ဝၼ်းတီႈ 29/09/2025 ႁူင်းႁဵၼ်းၼႂ်းၵျွင်းၽြႃးဢိတ်ႊသလမ်ႊလင်ၼိုင်ႈ (ဘာသာရေးကျောင်း)လင်ၼိုင်ႈ ဢၼ်မီးတီႈ ဝဵင်းၵျႃႊပႃႊပွတ်းဢွၵ်ႇ မိူင်းဢိၼ်ႊတူဝ်ႊၼီႊသျႃႊ ၵူၼ်ႇပင်း လုၵ်ႈႁဵၼ်းလႄႈၵူၼ်းႁဵတ်းၵၢၼ် လူႉတၢႆမတ်ႇၸဵပ်း တၢင်းၼမ် – ဝႃႈၼႆ။

ယွၼ်ႉၽေးၵိုင်ႉၵၢင်ႉၵမ်းၼႆႉ မီးၵူၼ်းလူႉတၢႆ 3 ၵေႃႉ၊ လႆႈသူင်ႇယူတ်းယႃတူဝ်ဝႆႉတီႈႁူင်းယႃ 99 ၵေႃႉ ၼႂ်းၼၼ်ႉ ၵမ်ႈၽွင်ႈမၢတ်ႇၸဵပ်းႁၢဝ်ႈႁႅင်းဝႆႉလႄႈ ႁူဝ်ၼပ်ႉၵူၼ်းလူႉတၢႆ ၸၢင်ႈၼမ်ၶိုၼ်ႈမႃးထႅင်ႈ – ၽူႈမီးပုၼ်ႈၽွၼ်းၶဝ် လၢတ်ႈၼင်ႇၼႆ။

မိူဝ်ႈၽွင်းတိုၵ်ႉၶႂၢၵ်ႈႁဵတ်းၵၢၼ်ၵေႃႇသၢင်ႈမႂ်ႇထႅင်ႈဢၼ်ၼိုင်ႈယူႇၼၼ်ႉ ႁူင်းႁဵၼ်းၵျွင်းၽြႃးၵူၼ်ႇပင်းလူင်း၊ ၽွင်းၼၼ်ႉ မႅၼ်ႈၶၢဝ်းၵူၼ်းယုမ်ႇယမ်ၸၢဝ်းဢိတ်ႉသလမ်ႊဝႆႈၽြႃး၊ ၵူၼ်းၸိူဝ်းၶမ်ဝႆႉတီႈႁူင်းႁဵၼ်းၵျွင်းၽြႃးၵူၼ်ႇပင်း မီး 38 ၵေႃႉ ၵမ်ႈၼမ်ပဵၼ်ၼုမ်ႇၸၢႆးဢွၼ်ႇ၊ လုၵ်ႈႁဵၼ်း ၸိူဝ်းၵႂႃႇဝႆႈၽြႃးဝႆႉ ဢႃယုမီးၼႂ်းၵႄႈ 12 ထိုင် 17 ပီ ။

ၸုမ်းၾၢႆႇႁႄႉၵင်ႈၽေးသၽႃႇဝ မိူင်းဢိၼ်ႊတူဝ်ႊၼီႊသျႃႊတႄႉလၢတ်ႈဝႃႈ – ၵျွင်းၽြႃးၼႆႉ မီးဝႆႉသွင်ၸၼ်ႉ၊ တိုၵ်ႉၵေႃႇသၢင်ႈသႂ်ႇ ၾၢႆႇၼိူဝ်ထႅင်ႈၸၼ်ႉၼိုင်ႈယူႇ။ ပိုၼ်ႉၶၢမ်ႇၾၢႆႇတႂ်ႈဢမ်ႇမီးႁႅင်း တေႁပ်ႉၶၢမ်ႇၼမ်ႉၼၵ်းၾၢႆႇၼိူဝ်လႆႈလႄႈ ၸင်ႇၵူၼ်ႇပင်းၵႂႃႇ ဝႃႈၼႆ။

ၸုမ်းၾၢႆႇၸွႆႈထႅမ်ၶဝ် ၶတ်းၸႂ်သႂ်ႇႁႅင်းသွၵ်ႈႁႃ ၵူၼ်းၸိူဝ်းတိုၵ်ႉမီးသၢႆၸႂ်ယူႇသေတႃႉ ၼႂ်းဝၼ်းတီႈ 30 ၼႆႉ ယွၼ်ႉၸၢင်ႈမီးလွင်ႈၵူၼ်ႇပင်းထႅင်ႈၼႆလႄႈ လႆႈၵိုတ်းၵၢၼ်ၸွႆႈထႅမ်ဝႆႉၸူဝ်ႈၶၢဝ်း၊ တႃႇတေၸႂ်ႉၶိူင်ႈၸၢၵ်ႈယႂ်ႇလူင်သေ ၵုၺ်ႉပၢၵ်ႈပႅတ်ႈၶႅပ်းမၢၵ်ႇႁိၼ် ၸိူဝ်းၵူၼ်ႇပင်းတဵင်ဝႆႉၼၼ်ႉၵေႃႈ မီးလွင်ႈယၢပ်ႇၽိုတ်ႇဝႆႉ ၼႆယဝ်ႉ။