မိူဝ်ႈဝၼ်းတီႈ 28/10/2025 ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် (UEC) တႂ်ႈသိုၵ်းမၢၼ်ႈၵုမ်းၵမ် ပိုၼ်ၽၢဝ်ႇ သဵၼ်ႈၸိုဝ်ႈၸႄႈဝဵင်း ၸိူဝ်းတေ ၸတ်းႁဵတ်းပၢင်လိူၵ်ႈတင်ႈ တွၼ်ႈ (ၸုပ်ႈ) သွင် တႃႇ 100 ဝဵင်း။
ၼႂ်းၼၼ်ႉမိူင်းတႆးပွတ်းဢွၵ်ႇ 8 ၸႄႈဝဵင်း၊ မိူင်းတႆးပွတ်းၸၢၼ်း 7 ၸႄႈဝဵင်း လႄႈ မိူင်းတႆးပွတ်းႁွင်ႇ 2 ၸႄႈဝဵင်း ႁူမ်ႈသဵၼ်ႈ 17 ၸႄႈဝဵင်း။
ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး တႃႇ 17 ၸႄႈဝဵင်းၼႆႉ ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်းၵၢတ်ႇလေႃႉ၊ ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းၽျၢၵ်ႈ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းတၢင်ႉယၢၼ်း၊ ၸႄႈဝဵင်းမိူင်းယႆ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် လႄႈ ၸႄႈဝဵင်းလၢႆးၶႃႈ ၸဵမ်ၸိူဝ်းၼႆႉ။
ဝၼ်းႁဵတ်းပၢင်လိူၵ်ႈတင်ႈ တွၼ်ႈ (ၸုပ်ႈ) သွင်ၼႆႉ တေၸတ်းႁဵတ်းၼႂ်းဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ 2026 လိူၼ်ၵမ်လွင်ႈ 9 ၶမ်ႈ ဝၼ်းဢႃးတိတ်ႉ ၊ တွၼ်ႈ (ၸုပ်ႈ) ဢွၼ်တၢင်းသုတ်းၼႆႉ တေၸတ်းႁဵတ်းၼႂ်းဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025 ၊ တေၸတ်းႁဵတ်းတႃႇ 12 ၸႄႈဝဵင်း ပဵၼ် – ဝဵင်းပၢင်လႃႈ၊ ႁူဝ်ပူင်း၊ ၼွင်ၶဵဝ်၊ ၵဵင်းတုင်၊ တႃႈၶီႈလဵၵ်း၊ တူၼ်ႈတီး၊ ၼမ်ႉၸၢင်၊ မူႇၸေႊ၊ မိူင်းသၢတ်ႇ၊ လႃႈသဵဝ်ႈ၊ လၢင်းၶိူဝ်း၊ လွႆလႅမ် – ၾၢႆႇၶွမ်ႊမသျိၼ်ပၢင်လိူၵ်ႈတင်ႈ မၵ်းမၼ်ႈဝႆႉ ၼင်ႇၼႆ။
ပၢင်လိူၵ်ႈတင်ႈ ဢၼ်တေတႄႇၸတ်းႁဵတ်း ၼႂ်းႁၢင်ပီ 2025 ၼႆႉ မိၼ်းဢွင်ႇလၢႆႇ တေၸတ်းႁဵတ်းၵႂႃႇ သၢမ်တွၼ်ႈ။ တွၼ်ႈၼိုင်ႈၼႆႉ တေၸတ်းႁဵတ်းတႃႇ 102 ၸႄႈဝဵင်း၊ တွၼ်ႈသွင် တေၸတ်းႁဵတ်းတႃႇ 100 ၸႄႈဝဵင်း၊ ၸႄႈဝဵင်းၸိူဝ်းၵိုတ်းယူႇၼၼ်ႉ တေၸတ်း ႁဵတ်းၵႂႃႇ ၼႂ်းၶၵ်ႉတွၼ်ႈသၢမ်ၼႆ မိၼ်းဢွင်ႇလၢႆႇ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ ၼႂ်းပၢင်ၵႅဝ်ႈ NCA ၶွပ်ႈတဵမ် 10 ပီ။
ပႃႇတီႇၸိူဝ်းတေၶဝ်ႈၸွမ်း ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်းဢွၼ်ၼမ်းၸတ်းၼႆႉ ႁူမ်ႈသဵၼ်ႈမီးယူႇ 57 ပႃႇတီႇ။ တႃႇ 6 ပႃႇတီႇၼႆႉ မီးသုၼ်ႇၶဝ်ႈလိူၵ်ႈတင်ႈလႆႈ ၼႂ်းၸႄႈဝဵင်းတင်းမိူင်းႁူမ်ႈတုမ်ပတ်းပိုၼ်ႉသေ တႃႇ 51 ပႃႇတီႇတႄႉ ၶဝ်ႈလိူၵ်ႈတင်ႈလႆႈ ၼႂ်းၸႄႈတိူင်း လႄႈ ၸႄႈမိူင်းၵူၺ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ