ဝၢႆးလင် သိုၵ်းမၢၼ်ႈပိုၼ်ၽၢဝ်ႇႁၢမ်ႈႁႄႉလွင်ႉတေႃႉၶူဝ်းၵုၼ်ႇမိူင်းထႆးမိူင်းၶႄႇၶဝ်ႈမိူင်းတႆးမိူင်းမၢၼ်ႈမႃးၼႆႉ ၶူဝ်းၶွင်ၵိၼ်ယမ်ႉႁႃသိုဝ်ႉယၢပ်ႇ ၵႃႈၶၼ်ယႂ်ႇသုင် ၵူၼ်းမိူင်းဝဵင်းတူၼ်ႈတီး လႆႈၵိၼ်တၢင်းၵိၼ် ဢၼ်မူတ်း ဢႃယု ၵူၼ်းတူၼ်ႈတီးလၢတ်ႈၼင်ႇၼႆ ။

ၶူဝ်းၶွင်ဢၼ်တေၶၢမ်ႈလႅၼ်လိၼ် လႄႈ မႃးတၢင်းၼမ်ႉ ၶဝ်ႈမႃးမိူင်းမၢၼ်ႈမိူင်းတႆး ဢၼ်သိုၵ်းမၢၼ်ႈႁၢမ်ႈ ဝႆႉမိူဝ်ႈၵၢင်လိူၼ်ဢေႃႊၵတ်ႊသ် ၼၼ်ႉတႄႉမီး 35 ယၢင်ႇ လႄႈႁဵတ်းႁႂ်ႈ ၵူၼ်းၵႃႉ- ၸဝ်ႈရူတ်ႉၸဝ်ႈၵႃး  – ၸဝ်ႈႁၢၼ်ႉၶၢႆၶူဝ်းၵုၼ်ႇၸိူဝ်းၼႆႉပဵၼ်ဢၼ်ယၢပ်ႇၽိုတ်ႇ။ တွၼ်ႈတႃႇၵူၼ်းမိူင်းၵေႃႈ တၢင်းၵိၼ် တၢင်းယမ်ႉ လႄႈ ယႃႈယႃ – ဢမ်ႇပဵင်းပေႃး။   

ၶူဝ်းၵိၼ်ဢၼ်မူတ်းဢႃယု (expired date )ၵေႃႈ ၸဝ်ႈႁၢၼ်ႉၵုၼ်ႇ ၶိုၼ်းမႄးတွၵ်ႇ ဝၼ်းတီႈမၼ်းသေ ၶၢႆ။ ၵူၼ်းမိူင်းၵေႃႈဢမ်ႇၸၢင်ႈ ႁဵတ်းႁိုဝ် ၵႃႈလႆႈသိုဝ်ႉၵိၼ် ။

ၼၢင်းယိင်းၵူၼ်းမိူင်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ပေႃးတေသိုဝ်ႉသေမဵဝ်းမဵဝ်းၼႆႉ လႆႈတူၺ်း ဝၼ်းတီႈမၼ်းလီလီ ၊ ၶဝ်ႈမုၼ်းမၢင်ၸိူဝ်းၼႆႉ မွတ်ႈ သႃး ၼဵဝ် ယူႇယဝ်ႉ။ ပေႃးတူၺ်းဝၼ်းမၼ်းသမ်ႉ ပႆႇမူတ်းဢႃယု   ၊  ၶူဝ်းၵုၼ်ႇၶၢတ်ႇလႄႈ လႅပ်ႈတေၶိုၼ်းတွၵ်ႇဝၼ်းတီႈမၼ်းသေၶၢႆၶိုၼ်း။  ပေႃးဢမ်ႇ တူၺ်းသေ သိုဝ်ႉၵိၼ်ၺႃး ၸၢင်ႈတုမ်ႉတိုဝ်ႉပၢႆးယူႇလီ ” – ဝႃႈၼႆ ။

ၶူဝ်းၶွင်ၵိၼ်ယႅမ်ႉၵူၺ်းဢမ်ႇၵႃး ယႃႈယႃၵေႃႈ မူတ်းဢႃယုယဝ်ႉလႄႈ ၵူၼ်းမိူင်းထုၵ်ႇလီၾၢင်ႉ မိူဝ်ႈသိုဝ်ႉၵိၼ် ယႃႈယႃ လႄႈ သင်ဝႃႈမီးပၼ်ႁႃ ပၢႆးယူႇလီၵေႃႈ ႁႂ်ႈသိုဝ်ႉယႃႈယႃ တီႈႁူင်းယႃလူင်ၵူၺ်း- ၵူၼ်းပိုၼ်ႉတီႈလၢတ်ႈ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ မိူဝ်ႈဝႃးမိူဝ်ႈသိုၼ်းၼႆႉ ႁူဝ်ၶႆႈၼႃႇလႄႈ ၵႂႃႇသိုဝ်ႉယႃ တီႈႁၢၼ်ႉၶၢႆၵုၼ်ႇ ၼႂ်းပွၵ်ႉ။  ၽိူဝ်ႇမႃးတူၺ်းဝၼ်းတီႈမၼ်း ဢႃယု သဵင်ႈပေႃးမီး 3 လိူၼ်ပၢႆ ယဝ်ႉ ။ ၵတ်းၵႃႈဢမ်ႇတၼ်းလႆႈၵိၼ် ၊ ယႃႈယႃ ဝႃႇ တၢင်းၵိၼ်တၢင်းယမ်ႉ ဢၼ်ဢႃယု မူတ်းၸိူဝ်းၼႆႉ ပေႃးၵိၼ်ၺႃး ၸၢင်ႈတုမ်ႉတိူဝ်ႉတေႃႇပၢႆးယူႇလီ  ၊ ပေႃးတေသိုဝ်ႉၵိၼ်သင်ၵေႃႈ လူဝ်ႇတူၺ်း ဝၼ်းတီႈမၼ်းလီလီ”- ဝႃႈၼႆ ။

ယၢမ်းလဵဝ် ၶူဝ်းၵုၼ်ႇလႄႈ ယႃႈယႃ ၸိူဝ်းဢႃယုမူတ်းၸိူဝ်းၼႆႉ ၵႆႉႁၼ်ၸဝ်ႈႁၢၼ်ႉၶၢႆၵုၼ်ႇ  မိူၼ်ၼင်ႇ ၸိူဝ်းမီးတၢင်း ဝဵင်းယႂႃႇငၢၼ်ႇ ၊ ဢွင်ႇပၢၼ်း ၊ ႁူဝ်ပူင်း ၊ သီႇသႅင်ႇ ၊ ၼမ်ႉၸၢင်  ၸိူဝ်းၼႆႉ  ။

လႆႈႁူႉဝႃႈ ၸွမ်းသဵၼ်ႈတၢင်းၼႂ်းမိူင်းတႆးပွတ်းႁွင်ႇ မိူင်းတႆးပွတ်းၸၢၼ်း  ဢွင်ႈတီႈမီးသိုၵ်းမၢၼ်ႈ တင်ႈၵဵတ်ႉလၢၼ်ႇပႂ်ႉဝႆႉၼၼ်ႉ ၵူတ်ႇထတ်းရူတ်ႉၵႃး ၵူၼ်းမိူင်း ၸိူဝ်းတေႃႉတၢင်ႇၶူဝ်းၵုၼ်ႇႁၢဝ်ႈႁႅင်း   ။