ၸွမ်ၽွင်းလူင် (ၵေႃႉၵဝ်ႇ) မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ထွၼ်တူဝ်ဢွၵ်ႇတၼ်းႁဵင်း ႁူဝ်ပဝ်ႈပႃႇတီႇၽိူဝ်ႉထႆးယဝ်ႉၼႆ – သိုဝ်ႇၶၢဝ်ႇထႆး ႁၢႆးငၢၼ်းၵႂႃႇ ၼႂ်းဝၼ်းတီႈ 22/10/2025 (မိူဝ်ႈၼႆႉ) ၼင်ႇၼႆ။

တီႈၼႂ်းၽိုၼ်လိၵ်ႈ တၢင်ႇယွၼ်းထွၼ်တူဝ်ဢွၵ်ႇတၼ်းႁဵင်းၼၼ်ႉ တႅမ်ႈဝႆႉဝႃႈ – ယိူင်းဢၢၼ်း ႁႂ်ႈပဵၼ် လွင်ႈတႅပ်းတတ်းႁတ်းႁၢၼ် ဢၼ်ႁတ်းယွမ်းႁပ်ႉလႅၵ်ႈလၢႆႈ တွၼ်ႈတႃႇၵူၼ်းမိူင်းထႆး၊ ပိူဝ်ႈတႃႇမိူင်းထႆး သေ  ႁႂ်ႈပဵၼ်လွင်ႈတႄႇၵၢၼ်လႅၵ်ႈလၢႆႈတီႈၼႂ်းပႃႇတီႇ ဝႃႈၼႆ။

မၼ်းၼၢင်းလၢတ်ႈဝႃႈ – ယုမ်ႇယမ်ဝႃႈ ပႃႇတီႇ တေတႄႇႁဵတ်းသၢင်ႈၵၢၼ်လႅၵ်ႈလၢႆႈၵႂႃႇ လူၺ်ႈဝႆးၽႂ်း၊ ၼင်ႇႁိုဝ် ပႃႇတီႇ တေမီးလွင်ႈလွတ်ႈလႅဝ်းသေ ၵေႃႇတင်ႈပဵၼ်ပႃႇတီႇမႂ်ႇ ဢၼ်တဵမ်ထူၼ်ႈၵႂႃႇၼၼ်ႉ  ၸင်ႇလႆႈထွၼ်တူဝ်ဢွၵ်ႇပၼ် တီႈတၼ်းႁဵင်း ပဵၼ်ႁူဝ်ပဝ်ႈ ဝႃႈၼႆ။

မၢၼ်းၼၢင်းထွၼ်တူဝ်ဢွၵ်ႇတၼ်းႁဵင်းၵႂႃႇသေတႃႉ တေသိုပ်ႇၸုၵ်းမၼ်ႈၾၢႆႇၵူၼ်းမိူင်းသေ ၼင်ႇႁိုဝ် တေ သိုပ်ႇႁၢပ်ႇၵၢၼ်ဝၢၼ်ႈမိူင်းၵႂႃႇ လူၺ်ႈမီးၼမ်ႉၵတ်ႉတဵမ်ထူၼ်ႈ၊ ၼင်ႇႁိုဝ်တေၵေႃႇတင်ႈ ပႃႇတီႇ သႅၼ်းႁုၼ်ႈမႂ်ႇမိူင်းထႆးၵႂႃႇလႆႈၼၼ်ႉ တေႁူမ်ႈၵၼ်တင်းသဵင်ႈသေ ႁဵတ်းသၢင်ႈၵႂႃႇ ဝႃႈၼႆ။

ၸွမ်ၽွင်းလူင်(ၵေႃႉၵဝ်ႇ) မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ဢႃယု 39 ပီၼႆႉ ပဵၼ်လုၵ်ႈယိင်း ၽူႈႁဵတ်းၵၢၼ်မိူင်းၸိုဝ်ႈသဵင်ယႂ်ႇမိူင်းထႆး (ၸွမ်ၽွင်းလူင်ၵဝ်ႇ) ထၵ်ႊသိၼ်ႊ သျိၼ်ႊၼဝတ်း ဝၢႆး ၶလိပ်ႉသဵင်ဢုပ်ႇၵၼ်တင်း ၸွမ်းၽွင်းလူင်ၵဝ်ႇ မိူင်းၵမ်ႊပေႃႊတီႊယႃႊ ၽႄႈဢွၵ်ႇမႃးၼႂ်းသိုဝ်ႇတူင်ႇဝူင်းၼၼ်ႉ ထုၵ်ႇၵူတ်ႇထတ်းမၼ်းမၼ်ႈဝႃႈ ႁဵတ်းပူၼ်ႉပႅၼ်ၾိင်ႈတိုဝ်းၵမ် ၸွမ်ၽွင်းလူင် ၼႆသေ ၺႃးလုမ်းတြႃးၸိုင်ႈမိူင်း ပူတ်းဢွၵ်ႇတၼ်းႁဵင်း ၼႂ်းဝၼ်းတီႈ 29/8/2025 ၼႆႉ။