ၵၢတ်ႇၵၢင်ၶမ်ႈ ဢၼ်မီးတီႈၼႂ်းပွၵ်ႉ တပိၼ်သူၺ်ႇထီး ( ႁိမ်းႁေႃသဝ်ယၢမ်းမူင်း ) တင်းၼႃႈ City Square Shopping Centre တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ  ယူႇတီႈႁွင်ႈၵၢၼ်ၾၢႆႇလိူမ်ႈလႆႇ ၶၢႆပၼ်တီႈၶွမ်ႊပၼီႊသေ တေဢၢင်းသၢင်ႈ ႁိူၼ်းတိုၵ်းၼႆလႄႈ ၸဝ်ႈႁၢၼ်ႉတၢင်းၵိၼ်ၵူၼ်းပိုၼ်ႉတီႈပဵၼ်ဢၼ်မႆႈၸႂ်  ။ 

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ ၊ သင်ၸိူဝ်ႉဝႃႈ ၸႂ်ႉပိၵ်ႉၼႆ တွၼ်ႈတႃႇ ၵူၼ်းၶၢႆၼႂ်းၵၢတ်ႇ တေယၢပ်ႇၽိုတ်ႇၼႂ်းၵၢၼ်ႁႃၵိၼ်လဵင်ႉတွင်ႉ ၊ ၸၢင်ႈပဵၼ်မိူၼ်ၼင်ႇ ဢမ်ႇမီးၵၢၼ်ၸိူဝ်းၼႆႉ။  ၵူၼ်းၸိူဝ်းတႅၵ်ႈတီႈလိၼ်တႄႉမႃးတႅၵ်ႈၵႂႃႇယဝ်ႉဢေႃႈ ၊ ၵူၺ်း ထိုင်တလဵဝ်ႁွင်ႈၵၢၼ်ၾၢႆႇလိူမ်ႈလႆတႄႉ ပႆႇၸႂ်ႉပိၵ်ႉသင်ၵဝ်ႇၶႃႈ ၊ တိုၵ်ႉၶၢႆဝႆႉယူႇ”- ဝႃႈၼႆ ။

ၼႂ်းၵၢတ်ႇၵၢင်ၶမ်ႈၼၼ်ႉ မီးၸဝ်ႈႁၢၼ်ႉတၢင်းၶၢႆ ၸမ် 500  ။ယၢမ်းၵၢင်ၼႂ်  ၵူၼ်းၵႃႉၵုၼ်ႇလိပ်း ၶၢႆၽၵ်းယိူဝ်ႈၼၢင်းၶဵဝ် သေ ပေႃးၵၢင်ၶမ်ႈသမ်ႉမီးၵူၼ်းမႃးၶၢႆ တၢင်းၵိၼ်ဢၼ်သုၵ်း။   ပဵၼ်ၵၢတ်ႇ ၵိုၼ်းၶွၼ်ႈ တီႈဢၼ်ၵူၼ်းတူၼ်ႈတီးၵႂႃႇလႄႇႁႃသိုဝ်ႉၵိၼ်ၽွင်းယၢမ်း ႁူဝ်ၶမ်ႈတီႈၼိုင်ႈ ဝႃႈၼႆ ။

မိူၼ်ၼင်ႇၼႆၼႂ်းလိူၼ်ဢေႃႊၵၢတ်ႉသ် ႁွင်ႈၵၢၼ်ၾၢႆႇလိူမ်ႈလႆႇ တဵၵ်းၸႂ်ႉ ၵူၼ်းၶၢႆၵၢတ်ႇ ဢၼ်ၶၢႆတီႈႁိမ်းၾင်ႇၼွင် ၼႂ်းပွၵ်ႉၽြႃးၶၢဝ်ၼၼ်ႉ ၶၢႆႉၵႂႃႇၶၢႆ တီႈပႃႇႁဵဝ်ႈ   ၼႂ်းပွၵ်ႉၽြႃးၶၢဝ် ဝႆႉဝႃႈၼႆ ။

“ႁွင်ႈၵၢၼ်ၾၢႆႇလိူမ်ႇလႆႇဢေႃႈ ၸႂ်ႉၶၢႆႉမႃးတင်းၼႆႉ ၊ လုၵ်ႉတီႈၾင်ႇၼွင်သေ လႆႈၶၢႆႉမႃးၶၢႆတီႈပႃႈႁဵဝ်ႈၼႆႉ မီးၸမ်လိူၼ်ယဝ်ႉ ၊ ဢမ်ႇၶၢႆလီၶႃႈ ၵူၼ်းသိုဝ်ႉၵေႃႈဢမ်ႇမီး”- ဝႃႈၼႆ ။

ပၼ်ၶေႃႈဢၢင်ႈ ဝႃႈ ယွၼ်ႉတီႈႁိမ်းၾင်ၼွင်ၼၼ်ႉ  ဢၢၼ်းတေႁဵတ်းသူၼ်မွၵ်ႇ ၊ ပဵၼ်သဵၼ်ႈတၢင်း ၵူၼ်းလူင်သိုၵ်းမၢၼ်ႈၸႂ်ႉၼႆသေ ႁွင်ႈၵၢၼ်ၾၢႆႇလိူမ်ႈလႆႇ ၸႂ်ႉၵူၼ်းၶၢႆၵၢတ်ႇ ၶၢႆႉၵႂႃႇၸႂ်ႉၶၢႆႉၵႂႃႇတီႈပႃႇႁဵဝ်ႈ ႁဵတ်းႁႂ်ႈ ၵူၼ်းၶၢႆၵၢတ်ႇႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်ဝႃႈၼႆ ။

“တႃႇတေလႆႈဢွင်ႈတီႈၶၢႆၵၢတ်ႇၼိုင်ႈတီႈၵေႃႈဢမ်ႇငၢႆႈ ၊ လႆႈပၼ်ငိုၼ်းဢွင်ႈတီႈယဝ်ႉသိုဝ်ႉထႅင်ႈ ၊ ယဝ်ႉၵေႃႈ ႁွင်ႈၵၢၼ်ၾၢႆႇလိူမ်ႈလႆႇမႃးၵဵပ်းငိုၼ်းၵေႃႈလႆႈပၼ်ထႅင်ႈ ၊ ဢမ်ႇၸႂ်ႈဝႃႈ လႆႈၼမ်ႉတွၼ်းလႄႈၶၢႆ တႃႇယူႇလွတ်ႈၵႂႃႇ ပေႃးၵိၼ်ဝၼ်းလႂ်ဝၼ်းၼၼ်ႉၵူၺ်း ၊ ယဝ်ႉၵေႃႈၵူၼ်းၵႆႉမႃးသိုဝ်ႉ(ဖောက်သည်)  ၵေႃႈလူႉ ၊ ၵႂႃႇမႃးယၢပ်ႇၽိုတ်ႇ ၊ ယွၼ်ႉလႆႈၶၢႆတီႈ ပႃႇႁဵဝ်ႈ ဢမ်ႇမီးၵူၼ်းသိုဝ်ႉၶႃႈ ၵူၼ်းၵႂႃႇမႃးၵေႃႈ ဢမ်ႇမီး ယၢပ်ႇၸႂ်ဢေႃႈ ”- ဝႃႈၼႆ ။

တီႈပႃႇႁဵဝ်ႈၼႂ်းပွၵ်ႉ ၽြႃးၶၢဝ် ဢၼ်ၵူၼ်းမိူင်းလႆႈၶၢႆယူႇယၢမ်းလဵဝ်ၼႆႉ ဢမ်ႇၸႂ်ႈပႃႇႁဵဝ်ႈၵဝ်ႇ။  ပဵၼ်ပႃႇႁဵဝ်ႈမႂ်ႇ ၵူၼ်းပိုၼ်ႉတီႈ တိုၵ်ႉၸႂ်ႉ တိုၵ်ႉမႃးၽဝ်သၢင်းၵဵဝ်ႇၵူၼ်းတၢႆယူႇလႄႈ  ယူႇလၢႆလၢႆ ဢမ်ႇမီးၽႂ်ႁတ်းၵႂႃႇမႃး။  ၵွပ်ႈၼႆ ၵူၼ်းဢၼ်လႆႈၵႂႃႇၶၢႆၶူဝ်းတီႈပႃႇႁဵဝ်ႈၼၼ်ႉၵေႃႈ ပဵၼ်ဢၼ်ယၢပ်ႇၽိုတ်ႇၵိၼ်းၸႂ် ဝႃႈၼႆ ။

တီႈဝဵင်းတူၼ်ႈတီးၼႆႉ ယၢမ်းလဵဝ် မီးၵၢတ်ႇၵၢင်ၶမ်ႈဝႆႉ 3 တီႈ ။ ပဵၼ်တီႈၵၢတ်ႇမဵဝ်ႉမ( ႁိမ်းႁေႃသဝ်ယၢမ်းမူင်း ) ၊ ၵၢတ်ႇၵၢင်ၶမ်ႈ တၢင်းၼႃႈ ႁူင်းႁဵၼ်း ၸၼ်ႉသုင်မၢႆ 3  လႄႈ ၵၢတ်ႇမႂ်ႇဢၼ်တိုၵ်ႉပိုတ်ႇဝႆႉတင်းၼႃႈ  ယေးငိုၼ်းၵမ်ႇပေႃးၸ ၼၼ်ႉ  ။