မိူဝ်ႈဝႃး ဝၼ်းတီႈ 04/09/2025 ယၢမ်းၵၢင်ဝၼ်း 12 မူင်းပၢႆၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇတီႈဝၢၼ်ႈပၢင်သပေႇ 4 လုၵ်ႈ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁဵတ်းႁႂ်ႈထဝ်ႈယိင်း ဢႃယု 60 ပၢႆ ၵေႃႉၼိုင်ႈ မၢတ်ႇၸဵပ်းပႃး။
ယူႇတီႈ ၸုမ်းၼၢင်းယိင်း ၸၢဝ်းၶိူဝ်းတဢၢင်း Ta’ang Women’s Organization တႅမ်ႈတၢင်ႇဝႆႉဝႃႈ -“ယွၼ်ႉသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇသေ ၸၢၵ်ႇမၢၵ်ႇတိူဝ်ႉၺႃးထဝ်ႈယိင်းဢႃယု 62 ပီ ၵေႃႉၼိုင်ႈ လႆႈမၢတ်ႇၸဵပ်းတီႈတွင်ႉလႄႈ ၵွင်းလင်။ လိူဝ်ၼၼ်ႉ ႁိူၼ်းယေးၵူၼ်းဝၢၼ်ႈၵေႃႈ ၺႃးၸၢၵ်ႇမၢၵ်ႇလူႉၵွႆၵႂႃႇ 5 လင်၊ ၵွင်းမူးၸိူဝ်းၼႆႉၵေႃႈ လူႉၵွႆၵႂႃႇတင်း ၼမ်”- ဝႃႈၼႆ။
ၼႂ်းဝၼ်းတီႈ 4 ၼႆႉၵူၺ်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ တီႈဝတ်ႉဝၢၼ်ႈပၢင်ၵွၼ် ဢၼ်ယၢၼ်ၵႆတၢင်းဝၢၼ်ႈသပေႇမွၵ်ႈ 6 လၵ်းၼၼ်ႉထႅင်ႈ။ ဢွင်ႈတီႈၼၼ်ႈၵေႃႈ မၢၵ်ႇတူၵ်းသႂ်ႇၵွင်းမူးလူႉၵွႆၵႂႃႇထႅင်ႈ တင်းၼမ် ၼႆယဝ်ႉ။
ပူၼ်ႉမႃး မိူဝ်ႈႁၢင်လိူၼ်ဢေႃႊၵတ်ႊသ် ပီ 2025 ၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ တီႈဝၢၼ်ႈပၢင်သပေႇသေ ၸဝ်ႈၶၢဝ်ပႃးၼိုင်ႈလႆႈလူႉလွၼ်ႇၵႂႃႇလႄႈ ၼၢင်းယိင်း 2 ၵေႃႉ လႆႈလူႉတၢႆပႃး။ ၵူၼ်းမိူင်း ဢၼ်တိူဝ်ႉၺႃးၸၢၵ်ႇမၢၵ်ႇသေ လႆႈမၢတ်ႇၸဵပ်းၵႂႃႇမီး 6 ၵေႃႉယဝ်ႉ ဝႃႈၼႆ။
ႁွင်ႈၵၢၼ် ပိုၼ်ၽၢဝ်ႇ ၾၢႆႇတပ်ႉသိုၵ်းတဢၢင်း TNLA ၵေႃႈ ပိုၼ်ၽၢဝ်ႇဝႆႉ ၼႂ်းဝၼ်းတီႈ 01/09/2025 ၼၼ်ႉဝႃႈ – ၼႂ်းလိူၼ်ဢေႃႊၵတ်ႊသ် ပီ 2025 ၼၼ်ႉ လိူၼ်လဵဝ်ၵူၺ်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်း ၸႄႈဝဵင်းၵျွၵ်ႉမႄး၊ မိူင်းငေႃႉ၊ သီႇပေႃႉ၊ မိူင်းလူင် ၸိူဝ်းၼႆႉသေ ႁဵတ်းႁႂ်ႈမၢၵ်ႇတူၵ်း တိူဝ်ႉၺႃးၵူၼ်းမိူင်းလႆႈ လူႉတၢႆၵႂႃႇ 46 ၵေႃႉ၊ ဢၼ်မၢတ်ႇ ၸဵပ်းသမ်ႉ မီးထိုင် 55 ၵေႃႉ။ လိူဝ်ၼၼ်ႉ ႁိူၼ်းယေးၵူၼ်းမိူင်းၺႃးၸၢၵ်ႇမၢၵ်ႇလူႉၵွႆၵႂႃႇ ဢမ်ႇယွမ်း 100 လင်၊ ၵူၼ်းမိူင်းဢၼ်လႆႈပၢႆႈယၢၼ်ႁိူၼ်းယေး မီးၼပ်ႉႁူဝ်ႁဵင် တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ် – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ