ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈလၢမ်းဢဝ်မၢၵ်ႇၵွင်ႈလူင် ပိုတ်းယိုဝ်း ႁဵတ်းႁႂ်ႈတူၵ်းတိုဝ်ႉ ၵျွင်းမုၼ်ၸဝ်ႈ လူႉၵွႆ တီႈဝၢၼ်ႈၵုင်းပဝ်း ထုင်ႉလွႆလႅမ်ဢွၼ်ႇ ၸႄႈဝဵင်းလွႆၶေႃ လႅၼ်လိၼ်တႆး-ယၢင်းလႅင် ။
ဝၼ်းတီႈ 14/10/2025 ယၢမ်းဝၢႆးဝၼ်း သိုၵ်းမၢၼ်ႈလုၵ်ႉတီႈဝဵင်းလွႆလႅမ်ဢွၼ်ႇသေယိုဝ်း မၢၵ်ႇလူင်တူၵ်းသႂ်ႇ ဝတ်ႉၵျွင်းၵုင်းပဝ်းလူႉၵွႆ ။ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ။
ၵေႃႁူမ်ႈသၢင်ႈၵူၼ်းၼုမ်ႇတႆးဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈၼၼ်ႉပဵၼ်ဝၢၼ်ႈတႆးယူႇဢေႃႈ တၢင်းၼၼ်ႉဢမ်ႇမီးပၢင်တိုၵ်း ၼႂ်းပိုၼ်ႉတီႈၼၼ်ႉၸုမ်းလုၵ်ႉၽိုၼ်ႉၶဝ်ၵႆႉလတ်း ၵႂႃႇမႃး။ တပ်ႉၵွင်ႈလူင်သိုၵ်းမၢၼ်ႈ 530 ဢၼ်ပၵ်းတပ်ႉတီႈၵွင်းလွႆ ႁိမ်းဝဵင်းလွႆလႅမ်ဢွၼ်ႇၵေႃႈ ယိုဝ်းသႂ်ႇ။ သမ်ႉဢမ်ႇတူၵ်းသႂ်ႇတီႈၸုမ်းလုၵ်ႉၽိုၼ်ႉသေ သမ်ႉတူၵ်းသႂ်ႇဝၢၼ်ႈသူၼ်ႁိူၼ်းယေးၵူၼ်းမိူင်း။ ဢၼ်မၢတ်ႇၸဵပ်းလူႉတၢႆၵေႃႈပဵၼ်ၵူၼ်းမိူင်းလွၼ်ႉလွၼ်ႉ” – ဝႃႈၼႆ ။
ဝၢၼ်ႈၵုင်းပဝ်းဢၼ် သိုၵ်းမၢၼ်ႈဢဝ်မၢၵ်ႇလူင်ယိုဝ်းၼၼ်ႉမီးၾၢႆႇႁွင်ႇဝဵင်းလွႆၶေႃ ယၢၼ်ၵႆၵၼ်မွၵ်ႈ 1 ၸူဝ်ႈမူင်း။ ယၢမ်းလဵဝ် ၾူၼ်ႊ – ဢိၼ်ႊတႃႊၼႅတ်ႊၵေႃႈၶၢတ်ႇလႄႈ -ဢမ်ႇၸၢင်ႈတိတ်းတေႃႇၵပ်းသိုပ်ႇၵၼ် ။
သိုၵ်းမၢၼ်ႈၼႆႉ တႃႇၶဝ်တေၸတ်းႁဵတ်းပၢင်လိူၵ်ႈတင်ႈလႆႈၼၼ်ႉ တႄႇၼႂ်းႁူဝ်လိူၼ် ဢွၵ်ႊတူဝ်ႊပိူဝ်ႊ ၼႆႉမႃး တဵၵ်းၸႂ်ႉၵူၼ်းပၢႆႈၽေးသိုၵ်း ၸိူဝ်းမီးယူႇဝႆႉၼႂ်းၸႄႈဝဵင်း ပၢင်လွင်း ၊ သီႇသႅင်ႇ ၊ ယွင်ႁူၺ်ႈ ၸိူဝ်းၼၼ်ႉ ပွၵ်ႈမိူဝ်းႁိူၼ်း ၊ သင်ဢမ်ႇမိူဝ်းၼႆၸိုင် တေယိုတ်းဢဝ်ပႅတ်ႈ ႁိူၼ်းယေးၵူၼ်းမိူင်းၼႆ လွၵ်ႇငိုတ်ႈထႅင်ႈၼင်ႇၼႆ ။
ၼၢင်းယိင်းဢႃယု 40 ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“လိူၼ်ပူၼ်ႉမႃးၼၼ်ႉတႄႉ လၢႆးၵၢၼ် ၸႂ်ႉတိုဝ်း ၶိူင်ႈၸၢၵ်ႈ တႃႇပၼ်ၶႅပ်းၵၢင်ၸႂ်ၼၼ်ႉတႄႉ ၶဝ်ႁဵတ်းပၢင်သွၼ်ၵႂႃႇယဝ်ႉ ၼိုင်ႈႁိူၼ်းၼိုင်ႈၵေႃႉ ဢမ်ႇၵႂႃႇဢမ်ႇလႆႈ ၊ တလဵဝ်ၼႆႉ ၶဝ်ၸႂ်ႉၵူၼ်းပၢႆႈၽေးသိုၵ်းဢၼ်ပႆႇပွၵ်ႈၶိုၼ်းႁိူၼ်းၼၼ်ႉ ႁႂ်ႈမႃးၶိုၼ်း ပေႃးဢမ်ႇမႃးတေယိုတ်းႁိူၼ်းၼႆ ၊ ၵမ်ႈၼမ်တႄႉမႃးၶိုၼ်းယဝ်ႉ ၊ မၢင်ၸိူဝ်းမီးလုၵ်ႈဢွၼ်ႇၶိုၼ်ႈႁဵၼ်းဝႆႉလႄႈ ပႆႇၸၢင်ႈပွၵ်ႈမႃး”- ဝႃႈၼႆ ။
ယၢမ်းလဵဝ် ၵူၼ်းပၢႆႈၽေးသိုၵ်းၼႂ်း ဝၢၼ်ႈပွၵ်ႉပၢင်ၵၢင်း (ပန်ကန်း) ၊ ပွၵ်ႉၶျီႉၵႄႇ (ချိကယ်) ၊ ယႂႃႇတၢၼ်းသျေႇ(ရွာတန်းရှည်) ၊ တေႃးဢူႉၶူႇ (ဒေါဥခူ) ၸိူဝ်းၼၼ်ႉၵေႃႈဢမ်ႇၸၢင်ႈႁဵတ်းႁိုဝ်လႄႈ လႆႈ ပွၵ်ႈယူႇၶိုၼ်းႁိူၼ်းယေးၶိုၼ်းယဝ်ႉလႆႈႁူႉၼင်ႇၼႆ ။
ၵူၼ်းပၢႆႈၽေးသိုၵ်း ဢၼ်ပွၵ်ႈမိူဝ်းယူႇၵမ်ႈၼမ် ယွၼ်ႉႁိူၼ်းယေးၾႆးမႆႈလႄႈ ဢမ်ႇမီးတီႈယူႇတင်းသဝ်း လႆႈၵႂႃႇ ယူႇတီႈၵျွင်းမုၼ်ႇၸဝ်ႈ မိူၼ်ၼင်ႇ ၵျွင်းမုၼ်ၸဝ်ႈ ၵေႃးတမ ၊ ၸိင်ႇတလူင်း ႁူဝ်ၵူၼ်းၼပ်ႉႁူဝ်ပၢၵ်ႇ ဢွၼ်ၵၼ် ႁဵတ်းၵၢၼ် ၵေႃႇသၢင်ႈ ၊ တႃးသီႇႁိူၼ်း ႁဵတ်းၵၢၼ်ႁႃၸဝ်ႉၵိၼ်ၶမ်ႈ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉဝႆႉ- ၵူၼ်းပိုၼ်ႉတီႈလၢတ်ႈ ။
ယွၼ်ႉၽႅၼ်ယၼ်ႇသိုၵ်း 1111 သေ ဝဵင်းလွႆၶေႃ ထိုင်တီႈလူႉလႅဝ်ႁၢမ်းၵႂႃႇသေတႃႉ ယၢမ်းလဵဝ် သိုၵ်းမၢၼ်ႈ ၶဝ်ႈဢဝ်တီႈယူႇဝႆႉၼႂ်းဝဵင်းသေ ၊ တဵၵ်းၸႂ်ႉၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးၽႂ်မၼ်း တႃႇၸတ်းႁဵတ်းပၢင်လိူၵ်ႈတင်ႈဢၼ်တေၸတ်းႁဵတ်းၼႂ်းႁၢင်ပီ 2025 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ