ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင်ႊတင်း ႁူဝ်ၼႃႈသိုၵ်းမၢၼ်ႈ ယိုတ်းမိူင်း ၸွမ်ၸိၵ်းသိုၵ်း မိၼ်းဢွင်ႇလၢႆႇ ႁူပ်ႉထူပ်းဢုပ်ႇဢူဝ်းၵၼ် တီႈမိူင်းၶႄႇ ၼႂ်းဝၼ်းတီႈ 30/08/2025 ပူၼ်ႉမႃးၼႆႉ။

မီးၶၢဝ်ႇလိုဝ်းဢွၵ်ႇမႃးဝႃႈ ၽွင်းမိူဝ်ႈႁူပ်ႉထူပ်းၵၼ်တင်း ၸွမ်ၸိုင်ႈမိူင်းၶႄႇၼၼ်ႉ မိၼ်းဢွင်ႇလၢႆႇ လၢတ်ႈဝႃႈ – ယိၼ်းၸူမ်းထိုင်မိူင်းၶႄႇ ဢၼ်ပၼ်ႁႅင်းဢီး ၼိူဝ်ၸုမ်းဢူၺ်းလီပွတ်းႁွင်ႇသေ ၸွႆႈထႅမ်တပ်ႉသိုၵ်းမၢၼ်ႈ။ ယၢမ်းလဵဝ် လႆႈမႃးၶိုၼ်းလွင်ႈၵတ်းယဵၼ်ယဝ်ႉ – ဝႃႈၼႆ။

ပူၼ်ႉမႃး မိူဝ်ႈလိူၼ်မေႊၼၼ်ႉၵေႃႈ ႁူဝ်ၼႃႈသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇတင်း ၸွမ်ၸိုင်ႈမိူင်းၶႄႇ ယၢမ်ႈႁူပ်ႉထူပ်းၵၼ် တီႈဝဵင်းလူင် မေႃႇသၵူဝ်ႇ မိူင်းရတ်ႉသျႃး။ ဝၢႆးလင် တပ်ႉသိုၵ်းမၢၼ်ႈ ယိုတ်းၵုမ်းဢႃႇၼႃႇဝၢၼ်ႈမိူင်းမႃးၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁူပ်ႉထူပ်းတင်း ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင်ႊၼၼ်ႉ ၵမ်းၼႆႉ ပဵၼ်ပွၵ်ႈၵမ်းသွင်ယဝ်ႉ ဝႃႈၼႆ။

ၼႂ်းဝၼ်းတီႈ 29/08/2025 ၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢွၵ်ႇၶၢဝ်းတၢင်းၵႂႃႇတီႈ မိူင်းၶႄႇ ၶဝ်ႈႁူမ်ႈပၢင်ၵုမ်ၸိၵ်းၸွမ် ၾၢႆႇႁူမ်ႈၽၢၵ်ႈသျႅၼ်ႊႁၢႆႊ ဢၼ်တေႁဵတ်းတီႈဝဵင်း တီႊယၼ်ႊၵျိၼ်ႊလႄႈ ဝၼ်းမၢႆတွင်း လွင်ႈဢွင်ႇပေႉၵၢၼ်လုၵ်ႉၽိုၼ်ႉ ၶွပ်ႈတဵမ် 80 ပီ တီႈဝဵင်းပေႊၵျိၼ်ႊ မိူင်းၶႄႇ – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။