ၼႂ်းပီၼႆႉ ၵူၼ်းမိူင်းၶႄႇ ၸိူဝ်းသိုဝ်ႉႁွင်ႈသဝ်းၶွၼ်ႊတူဝ်ႊ တီႈဝဵင်းၵဵင်းမႂ်ႇ မိူင်းထႆး လူတ်းယွမ်းၵႂႃႇႁႅင်းသေ ၵူၼ်းမိူင်း ႁူမ်ႈတုမ်မၢၼ်ႈ လႄႈ မိူင်းဢမေႊရိၵၼ်ႊ သိုဝ်ႉယူႇသဝ်းၼမ်မႃး ဝႃႈၼႆ။

မိူဝ်ႈၵူႈပွၵ်ႈပူၼ်ႉမႃး ၵူၼ်းမိူင်းၸိူဝ်းသိုဝ်ႉႁွင်ႈၶွၼ်ႊတူဝ်ႊၼမ်လိူဝ်ပိူၼ်ႈ ၼႂ်းဝဵင်းၵဵင်းမႂ်ႇ မိူင်းထႆးၼႆႉ ပဵၼ်ၵူၼ်းမိူင်းၶႄႇ။ ၵူၺ်းၵႃႈယၢမ်းလဵဝ် ၵူၼ်းမိူင်းၶႄႇဢၼ်သိုဝ်ႉၶွၼ်ႊတူဝ်ႊ လူတ်းယွမ်းလူင်းၵႂႃႇႁႅင်းဝႆႉ – သုၼ်ၶေႃႈမုလ်းၾၢႆႇသိုဝ်ႉၶၢႆ ၼင်လိၼ် ႁိူၼ်းယေးၼႂ်းမိူင်းထႆး (REIC) လၢတ်ႈၼင်ႇၼႆ။

ၼႂ်းၶိုင်ႈပီ 2025 ၼႆႉ ၼႂ်းသဵၼ်ႈမၢႆ ၵူၼ်းၼွၵ်ႈမိူင်း သိုဝ်ႉႁွင်ႈၶွၼ်ႊတူဝ်ႊ ၼႂ်းမိူင်းထႆးၼၼ်ႉ ၵူၼ်းမိူင်းၶႄႇ တိုၵ်ႉၼမ်လိူဝ်ပိူၼ်ႈယူႇသေတႃႉ သင်တႅၵ်ႈၵၼ်တင်း မိူဝ်ႈပီၵၢႆၸိုင် ႁႅင်းသိုဝ်ႉယွမ်းလူင်းၵႂႃႇ 33.5% ၼႆယဝ်ႉ။

ၾၢႆႇၼိုင်ႈၵေႃႈ ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းသိုဝ်ႉႁွင်ႈၶွၼ်ႊတူဝ်ႊသမ်ႉ သင်တႅၵ်ႈၵၼ် တင်းမိူဝ်ႈပီၵၢႆ ၸိုင် ၼမ်ၶိုၼ်ႈမႃး 42.9% ပဵၼ်ဢၼ်ၶႅင်ႇၵၼ်တၢင်း ၵူၼ်းမိူင်းဢမေႊရိၵၼ်ႊဝႆႉ။ ၵူၼ်းမိူင်းဢမေႊရိ ၵၼ်ႊ ၸိူဝ်းသိုဝ်ႉႁွင်ႈၶွၼ်ႊတူဝ်ႊ တီႈဝဵင်းၵဵင်းမႂ်ႇၵေႃႈ ၼမ်ၶိုၼ်ႈမႃး 23.8% ၼႆယဝ်ႉ။

ၵႃႈႁွင်ႈသဝ်း ၶွၼ်ႊၻူဝ်ႊ ၼႂ်းမိူင်းထႆး ဝၼ်းမိူဝ်ႈၼႆႉ ပေႃးပဵၼ်ႁွင်ႈၶွၼ်ႊၻူဝ်ႊဢၼ်ၶိုတ်းၵၢပ်ႈၶိုတ်းပၢၼ်သုတ်းၼၼ်ႉ ၽူႈမၢၵ်ႈၵူၼ်းမီးၼႂ်းမိူင်းထႆး လႄႈ မိူင်းဝၼ်းတူၵ်းသူင်ၵၼ်သိုဝ်ႉယူႇၼႂ်းၵႃႈၶၼ် ၼိုင်ႈႁွင်ႈဢမ်ႇယွမ်း 12 လၢၼ်ႉဝၢတ်ႇ (ယူႇၼႂ်းယွမ်ႇသီႊလူမ်ႊ) ဝဵင်းလူင်ၵုင်းထဵပ်ႈ။ ပေႃးပဵၼ်တီႈမိူင်းၵဵင်းမႂ်ႇသမ်ႉ ပေႃးပဵၼ်ႁွင်ႈသဝ်းသႅၼ်းပၢၼ်ၶႅမ်ႉသုတ်းမီးၵႃႈၶၼ် 4 လၢၼ်ႉ။ ဢၼ်ၵူၼ်းမိူင်းမၢၼ်ႈၵႆႉသိုဝ်ႉတႄႉပဵၼ်ႁွင်ႈသဝ်းဢၼ်မီးၵႃႈၶၼ်ၼႂ်းၵႄႈ 7 သႅၼ်တေႃႇ 1 လၢၼ်ႉဝၢတ်ႇ တီႈဝႅပ်ႉသၢႆႉၶၢႆတီႈလိၼ် ႁိူၼ်းယေးလႄႈ ၶွၼ်ႊတူဝ်ႊထႆး တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။

ၵူၼ်းၼွၵ်ႈမိူင်း ၸိူဝ်းၶဝ်ႈသိုဝ်ႉႁွင်ႈၶွၼ်ႊတူဝ်ႊ တီႈၵဵင်းမႂ်ႇၼမ်လိူဝ်ပိူၼ်ႈသုတ်းတႄႉ ပဵၼ်ၵူၼ်းမိူင်း ဢီႇတလီႇ ႁႅင်းသိုဝ်ႉၼမ်ၶိုၼ်ႈထိုင် 200%၊ ၵူၼ်းမိူင်းၻၢတ်ႉၶျ်(Dutch) သမ်ႉမီး 50% သေ ၶဝ်ႈပႃးမႃး ၼႂ်းသဵၼ်ႈမၢႆ 10 မိူင်း ၸိူဝ်းသိုဝ်ႉႁွင်ႈၶွၼ်ႊတူဝ်ႊ ၼႂ်းဝဵင်းၵဵင်းမႂ်ႇ ၼမ်လိူဝ်ပိူၼ်ႈ။

မိူၼ်ၼင်ႇ ၵူၼ်းမိူင်း ဢေႃႊသ်တေႊလီႊယိူဝ်ႊ၊ ဢိတ်ႉသရေႊ လႄႈ မိူင်းၶူဝ်ႊရီႊယိူဝ်ႊၸၢၼ်း ၸိူဝ်းယၢမ်ႈ ၶဝ်ႈပႃး ၼႂ်းသဵၼ်ႈမၢႆႁႅင်းႁပ်ႉသိုဝ်ႉၼမ်လိူဝ်ပိူၼ်ႈမႃး မိူဝ်ႈၵူႈပွၵ်ႈၼၼ်ႉတႄႉ ယၢမ်းလဵဝ် ယွမ်းလူင်းဝႆႉ။

ၸုမ်း REIC လၢတ်ႈဝႃႈ – လွၵ်းၵၢတ်ႇသိုဝ်ႉၶၢႆ ႁွင်ႈၶွၼ်ႊတူဝ်ႊ ၼႂ်းဝဵင်းၵဵင်းမႂ်ႇယၢမ်းလဵဝ် ဢမ်ႇၸႂ်ႈ ယူႇတီႈမိူင်းလဵဝ်သေႁူမ်ႇငမ်းဝႆႉယဝ်ႉ၊ မီးၵူၼ်းမိူင်း လၢႆၸိုင်ႈမိူင်း ၶဝ်ႈသိုဝ်ႉဝႆႉလႄႈ ႁႂ်ႈဢွၼ်ၵၼ် လဵပ်ႈႁဵၼ်းတူၺ်း လွင်ႈလႅၵ်ႈလၢႆႈၼႂ်းလွၵ်းၵၢတ်ႇလီငၢမ်းသေ ႁၢင်ႈႁႅၼ်းႁဵတ်းသၢင်ႈၵႂႃႇ ဝႃႈၼႆ။