တႄႇႁူဝ်လိူၼ် ဢွၵ်ႊတူဝ်ႊပိူဝ်ႊၼႆႉမႃး ပလိၵ်ႈမၢၼ်ႈသိုၵ်းမၢၼ်ႈၵူတ်ႇထတ်း ဝတ်းဝႂ်လၢႆႊသိၼ်ႊ ရူတ်ႉၵႃးၶိုၼ်း ႁၢဝ်ႈႁႅင်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၼႂ်းဝၼ်းတီႈ 30/9/2025 ယၢမ်းဝၢႆးဝၼ်း 3 မူင်းပလိၵ်ႈသိုၵ်းမၢၼ်ႈၵိုင်ႉၵၢင်ႉ ၵူတ်ႇထတ်းဝတ်းဝႂ်လၢႆႊသိၼ် ၼိူဝ်သဵၼ်ႈလူင်ၵႂႃႇမႃး ၊ သဵၼ်ႈတၢင်းလဵပ်ႈဝဵင်း ၊ ပွၵ်ႉပႃႇမႆႉ( သစ်တောရပ်ကွက် ) ၊ သဵၼ်ႈတၢင်းၼႂ်း ပွၵ်ႉဝႃးပျႃး (ဝါးပြားလမ်းဆုံ) လႄႈ ႁိမ်းၸမ်ပၢမ်ႉၼမ်ႉမၼ်း ၼီႇလႃႇယူဝ်းမ (နီလာရိုးမ ဓာတ်ဆီဆိုင်) ၸိူဝ်းၼႆႉသေ တီႉၺွပ်း ရူတ်ႉၵႃးၸိူဝ်းဢမ်ႇမီးဝႂ်လၢႆႊသိၼ်ႊ 80 လမ်းပၢႆ ။
ၵူၼ်းၸၢႆးဢႃယု 30 ပီလၢတ်ႈၽူႈတွႆႇႁွၵ်ႈဝႃႈ -“ ရူတ်ႉၵႃးတီႉမူတ်း ၊ ၶဝ်ၼၼ်ႉ ပေႃးၵူၼ်းမိူင်းၸမ်လိုမ်းယဝ်ႉၼႆ ၵႆႉၵိုင်ႉၵၢင်ႉဢွၵ်ႇမႃးၵူတ်ႇထတ်းတီႉၺွပ်းသေ မႂ်ၵိၼ်ငိုၼ်းၼႃႇ ၊ တလဵဝ်ၵေႃႈ ယွၼ်ႉၸမ်ပွႆးႁူင်းၾႆးမိၼ်လႄႈ တီႉၶိုၼ်းထႅင်ႈ ။ မိူဝ်ႈဝႃးရူတ်ႉၵႃးဢၼ်တီႉလႆႈၸိူဝ်းၼၼ်ႉ ပေႃးၸမ်ၸႂ်ၵၼ်တင်းၵူၼ်းၶဝ်ၼႆႉ ၶဝ်ပၼ်ထုတ်ႇဢဝ်ၶိုၼ်းလႆႈယူႇၼႆ ၊ လႆႈပၼ်ၵႃႈႁိုဝ်သေ ဢဝ်ဢွၵ်ႇမႃးၶိုၼ်းတႄႉ ဢမ်ႇလႆႈႁူႉၸွမ်း ”- ဝႃႈၼႆ ။
ၵႃးဢၼ်ပလိၵ်ႈမၢၼ်ႈသိုၵ်းမၢၼ်ႈတီႉၺွပ်းၵႂႃႇမိူဝ်ႈဝႃးၼၼ်ႉ ၵမ်ႈၼမ် ပဵၼ်ၵႃးၵူၼ်းပိုၼ်ႉတီႈ ပဵၼ်သႅၼ်း Toyota ၊ wish ၊ crown ၊ Alphard ၊ Honda ၊ ge6 ၊ gp1 ၊ freed ၊ gk3 လႄႈ hijet ၸဵမ်ၸိူဝ်း ဝႃႈၼႆ ။
ယၢမ်းလဵဝ် ယွၼ်ႉပွႆးႁူင်းၾႆးမိၼ်ၸမ်မႃးလႄႈ ပလိၵ်ႈမၢၼ်ႈသိုၵ်းမၢၼ်ႈၵူတ်ႇထတ်းဝတ်းဝႂ်ႁၢဝ်ႈႁႅင်း ။ ရူတ်ႉၶိူင်ႈၸိူဝ်းဢမ်ႇမီးၶႅပ်းမၢႆရူတ်ႉ ၊ ဢမ်ႇတိုဝ်းမၢၵ်ႇႁူဝ်ရူတ်ႉ လႄႈ ဢမ်ႇမီးမၢၼ်ႇၸမ်ႈ ရူတ်ႉၸိူဝ်းၼႆႉၵေႃႈ ၵူတ်ႇထတ်းတီႉၺွပ်း လႆႈပၼ်ငိုၼ်း ႁႃႈမိုၼ်ထိုင် ၼိုင်ႈသႅၼ်ပျႃး ယဝ်ႉၸင်ႇထုတ်ႇဢဝ်လႆႈၶိုၼ်း ။
ၵူၼ်းပၢႆႈၽေးသိုၵ်းယူႇဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ပေႃးပဵၼ်ၵူၼ်းပၢႆႈၽေးသိုၵ်းၼႆ ၶဝ် ( ပလိၵ်ႈ ) ၶႅၼ်းၶႂ်ႈတီႉယဝ်ႉ ၊ ပေႃးယဝ်ႉမႂ်ၵိၼ်ငိုၼ်း ၊ ပေႃးတီႉလႆႈၼိုင်ႈပွၵ်ႈၵေႃႈ လႆႈပၼ် 3 မိုၼ်ႇထိုင် 5 မိုၼ် မၢင်ၸိူဝ်း လႆႈပၼ် ထိုင် ၼိုင်ႈသႅၼ် ၊ တေၵႂႃႇတေမႃးၵေႃႈယၢပ်ႇၼႃႇ”- ဝႃႈၼႆ ။
လိူၼ်မေႊ ဝၼ်းတီႈ 2 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇမီးမၢႆၾၢင် (လၢႆႊသိၼ်ႊ) ၼႆလႄႈ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလၢမ်းတီႉၺွပ်းရူတ်ႉၵႃးၵူၼ်းမိူင်း ၵူႈတီႈၵူႈဝဵင်း၊ ၼႂ်းမိူင်းတႆးၵေႃႈ မိူၼ်ၼင်ႇဝဵင်းဢွင်ႇပၢၼ်း ၊ တူၼ်ႈတီး ၊ ယွင်ႁူၺ်ႈ ၊ လွၵ်ႉၸွၵ်ႇ ၊ သီႇသႅင်ႇ ၊ ပၢင်လွင်း ၊ ပၢင်လူင် ၊ ၼမ်ႉၸၢင် ၸိူဝ်းၼႆႉၵေႃႈၵူတ်ႇထတ်းႁၢဝ်ႈႁႅင်း ။
သိုၵ်းမၢၼ်ႈပိုၼ်ၽၢဝ်ႇလၢတ်ႈဝႆႉဝႃႈ – ပေႃးဢမ်ႇပႃးလၢႆႊသိၼ်ႊ ရူတ်ႉၶိူင်ႈတေလႆႈပၼ်ငိုၼ်း 3 မိုၼ်ပျႃး ၊ ပေႃးဢမ်ႇမီးလၢႆႊသိၼ်ႊတေမႂ် 1 သႅၼ်ပျႃး လႄႈတူတ်ႈတၢမ်ႇၶွၵ်ႈ 1 လိူၼ် ၊ ပေႃးဢမ်ႇမီး မၢႆရူတ်ႉ တေဢဝ်လိူင်ႈတင်းမၢႆမီႈမတ်ႉတႃ 84(ၵ) ၊ 94 ၊ တူတ်ႈတၢမ်ႇတူၵ်းၶွၵ်ႈ 3 လိူၼ် လႄႈ ငိုၼ်း 3 သႅၼ်ပျႃး ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ