ၾၢႆႇလၢမ်းၶၢတ်ႈၾိင်ႈၾႃႉရႃႇသီႇ မိူင်းထႆးပိုၼ်ၽၢဝ်ႇဝႃႈ လူမ်းလႅင်ႉၼွင်ၾႃႉ လုၵ်ႉတၢင်းၼမ်ႉပၢင်ႇလၢႆႇ ဢၼ်ႊၻႃႊမၼ်ႊ ၶိုၼ်ႈမႃးၼၼ်ႉ တေထိုင်မိူင်းမၢၼ်ႈတွၼ်ႈတႂ်ႈလႄႈ မိူင်းထႆးတွၼ်ႈၼိူဝ်၊ တွၼ်ႈၵၢင် ၼႂ်းဝၼ်းတီႈ 31/08/2025 တေႃႇထိုင် ဝၼ်းတီႈ 02/09/2025 ။

ၵွပ်ႈၼႆ ၵူၼ်းမိူင်းမၢၼ်ႈတွၼ်ႈတႂ်ႈ ၼႂ်းတိူင်းတၼၢဝ်းသီ၊ မိူင်းယၢင်း၊ မိူင်းမွၼ်း၊ မိူင်းယၢင်းလႅင်လႄႈ တိူင်းပႃႇၵိူဝ်၊ တႃႈၵုင်ႈ၊ တိူင်းၼမ်ႉၵဵဝ် ၸိူဝ်းၼႆႉ ၸၢင်ႈထူပ်းၾူၼ်လူင်လူမ်းလႅင်ႉၵမ်းသိုဝ်ႈ။ ၼွၵ်ႈလိူဝ်ၼၼ်ႉ ၼႂ်းမိူင်းထႆးသမ်ႉ မိူၼ်ၼင်ႇ ၸႄႈတွၼ်ႈလမ်းပၢင်း၊ သုၶူဝ်ထႆး၊ ၵမ်ႊၽႅင်ႊၽဵတ်ႊ၊ လမ်းပုၼ်း၊ ၵဵင်းမႂ်ႇ၊ တၢၵ်ႇလႄႈ မႄႈႁွင်ႈသွၼ် ၸိူဝ်းၼႆႉၵေႃႈ ၾူၼ်လူမ်းတေတူၵ်းႁႅင်း။ ၵူၼ်းမိူင်းၸိူဝ်းယူႇၸွမ်းတူၼ်းႁၢဝ်းသၼ်လွႆလႄႈ ၼႂ်းႁူၺ်ႈ၊ တၢပ်ႈလွႆ ၸိူဝ်းၼႆႉ ႁႂ်ႈၾၢင်ႉၽေးၼမ်ႉႁူၺ်ႈၼမ်ႉလွႆလႄႈ လိၼ်လွႆၵူၼ်ႇ ၸိူဝ်းၼႆႉ ဝႃႈၼႆ။

ယွၼ်ႉလူမ်းလႅင်ႉၼွင်ၾႃႉၼႆသေ ပၢင်ႇလၢႆႇဢၼ်ႊၻႃႊမၼ်ႊလႄႈ ဢၢဝ်ႇထႆးၵေႃႈ ၸၢင်ႈမီးႁွၼ်ၼမ်ႉသုင်ထိုင် 3 မဵတ်ႉ(မီႊတိူဝ်ႊ)။ ၵွပ်ႈၼႆ ၵူၼ်းၸိူဝ်းႁဵတ်းၵၢၼ်ႁႃပူပႃ ၸိူဝ်းၼႆႉ ၵေႃႈ ႁႂ်ႈၾၢင်ႉယႂ်ႇၼမ် – ဝႃႈၼႆ။