလႆႈၵမ်းသိုဝ်ႈ။ ယွၼ်ႉဝႃႈဢမ်ႇၶႂ်ႈႁႂ်ႈမိူင်းထႆးလႆႈၼၵ်းၼႃပႃးပၢၼ်ႈယၢပ်ႇၸႂ်ၸွမ်းလႄႈတေမႃးႁပ်ႉႁင်းၵူၺ်း- ၼႆလႄႈ ၼႂ်းဝူင်ႈပူၼ်ႉမႃးလႆႈႁိပ်ႈၼႅတ်ႈၵူတ်ႇထတ်းၵဵပ်းၶေႃႈမုလ်းၵူၼ်းၸိူဝ်းၼၼ်ႉသေ လႆႈတွပ်ႇလၢတ်ႈပၼ်ၶႂၢင်ႉ ဢၼုယၢတ်ႈ တီႈလူင်ပွင်ၸိုင်ႈမိူင်းၵြႃးၶိုၼ်းယဝ်ႉ ဝႃႈၼႆ။
မိူင်းၵြႃး ဢိၼ်ႊတီႊယႃႊၼႆႉ ဢၼ်ၵႂႃႇႁပ်ႉဢဝ်ၵူၼ်းမိူင်းမၼ်းၸိူဝ်းထူပ်းၽေးၵျႃႊၽျႅၼ်ႉ တီႈမိူင်းထႆးၼႆႉ ဢမ်ႇၸႂ်ႈပဵၼ်ပွၵ်ႈဢွၼ်တၢင်းသုတ်း။ မိူဝ်ႈႁူဝ်ပီၼႆႉၵေႃႈ ယၢမ်ႈသူင်ႇႁိူဝ်းမိၼ်ၵႂႃႇႁပ်ႉမႃးယဝ်ႉၵမ်းၼိုင်ႈ။
KK Park ဢၼ်မီးတီႈဝဵင်းမႂ်ႇသူၺ်ႇၵူၵ်ႉၵူဝ်ႇ ၸႄႈဝဵင်းမျႃႉဝတီႇ မိူင်းယၢင်းၽိူၵ်ႇ ႁိမ်းလႅၼ်လိၼ်ထႆးၼႆႉ ၸိုဝ်ႈသဵင်လိုဝ်းလင်လုမ်ႈၾႃႉလူၺ်ႈ ၵၢၼ်လွၵ်ႇလႅၼ်ၵိၼ်ငိုၼ်း ၵျႃႊၽျႅၼ်ႉ ၵူၺ်းဢမ်ႇၵႃး ယင်းမီးၶၢဝ်ႇပႃးဝႃႈ ပဵၼ်ပႃးတီႈသိုဝ်ႉၶၢႆ ယႃႈမဝ်းၵမ်ပဵၼ်တၢင်းၵၢၼ်၊ ပဵၼ်တီႈမီးမႄႈမွၵ်ႇယႃႈပဵၼ်တၢင်းၵၢၼ်၊ ပဵၼ်ၵၢတ်ႇမိုဝ်ႉတီႈသိုဝ်ႉၶၢႆၶိူင်ႈဢၢင်ႇၵႃႇတူဝ်ၶိင်းၵူၼ်း ၸဵမ်ၸိူဝ်းၼႆႉ။ ၸုမ်းပွင်ၵၢၼ်ပၼ်ႇၵၢၼ်ပဵၼ် ၸုမ်းလၢဝ်းပၢၼ်းၶႄႇၵေႃႇၵၢၼ်ႁၢႆႉသေ ဢၼ်တူၺ်းပၼ်လွင်ႈႁူမ်ႇလူမ်ႈသမ်ႉပဵၼ် တပ်ႉပႂ်ႉလႅၼ်လိၼ်ယၢင်းၽိူၵ်ႇ BFG -ၼႆ ၶၢဝ်ႇယႂ်ႇလုမ်ႈၾႃႉ လၢႆလၢႆႁွင်ႈၵၢၼ်ၵေႃႈပိုၼ်ၽၢဝ်ႇဝႆႉၼင်ႇၼႆ။
လွင်ႈၼႆႉၸၢတ်ႈၸိုင်ႈလုမ်ႈၾႃႉ UN ၵေႃႈႁၢႆးငၢၼ်းဝႆႉဝႃႈ – ဝၢႆးလင်တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼႂ်းလုမ်ႈၾႃႉယဝ်ႉ KK Park ၼႆႉ ပဵၼ်တီႈ ၸဝ်ႈငိုၼ်းသႃးၼႂ်းမိူင်းထႆး-မၢၼ်ႈ-လၢဝ်း- ၵမ်ႊပေႃႊတီႊယႃႊ- ၶႄႇ ၶဝ်ႁူမ်ႈၵၼ်တင်ႈသုၼ်တႃႇလွၵ်ႇလႅၼ်ၵိၼ်ငိုၼ်းၵူၼ်းတင်းလုမ်ႈၾႃႉ။ ႁူၺ်းႁွင်ႉ/လွၵ်ႇလႅၼ်/တီႉၺွပ်း ဢဝ်ၼုမ်ႇႁၢႆးၸၢႆးယိင်းလၢႆလၢႆမိူင်းၼႂ်းလုမ်ႈၾႃႉ မႃးတဵၵ်းၸႂ်ႉႁဵတ်းၵၢၼ်လွၵ်ႇလႅၼ်ၵိၼ်ငိုၼ်းပၼ်ၶဝ်။ ၼိုင်ႈပီလွၵ်ႇလႅၼ်လႆႈငိုၼ်းႁူဝ်ႁဵင်လၢၼ်ႉတေႃႊလႃႊ – ဝႃႈၼႆ။
Source: Bangkokpost
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ