ဝၼ်းတီႈ 14/09/2025 ၼႆႉ ၶွမ်ႊမသျိၼ်ႊၵၢၼ်လိူၵ်ႈတင်ႈ (UEC) ပိုၼ်ၽၢဝ်ႇဢွၵ်ႇဝႃႈ တေဢမ်ႇၸတ်းႁဵတ်းပၢင်လိူၵ်ႈတင်ႈ တႃႇ 121 ၸႄႈဝဵင်း ၼႂ်းမိူင်းႁူမ်ႈတုမ်ပတ်းပိုၼ်ႉ။
ၸႄႈဝဵင်းၸိူဝ်းၺႃးၶွမ်ႊမသျိၼ်ႊသိုၵ်းမၢၼ်ႈ ပိုၼ်ၽၢဝ်ႇဢွၵ်ႇၼၼ်ႉ တႃႇၶဵတ်ႇလိူၵ်ႈတင်ႈ လုမ်းၽူႈတႅၼ်းၵူၼ်းမိူင်း 56 ၸႄႈဝဵင်း၊ လုမ်းၽူႈတႅၼ်းၸိူဝ်ႉၸၢတ်ႈ 9 ၸႄႈဝဵင်းလႄႈ လုမ်းၽူႈတႅၼ်း ၸႄႈမိူင်း (ႁိုဝ်) လုမ်းၽူႈတႅၼ်းၸႄႈတိူင်း တႃႇ 56 ၸႄႈဝဵင်း။ ၼႂ်းၼၼ်ႉ ၸႄႈဝဵင်းၼႂ်းမိူင်းတႆး ၸိူဝ်းဢမ်ႇပဵၼ်ၸတ်း ႁဵတ်းပၢင်လိူၵ်ႈတင်ႈ မီးယူႇ 17 ၸႄႈဝဵင်း။
ၸႄႈဝဵင်းၼႂ်းမိူင်းတႆး ၸိူဝ်းဢမ်ႇပဵၼ်ၸတ်းပၢင်လိူၵ်ႈတင်ႈၼႆႉ မီး 17 ၸႄႈဝဵင်း ပဵၼ်ၸႄႈဝဵင်းပၢင်သၢင်း၊ ၼႃးၽၢၼ်း၊ ႁူဝ်ပၢင်ႇ၊ မိူင်းမႂ်ႇ၊ ပၢင်ဝၢႆ၊ ၼမ်ႉသၼ်ႇ၊ မၢၼ်ႈတူင်ႈ၊ ၵုင်းၸၢင်ႉ (ကုန်းကြမ်း)၊ လၢဝ်ႇၵၢႆး၊ ၼမ်ႉတူႈ၊ ၵူတ်ႉၶၢႆ၊ ၼမ်ႉၶမ်း၊ မၢၼ်ႈပဵင်း၊ မိူင်းမိတ်ႈ၊ မိူင်းလႃး၊ ၵုၼ်လူင်၊ သႅၼ်ဝီ ၸဵမ်ၸိူဝ်းၼႆႉ။
သိုၵ်းမၢၼ်ႈ ယိုတ်းမိူင်း တေၸတ်းႁဵတ်းပၢင်လိူၵ်ႈတင်ႈ ၼႂ်းဝၼ်းတီႈ 28/12/2025 တေၸႂ်ႉတိုဝ်းၶိူင်ႈ ၸၢၵ်ႈပဵၼ်တၢင်းၵမ်ႉၸွႆႈသေ ႁႂ်ႈၵူၼ်းမိူင်းပၼ်သဵင်ၵၢင်ၸႂ်ၵႂႃႇ။
ပၢင်လိူၵ်ႈတင်ႈ ဢၼ်တေၸတ်းၼႆႉ တွၼ်ႈတႃႇသၽႃးၵူၼ်းမိူင်း 330 တီႈၼင်ႈၼၼ်ႉ တေၸႂ်ႉပိူင်လၢႆး ၽူႈပေႉၵိၼ်ၶၢတ်ႇ FPTP သေလိူၵ်ႈတင်ႈၵႂႃႇ၊ တွၼ်ႈတႃႇ သၽႃးၸိူဝ်ႉၸၢတ်ႈ (သၽႃးၼိူဝ်) 110 တီႈၼင်ႈသမ်ႉ တေၸႂ်ႉလၢႆးၼပ်ႉသွၼ်ႇၸွမ်းဝၢၵ်ႈ တူဝ်တႅၼ်း MMP သေလိူၵ်ႈတင်ႈ။ ၼႂ်းၼၼ်ႉ တေၶိုၼ်းၸႂ်ႉ လၢႆးၽူႈပေႉၵိၼ်ၶၢတ်ႇ FPTP သေလိူၵ်ႈဢဝ် 84 တီႈၼင်ႈ (84 ၶဵတ်ႇလိူၵ်ႈတင်ႈ/ မဲဆန္ဒနယ်) ၊ တေၸႂ်ႉလၢႆးပိူင်လိူၵ်ႈတင်ႈၸွမ်းပုၼ်ႈသုၼ်ႇ PR သေ လိူၵ်ႈ 26 တီႈၼင်ႈ (26 ၶဵတ်ႇလိူၵ်ႈတင်ႈ/ မဲဆန္ဒနယ်)။
ၸႄႈဝဵင်းၼႂ်းမိူင်းတႆးပွတ်းႁွင်ႇ ၸိူဝ်းၶွမ်ႊမသျိၼ်ႊၵၢၼ်လိူၵ်ႈတင်ႈ တႂ်ႈဢႃႇၼႃႇသိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇဝႃႈ တေဢမ်ႇပဵၼ်ၸတ်းႁဵတ်း ပၢင်လိူၵ်ႈတင်ႈၼႆႉ ပဵၼ်ဝႆႉၸႄႈဝဵင်းၸိူဝ်းၸုမ်းသိုၵ်းၵဝ်ႈၵၢင်ႉ၊ ၸုမ်းသိုၵ်းတဢၢင်းလႄႈ ၸုမ်းသိုၵ်းၶၢင်၊ ၸုမ်းသိုၵ်းရၶႅင်ႇ ၵုမ်းၵမ်ဝႆႉ ဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး။
လိူဝ်ၼၼ်ႉ ၼႂ်းၼႃႈတီႈသိုၵ်းဝႃႉ (UWSA) ၊ တပ်ႉသိုၵ်းမိူင်းလႃး (NDAA/ESS) ၵေႃႈ တေဢမ်ႇမီးၵၢၼ်ၸတ်းပၢင်လိူၵ်ႈတင်ႈ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ