ၾူၼ်တူၵ်းႁႃႇယႂ်ႇလႄႈ ႁူဝ်ႉဢုတ်ႇ ၵူၼ်ႇပင်းတဵင်သႂ်ႇႁိူၼ်းလင်ၼိုင်ႈ မီးၵူၼ်း လူႉတၢႆ 4 ၵေႃႉ ၼႂ်းၼၼ်ႉပႃး လုၵ်ႈဢွၼ်ႇ 3 ၵေႃႉ တီႈၸႄႈဝဵင်းလႃႈသဵဝ်ႈ။

မိူဝ်ႈဝႃး ဝၼ်းတီႈ 10/6/2023 ယၢမ်းၶိုၼ်းလိုၵ်း 1 မူင်းပၢႆၼၼ်ႉ ၾူၼ်တူၵ်းႁႅင်းလႄႈ ႁဵတ်းႁႂ်ႈ လိၼ်ပိူဝ်ႉလိၼ်ဢူၼ်ႈသေ ႁူဝ်ႉဢုတ်ႇ တီႈသုင် ၵူၼ်ႇပင်းသႂ်ႇ ႁိူၼ်းလင်ၼိုင်ႈ တီႈဝၢၼ်ႈႁၢတ်ႇၵႃ ၸႄႈဝဵင်းလႃႈသဵဝ်ႈ လုၵ်ႈဢွၼ်ႇ 3 ၵေႃႉ လႄႈ ၵေႃႉပဵၼ်မႄႈ လူႉတၢႆထင်တီႈ။

ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၾူၼ်သမ်ႉမႃးႁႅင်းၼႃႇႁေလႄႈ ႁဵတ်းႁႂ်ႈ လိၼ်ပိူဝ်ႉလိၼ်ဢူၼ်ႈသေ ႁူဝ်ႉဢုတ်ႇၵူၼ်ႇဢေႃႈ။ မႅၼ်ႈမိူဝ်ႈပိူၼ်ႈ ၼွၼ်းလပ်းၾၼ်လီဢေႃႈၶိင်ႇၼၼ်ႉ။ မႄႈလုၵ်ႈဢွၼ်ႇလႄႈ လုၵ်ႈဢွၼ်ႇ တင်းသၢမ်ၵေႃႉ တၢႆၶမ်ယူႇတႂ်ႈ ၵွင်လိၼ်ၵွင်ဢုတ်ႇၼၼ်ႉၶႃႈယဝ်ႉ။ ၵေႃႉပဵၼ်ပေႃႈလုၵ်ႈဢွၼ်ႇတႄႉ လိၼ်တဵင်သႂ်ႇဢိတ်းၼိုင်ႈၵူၺ်း။မၼ်းတႄႉ လွတ်ႈတၢႆဢေႃႈ ” – ဝႃႈၼႆ။

လင်ႁိူၼ်းဢၼ်ၺႃး ႁူဝ်ႉဢုတ်ႇ ၵူၼ်ႇပင်းသႂ်ႇၼႆႉ ပဵၼ်ႁိူၼ်း ဢၼ်ဢဝ် ၵင်ႈၽႃလၢႆး မုင်းလဵၵ်း၊  ယူႇဢိူမ်ႈဝႆႉ ႁူဝ်ႉဢုတ်ႇ ဢၼ်ယူႇသုင်လႄႈ ၸင်ႇထူပ်းၽေးၸိူင်ႉၼႆ ၼႆယဝ်ႉ။

ဢိင်ၼိူဝ်လွင်ႈၼႆႉသေ ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ-“ ႁိူၼ်းသမ်ႉ တေႃႉတႄႉ ဢဝ်ၽႃလၢႆးၵင်ႈဝႆႉ ၵူၺ်းၼႃႇ မၼ်းႁိုဝ်ၶၢမ်ႇလႆႈ။သမ်ႉယူႇတႅမ်ႇလိူဝ် ႁူဝ်ႉဢုတ်ႇၼၼ်ႉ ။ပေႃးၾူၼ်မႃးႁႅင်းၵေႃႈ လိၼ်သမ်ႉဢူၼ်ႈၼၼ်ႉၼႃႇ ။ ထိုင်တီႈ ႁူဝ်ႉဢုတ်ႇၵူၼ်ႇပင်းလူင်းၸိူင်ႉၼႆ။ပေႃးမီးၽႂ် ယူႇမိူၼ်ၼႆၵေႃႈ ႁႂ်ႈဢွၼ်ၵၼ်ၾၢင်ႉ ၽွင်ႈဢေႃႈ ၵူဝ်လႆႈ သုမ်းသၢႆၸႂ်ယွၼ်ႉၸိူဝ်းၼႆႉ” – ဝႃႈၼႆ။

ၵူၼ်း 4 ၵေႃႉဢၼ်လူႉတၢႆၵႂႃႇၼႆႉ ပဵၼ် မႄႈလုၵ်ႈၵၼ်သေ လုၵ်ႈဢွၼ်ႇၼႆႉ မီးသႅၼ်းဢႃယု 7 ၶူပ်ႇ ထိုင် 12 ၶူပ်ႇ တင်းသၢမ်ၵေႃႉ ပဵၼ်လုၵ်ႈၵူၼ်းၸၢႆးလွၼ်ႉလွၼ်ႉ ၼႆယဝ်ႉ။

မိူဝ်ႈဝၼ်းတီႈ 6/6/2023 ၼၼ်ႉၵေႃႈ ၾူၼ်တူၵ်းႁႃႇယႂ်ႇ ႁဵတ်းႁႂ်ႈၼမ်ႉႁူၺ်ႈၼမ်ႉလွႆ ယိုင်ႈၼွင်းထူမ်ႈႁိူၼ်းၵူၼ်းမိူင်း ဝၢၼ်ႈႁၢင်ၼႃး ၸႄႈဝဵင်းလႃႈသဵဝ်ႈ  ႁူဝ်ႉဝၢင်း သုမ်ႉသိုင်ႇၸိူဝ်းၼႆႉလူႉၵွႆတင်းၼမ် ။