သိုၵ်းဝႃႉ (UWSA) လၢတ်ႈဝႃႈ သင်မီးၵၢၼ်သူၼ်းတုမ်တႃႇပၢင်လိူၵ်ႈတင်ႈ တွတ်ႈၶႅပ်းၵၢင်ၸႂ် ၼႂ်းၸႄႈဝဵင်းႁူဝ်ပၢင်ႇၼႆႉ တိုၼ်းတေလႆႈတိူင်ႇလၢတ်ႈတီႈႁွင်ႈၵၢၼ် ၾၢႆႇတႅပ်းတတ်းတြႃး (တရားစီရင်ရေးဌာန) ၶဝ် ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 04/0/2025 ၼၼ်ႉ သိုၵ်းဝႃႉ UWSA ၸတ်းႁဵတ်းႁူပ်ႉထူပ်းၵူၼ်းမိူင်း တီႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ၼႂ်းၼႃႈတီႈၶဝ်ၵုမ်းၵမ် ပၼ်ပိုၼ်းႁူႉ ၵဵဝ်ႇလူၺ်ႈလွင်ႈတမ်းဝၢင်းပၵ်းပိူင်မၢႆမီႈ ၸိူဝ်းၼၼ်ႉသေ မွၵ်ႇလၢတ်ႈပႃးၵူၼ်းမိူင်းဝႃႈ တေဢမ်ႇလႆႈဢဝ် လွင်ႈတၢင်းပၢင်လိူၵ်ႈတင်ႈသေ ၶွၼ်ႈတုမ်ၵူၼ်း၊ တေဢမ်ႇလႆႈပၼ်ငိုၼ်းၵူၼ်းမိူင်းသေ သူၼ်းတုမ်တႃႇတွတ်ႈၶႅပ်းၵၢင်ၸႂ်။ ယဝ်ႉၵေႃႈ ဢမ်ႇပၼ်ၶႂၢင်ႉတႃႇတင်ႈႁူင်းတွတ်ႈၶႅပ်းၵၢင်ၸႂ်၊ တႃႇသူၼ်းတုမ်ႁႃသဵင်လႄႈ လိူၵ်ႈႁႃၵူၼ်း တႃႇၽွင်းငမ်းဝဵင်းႁူဝ်ပၢင်ႇၼႆႉၵေႃႈ ထုၵ်ႇႁၢမ်ႈဝႆႉ – ၵူၼ်းပိုၼ်ႉတီႈ ဝဵင်းႁူဝ်ပၢင်ႇ လၢတ်ႈၼႄၼင်ႇၼႆ။
“ၾၢႆႇၽွင်းငမ်းဝဵင်းႁူဝ်ပၢင်ႇ ၵေႃႉၵဝ်ႇၼႆႉ ယွၼ်ႉလိူင်ႈဢမူႉၶတီး လွင်ႈၵၼ်ႉၸၼ်လူလၢႆၼၢင်းယိင်း 4 ၵေႃႉ ၼႂ်းၼၼ်ႉ ၵမ်ႈၽွင်ႈပဵၼ်လုၵ်ႈ ဢွၼ်ႇဝႆႉထႅင်ႈ။ ယွၼ်ႉၼၼ် ၼႂ်းဝၼ်းတီႈ 16/08/2025 ၼၼ်ႉ ၸုမ်းသိုၵ်းဝႃႉ UWSA ၸင်ႇပူတ်းၸၼ်ႉၵၢၼ်သေ ပၼ်တၢမ်ႇႁႂ်ႈသၢႆႈတႅၼ်းငိုၼ်းၶႄႇ 3 သႅၼ်ယႂၼ်ႊလႄႈ တၢမ်ႇၶွၵ်ႈ 10 ပီ တေႃႇၼႃႈ ၵူၼ်းမိူင်းတင်းၼမ်။ ယၢမ်းလဵဝ် ၵူၼ်းဢၼ်တေမႃးႁပ်ႉပုၼ်ႈၽွၼ်း ၽွင်းငမ်းၸႄႈဝဵင်းၵႂႃႇတႄႉပႆႇ ႁၼ်ပိုၼ်ၽၢဝ်ႇသင်ဝႆႉ”။
ဝဵင်းႁူဝ်ပၢင်ႇၼႆႉ တင်ႈတႄႇၽႅၼ်ၵၢၼ်ယၢၼ်ႇသိုၵ်း 1027 ပွၵ်ႈၵမ်းၼိုင်ႈၼၼ်ႉမႃး ၸုမ်းဢူၺ်းလီသၢမ်ၸုမ်း တိုၵ်းယိုတ်းဢဝ်လႆႈသေ ထိုင်မႃးဝၼ်းတီႈ 05/01/2024 ၼႆႉ ၸင်ႇယုၵ်ႉပၼ်ၸုမ်းသိုၵ်းဝႃႉ UWSA ၽွင်းငမ်းၵႂႃႇ။
ၽူႈထတ်းသၢင်ၵၢၼ်မိူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၼႃႈတီႈ ၸုမ်းသိုၵ်းဝႃႉ UWSA ၵုမ်းၵမ်ၼႆႉ ၾၢႆႇသိုၵ်းၶဝ် ပၵ်းတပ်ႉၸတ်းၵၢၼ်ၽွင်းငမ်းဝႆႉႁင်းၶေႃသေ ဢမ်ႇတွၼ်ႉၶဝ်ႈႁူမ်ႈပၢင် လိူၵ်ႈတင်ႈမႃးသေပွၵ်ႈ။ လိူဝ်ၼၼ်ႉ ၸုမ်းပႃႇတီႇၵၢၼ်မိူင်းၸၢဝ်းၶိူဝ်းဝႃႉၵေႃႈ ဢမ်ႇလႆႈလိူၵ်ႈတင်ႈ ၼႂ်းၼႃႈတီႈ သိုၵ်းဝႃႉၵုမ်းၵမ်။ မိူၼ်ၼင်ႇ ၼႂ်းၼႃႈတီႈၵုမ်းၵမ် ၸိူဝ်းၼႆႉတႄႉ ဢမ်ႇတွၼ်ႉယၢမ်ႈၶဝ်ႈႁူမ်ႈၸွမ်း ပၢင်လိူၵ်ႈတင်ႈမိူင်းမၢၼ်ႈသေပွၵ်ႈၵူၺ်းဢမ်ႇၵႃး ၸႂ်ႉလွၵ်းလၢႆးလိင်ႉလၢႆလၢႆလၢႆးသေ လွတ်ႈၵၢတ်ႈမႃးတႃႇသေႇ”- ဝႃႈၼႆ။
မိူၼ်ၼႆၼင်ႇၵဝ်ႇ မိူဝ်ႈႁူဝ်လိူၼ်ဢေႃႊၵတ်ႊ ပီ 2025 ၼၼ်ႉၵေႃႈ ၸွမ်ၽွင်းလူင်မိူင်းတႆး ဢၼ်ယူႇတႂ်ႈ ၸုမ်းသိုၵ်းမၢၼ်ႈ ၵႂႃႇႁူပ်ႉထူပ်းၽူႈယႂ်ႇၵူၼ်းလူင် ၼႂ်းၼႃႈတီႈ ၸုမ်းသိုၵ်းဝႃႉတင်း ၸုမ်းသိုၵ်းမိူင်းလႃး တႃႇၸတ်းပၢင်လိူၵ်ႈတင်ႈၼႆသေတႃႉ ၵူၺ်းၵႃႈ ပၢင်ႁူပ်ႉထူပ်းဢမ်ႇဢွင်ႇမၢၼ်လႄႈ ၸင်ႇပွႆႇၶၢဝ်ႇလိုဝ်းဝႃႈ လူင်းပိုၼ်ႉတီႈ ဢုပ်ႇၵုမ်တႃႇၵၢၼ်ပူၵ်းပွင်ၼႂ်းပိုၼ်ႉတီႈၵူၺ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ