ပၢင်ၼႄၵၢင်ၸႂ် တီႈမိူင်းၼီႇပေႃးၼၼ်ႉ ထိုင်တီႈၸွမ်ၽွင်းလူင် ၵေႇပီႇသျႃႇမႃႇဢူဝ်ႇလီ ထွၼ်တူဝ်ဢွၵ်ႇၵႂႃႇယဝ်ႉသေတႃႉ တိုၵ်ႉသိုပ်ႇပဵၼ်ႁၢဝ်ႈႁႅင်းၼႂ်းမိူင်းထႅင်ႈလၢႆလၢႆတီႈ ၸဵမ်လုမ်းလူင်ပွင်ၸိုင်ႈ၊ သၽႃးလႄႈ ႁိူၼ်းယေးႁူဝ်ၼႃႈၽူႈတူင်ႉၼိုင်ၵၢၼ်မိူင်း ၸိူဝ်းၼၼ်ႉ ၺႃးၾႆးၽဝ်လူႉၵွႆတင်းၼမ်။

ပၢင်ၼႄၵၢင်ၸႂ် တီႈမိူင်းၼီႇပေႃးၼၼ်ႉ ပဵၼ်မႃးယွၼ်ႉလူင်ပွင်ၸိုင်ႈ ပိုၼ်ၽၢဝ်ႇပိၵ်ႉဢိုတ်းပႅတ်ႈ လွင်ႈသိုဝ်ႇတူင်ႇဝူင်းၵူၼ်း Social Media လႄႈ ႁဵတ်းႁႂ်ႈၵူၼ်းမိူင်းၵူၼ်းၼုမ်ႇ ဢမ်ႇ ႁၢၼ်ႉၸႂ်ၼိူဝ် လၢႆးႁဵတ်းသၢင်ႈၸုမ်းလူင်ပွင်ၸိုင်ႈသေ ဢွၼ်ၵၼ်လုၵ်ႉႁိုၼ်ႇၼႄၵၢင်ၸႂ်၊ ၾၢႆႇႁူမ်ႇလူမ်ႈပလိၵ်ႈ ပိုတ်းယိုဝ်းၽဵဝ်ႈမူၺ်ႉၵူၼ်းၼႄၵၢင်ၸႂ် လူႉတၢႆၵႂႃႇမွၵ်ႈ 20 ၵေႃႉ မၢတ်ႇ ၸဵပ်းထႅင်ႈတင်းၼမ်။

ၼႂ်းဝၼ်းတီႈ 8 ပူၼ်ႉမႃးၼႆႉ ၾၢႆႇလူင်ပွင်ၸိုင်ႈ ယုၵ်ႉလိူၵ်ႈၶိုၼ်း လွင်ႈႁႄႉႁၢမ်ႈ ၵၢၼ်ၸႂ်ႉတိုဝ်း သိုဝ်ႇတူင်ႇဝူင်းၵူၼ်းသေတႃႉ လွင်ႈၵူၼ်းမိူင်းၼႄၵၢင်ၸႂ်သၢၼ်ၶတ်းၼႆႉ ဢမ်ႇယွမ်းၵႂႃႇ၊ ႁၢႆႉႁႅင်းမႃးလိူဝ်ၵဝ်ႇသေ ထိုင်တီႈၾႆးၽဝ်ယႃႉပႅတ်ႈ လုမ်းလူင်ပွင်ၸိုင်ႈ။

ၵဵဝ်ႇၵပ်းလွင်ႈၼႆႉသေ ၾၢႆႇတပ်ႉသိုၵ်းမိူင်းၼီႇပေႃးတႄႉ ပိုၼ်ၽၢဝ်ႇဝႆႉဝႃႈ ႁၢင်ႈႁႅၼ်းဝႆႉ တႃႇတေၵုမ်းၵမ်လွင်ႈၼႆႉၵႂႃႇယူႇ။ လိူဝ်ၼၼ်ႉ ၸွမ်သိုၵ်းလူင် ၾၢႆႇတပ်ႉသိုၵ်းၼီႇပေႃး တုၵ်းယွၼ်းႁႂ်ႈၵိုတ်းယင်ႉ လွင်ႈၼႄၵၢင်ၸႂ်သေ ၽူႈမီးပုၼ်ႈၽွၼ်းဢၼ်ၵဵဝ်ႇၶွင်ႈၶဝ် ႁူပ်ႉထူပ်းဢုပ်ႇဢူဝ်းၵႄႈလိတ်ႈၵၼ်ၵႂႃႇ ဝႃႈၼႆ။