ၼိူဝ်သဵၼ်ႈတၢင်းလူင် ဝဵင်းတူၼ်ႈတီး- လွႆၶေႃ လႅၼ်လိၼ်တႆး- ယၢင်းလႅင် ၼၼ်ႉ သိုၵ်းမၢၼ်ႈ တင်ႈၵဵတ်ႉလၢၼ်ႇ ၸႂ်ႉၶိူင်ႈTablet ထတ်းၵူၼ်းၵႂႃႇမႃးလူၺ်ႈလၢႆး PSMS ၵူၼ်းပၢႆႈၽေးသိုၵ်း ၸိူဝ်းပွၵ်ႈၶိုၼ်းႁိူၼ်းယေး ၵူဝ်ႁႄ ဢမ်ႇမီးလွင်ႈႁူမ်ႇလူမ်ႈ။
သိုၵ်းမၢၼ်ႈ ပိုၼ်ၽၢဝ်ႇ ယိုတ်းဢဝ်လႆႈၶိုၼ်း မိူင်းပၢႆး ၼႂ်းလိူၼ်ၵျူႊလၢႆႊ ပီ 2025 ။ ဝၢႆးၼၼ်ႉႁူမ်ႈၵၼ်တင်းပျီႇတူႉၸိတ်ႉသေ ထႅမ်ႁႅင်းသိုၵ်း တင်ႈၵဵတ်ႉလၢၼ်ႇ ၼိူဝ်သဵၼ်ႈတၢင်းလူင် တူၼ်ႈတီး – လွႆၶေႃ ၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်း ။ ၵဵတ်ႉ/လၢၼ်ႇ တင်းမူတ်းမီးမွၵ်ႈ 20 တီႈ။ မၢင်တီႈ ဢဝ် Tablet လၢႆး PSMS ၵူတ်ႇထတ်းၵူၼ်းၵႂႃႇမႃး ။
ၵူၼ်းပိုၼ်ႉတီႈ ဢၼ်ပၢႆႈၽေးသိုၵ်းသေပွၵ်ႈၶိုၼ်းၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ ၵဵတ်ႉလၢၼ်ႇဢၼ်ဢဝ် Tablet ၵူတ်ႇထတ်းတႄႉမီး 4 ၵဵတ်ႉ ၊ မၢင်ၵဵတ်ႉၶဝ်တေထၢမ်တႂ်ႈထၢမ်ၼိူဝ် ယွၼ်းငိုၼ်း ၊ ပေႃးပဵၼ် ၵူၼ်း ဢွၵ်ႇတၢင်း ၶီႇရူတ်ႉၵႃး တၢင်ႇၵူၼ်းၵႂႃႇမႃးတႄႉ ဢမ်ႇပေႃးၸႅတ်ႈ ၊ ပေႃးဢဝ်ၵႃးႁိူၼ်း ၊ ရူတ်ႉၶိူင်ႈၵႂႃႇမႃးၸိူဝ်းၼႆႉလီၾၢင်ႉ ၊ ပေႃးၸိုဝ်ႈၸဝ်ႈၵဝ်ႇဢမ်ႇပႃးၼႂ်း Tablet ၸၢင်ႈၺႃးၺွပ်း”- ဝႃႈၼႆ ။
လိူဝ်ၼၼ်ႉသိုၵ်းမၢၼ်ႈ ၸႂ်ႉၵူၼ်းပိုၼ်ႉတီႈၸိူဝ်းပၢႆႈၽေးသိုၵ်းႁႂ်ႈပွၵ်ႈမိူဝ်းယူႇၶိုၼ်းႁိူၼ်းၽႂ်မၼ်း ။ ယၢမ်းလဵဝ် သိုၵ်းမၢၼ်ႈ ၵူတ်ႇထတ်းႁၢဝ်ႈႁႅင်း ၊ ၵူၼ်းပၢႆႈၽေးၸိူဝ်းတေပွၵ်ႈမိူဝ်းယူႇၶိုၼ်းႁိူၼ်းၼၼ်ႉ လႆႈယွၼ်း ဝႂ်ႁပ်ႉႁွင်းတီႈၵၢင်ႉၵႄႇၼႂ်းပွၵ်ႉယဝ်ႉ ၸင်ႇၵႂႃႇမႃးလႆႈ – ၼႆယဝ်ႉ ။
ၼၢင်းယိင်းပွၵ်ႈၶိုၼ်းႁိူၼ်းဝဵင်းလွႆၶေႃလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈႁဝ်းပၢႆႈမႃးတႄႉ ၵဵတ်ႉလၢၼ်ႇ ဢမ်ႇပေႃးမီးၼမ် ၊ ၵမ်းၼႆႉတႄႉ ၼမ်ဝႃႈၼမ် ၊ ပေႃးတေပွၵ်ႈမိူဝ်းၼႆႉ တေလႆႈၵႂႃႇယွၼ်း ဝႂ် ႁပ်ႉႁွင်း တီႈၵၢင်ႉၵႄႇတီႈယူႇယဝ်ႉၸွင်ႇမိူဝ်း ၊ ဢွၼ်ၵၼ်ပွၵ်ႈမိူဝ်းၵၼ်ၶိုၼ်းၵမ်ႈၼမ်ယဝ်ႉ ၊ ယူႇတီႈလႂ်ၵေႃႈ ႁႃၵိၼ်လဵင်ႉတွင်ႉယၢပ်ႇၼႃႇ ၊ ပေႃးဢမ်ႇမီးႁိူၼ်းတီႈယူႇၵေႃႈ တေမိူဝ်းယူႇၸွမ်း ၵျွင်းမုၼ်ၸဝ်ႈ ”-ဝႃႈၼႆ ။
ယၢမ်းလဵဝ် ၵူၼ်းဝၢၼ်ႈပွၵ်ႉပၢင်ၵၢင်း (ပန်ကန်း) ၊ ပွၵ်ႉၶျီႉၵႄႇ (ချိကယ်) ၊ ယႂႃႇတၢၼ်းသျေႇ(ရွာတန်းရှည်) ၊ တေႃးဢူႉၶူႇ (ဒေါဥခူ) ၸိူဝ်းပၢႆႈၽေးသိုၵ်းဝႆႉၸိူဝ်းၼၼ်ႉၵေႃႈ သိုၵ်းမၢၼ်ႈၸႂ်ႉ ပွၵ်ႈယူႇၶိုၼ်းႁိူၼ်းယေး ။ ဢွၼ်ၵၼ်ပွၵ်ႈမိူဝ်းယဝ်ႉ ၶိုင်ႈပႃႈၼမ် ၊ ယွၼ်ႉဢမ်ႇမီးတီႈယူႇလႄႈ ၵူၼ်းပၢႆႈၽေးမၢင်ၸိူဝ်း ဢွၼ်ၵၼ် ပၼ်သဵၼ်ႈၸိုဝ်ႈ ၵႂႃႇယူႇတီႈၵျွင်းမုၼ်ၸဝ်ႈ ၸဵင်ႇတလူင်း ( စိန်တလုံး ) ၼႆယဝ်ႉ ။
ပၢင်တိုၵ်း ၽႅၼ်ယၼ်ႇသိုၵ်း 1111 သိုၵ်းယၢင်းလႅင် KNDF- PDF ပိုတ်းယိုဝ်းသိုၵ်းမၢၼ်ႈတီႈ ဝဵင်းလွႆ ၶေႃ ၼႂ်းႁၢင်ပီ 2024 ၼၼ်ႉ ၵူၼ်းမိူင်းၼႂ်းဝဵင်း ပႃးၸဵမ်တၢင်းဝၢၼ်ႈ လႆႈဢွၼ်ၵၼ် ပၢႆႈၽေးသိုၵ်းၵႂႃႇယူႇသဝ်းဝႆႉ ႁိမ်းႁွမ်းဝဵင်းလွႆၶေႃ လႄႈၼႂ်းၸႄႈဝဵင်း ပၢင်လွင်း ၊ သီႇသႅင်ႇ ၊ ယွင်ႁူၺ်ႈ ၼႂ်းၸိုင်ႈတႆးပွတ်းၸၢၼ်း လၢႆလၢႆဝဵင်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ