ဝၢႆးလင် ၻေႃႊၼႄႊလ်ထရမ်ႉ ၸွမ်ၸိုင်ႈမိူင်းဢမႄႊရိၵၼ်ႊ လူတ်းလူင်း ၵၢၼ်ႁပ်ႉသိုဝ်ႉ ႁႄႈလိၼ် လႄႈ ၵၢၼ်ၵႃႉၶၢႆ တေႃႉသူင်ႇၶိူင်ႈၶူဝ်းၵဵဝ်ႇၵပ်းၵၢၼ်ၾႆးၾႃႉ ၵူႈသႅၼ်းသႅၼ်း တီႈမိူင်းၶႄႇယဝ်ႉ ဢမ်ႇႁိုင် မၼ်းၸၢႆးပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ တေတိူဝ်းၵဵပ်းၶွၼ်ႇ ၶူဝ်းၵုၼ်ႇၸိူဝ်းလုၵ်ႉတၢင်းမိူင်းၶႄႇ ၶဝ်ႈ မိူင်းဢမႄႇရိၵၼ်ႊၼမ်လိူဝ် ဢၼ်မၵ်းမၼ်ႈဝႆႉ 30 % ဝႃႈၼႆ။
ၵၢၼ်ၵဵပ်းၶွၼ်ႇလိူဝ် ဢၼ်ၸွမ်ၸိုင်ႈမိူင်းဢမႄႊရိၵၼ်ႊ မၵ်းမၼ်ႈဝႆႉ ႁႂ်ႈၵူႈၸိုင်ႈမိူင်း တႄႇပၼ်ၶွၼ်ႇၵၢၼ်ၵႃႉၶၢႆ ပဵၼ်တၢင်းၵၢၼ် တႄႇၼႂ်းလိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 1 ၵႂႃႇၼႆၼၼ်ႉ ၻေႃႊၼႄႊလ်ထရမ်ႉ ၵဵပ်းၶွၼ်ႇၵၢၼ်ၵႃႉၶၢႆၽိူမ်ႉတီႈမိူင်းၶႄႇ ပဵၼ် 30 %။ ယၢမ်းလဵဝ်တႄႉ ယွၼ်ႉပၼ်ႁႃၵၢၼ်သိုဝ်ႉၶၢႆ ႁႄႈလိၼ်သေ ၾၢႆႇၻေႃႊၼႄႊလ်ထရမ်ႉ လွၵ်ႇငိုတ်ႈဝႃႈ တေသိုပ်ႇၽိူမ်ႉၶွၼ်ႇၵၢၼ်ၵႃႉၶၢႆ တီႈမိူင်းၶႄႇ ပဵၼ် 100 % ဝႃႈၼႆ။
ယွၼ်ႉၸွမ်ၸိုင်ႈမိူင်းဢမႄႊရိၵၼ်ႊ ၻေႃႊၼႄႊလ်ထရမ်ႉ ပိုၼ်ၽၢဝ်ႇဢွၵ်ႇၵႂႃႇၸိူင်ႉၼၼ်လႄႈ တင်းသွင်မိူင်း လႆႈမီးပၼ်ႁႃၵၼ် ၼႂ်းၵၢၼ်ၵႃႉၶၢႆမႃး ၶၢဝ်းတၢင်းလၢႆလိူၼ်သေ ယၢမ်းလဵဝ် ၶၢဝ်ႇပၢင်တိုၵ်းၵၢၼ်ၵႃႉၶၢႆမိူင်းၶႄႇ လႄႈ ဢမႄႊရိၵၼ်ႊ ၸင်ႇလိုဝ်းလင်ပဵၼ် ပၼ်ႁႃၵႂၢင်ႈၶႂၢင်မႃးထႅင်ႈၵမ်းၼိုင်ႈ။
လႆႈႁူႉဝႃႈ ၼွၵ်ႈလိူဝ်ၻေႃႊၼႄႊလ်ထရမ်ႉ တေတိူဝ်းၵဵပ်းၶွၼ်ႇတီႈမိူင်းၶႄႇၽိူမ်ႉယဝ်ႉ တႄႇဝၼ်းတီႈ 1 လိူၼ်ၼူဝ်ႊဝႅမ်ႊပိူဝ်ႊမႃး ၾၢႆႇမိူင်းဢမႄႊ ရိၵၼ်ႊ တေၵုမ်းထိင်း ၵၢၼ်ၵႃႉၶၢႆ သွပ်ႉဝႄးလ်ၸိူဝ်းလမ်ႇလွင်ႈတင်းသဵင်ႈ ဢၼ်တေသူင်ႇၵႂႃႇတီႈမိူင်းၶႄႇၼၼ်ႉထႅင်ႈ ဝႃႈၼႆ။
ဢိင်ၼိူဝ် တင်းသွင်မိူင်းမီးပၼ်ႁႃၵၼ် လွင်ႈၵၢၼ်ၵႃႉၶၢႆၼၼ်ႉသေ ၼႂ်းလွၵ်းၵၢတ်ႇၵႃႉၶၢႆႁႄႈၼႆႉ ႁဵတ်းႁႂ်ႈၵႃႈၶၼ်ႁႄႈလိၼ် လူတ်းလူင်းၵႂႃႇ တေႉတေႉဝႃႈဝႃႈ။
မိူင်းၶႄႇၼႆႉ ႁပ်ႉသိုဝ်ႉႁႄႈလိၼ် ဢၼ်ၸၢင်ႈၶူင်သၢင်ႈႁဵတ်းဢွၵ်ႇ ၶိူင်ႈၵမ်ႉထႅမ် ၼႂ်းၵၢၼ်သိုၵ်း လႄႈ ၶိူင်ႈၸႂ်ႉၶိုတ်းၵၢပ်ႈ ဢီႊလၵ်ႊထရေႃးၼိၵ်ႉၶဝ် ၵူႈသႅၼ်းသႅၼ်း ႁူမ်ႈပႃး ၼႂ်းၶၵ်ႉၵၢၼ်ႁဵတ်းဢွၵ်ႇ ၶႅပ်းသူဝ်ႇလႃႇ (ၶႅပ်းသႅင်လႅတ်ႇ)၊ ၾူၼ်း (မိုဝ်းထိုဝ်) ၸဵမ်ၸိူဝ်းၼႆႉၼၼ်ႉ ၼမ်လိူဝ်ပိူၼ်ႈသုတ်း။
လိူဝ်ၼၼ်ႉ ၵၢၼ်ထတ်းထွင်ဢဝ် ႁႄႈလိၼ် ႁႂ်ႈပေႃးၸႂ်ႉလႆႈၼႂ်းၵၢၼ်ၶူင်သၢင်ႈတင်းသဵင်ႈၼၼ်ႉ ႁဵတ်းဢွၵ်ႇၼႂ်းမိူင်းၶႄႇ တႃႇ 90 % ယဝ်ႉသေ သိုပ်ႇသူင်ႇၶၢႆတေႃႇ ၸိုင်ႈမိူင်းၸိူဝ်းၶိုၼ်ႈယႂ်ႇ ၶိုတ်းၵၢပ်ႈလႄႈ မီးဢႃႇၼႃႇသုင်သုတ်း ၼႂ်းလုမ်ႈၾႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ