မိူဝ်ႈၼႆႉ ဝၼ်းတီႈ 26/8/2025 ယၢမ်းဝၢႆးဝၼ်း ၾူၼ်တူၵ်းဢမ်ႇထၢတ်ႇ လူမ်းလႅင်ႉၶဝ်ႈၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ႁိူၼ်းယေးၵူၼ်းဝၢၼ်ႈလူႉၵွႆမွၵ်ႈ 20 လင် ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ႁူဝ်ၶမ်ႈၼႆႉ ၾူၼ်တူၵ်းဢမ်ႇထၢတ်ႇ လူမ်းလႅင်ႉပတ်ႉဢဝ်လင်ႁိူၼ်းမွၵ်ႈ 20 လင် ပႃးၵႂႃႇၸွမ်းလူမ်း ၊  ၼမ်ႉၼႂ်းၼွင်ၵေႃႈ သုင်ၶိုၼ်ႈမႃးၶိုၼ်း၊ ဢၼ်ၺႃးလူမ်းပတ်ႉၵွႆၼမ်ပဵၼ်တၢင်းဝၢၼ်ႈ ႁူဝ်ၼွင်(ကန်ခေါင်း) လႄႈ ဝၢၼ်ႈၸၢင်ႈၶမ်း (စန်ခန့်)   ”- ဝႃႈၼႆ ။

 ႁိူၼ်းၸိူဝ်းဢၼ်ထုၵ်ႇလူမ်းပတ်ႉၵွႆၸိူဝ်းၼၼ်ႉ ယူႇတီႈၵူၼ်းၼႂ်းဝၢၼ်ႈၼႂ်းဢိူင်ႇ ၸွႆႈၵၼ် မႄးၶိုၼ်းယူႇ-ဝႃႈၼႆ ။

ဝၢႆးလင်ထူပ်းၽေးၼမ်ႉထူမ်ႈႁၢဝ်ႈႁႅင်းမႃးၼႆႉၵူၼ်းမိူင်းၼႂ်းၼွင်ႁၢႆးယႃႈလႆႈပႂ်ႉတူၺ်း ပႂ်ႉထွမ်ႇၶၢ ဝ်ႇငၢဝ်း ၾိင်ႈၾႃႉရႃႇသီႇယူႇၵူႈၶၢဝ်း ။ ယၢမ်းလဵဝ် ယွၼ်ႉၾူၼ်တူၵ်းဢမ်ႇထၢတ်ႇလႄႈ ၵူၼ်းပိုၼ်ႉတီႈ ဢွၼ်ၵၼ်တေႃႉၶိူဝ်းၶွင်ဝႆႉတီႈသုင် – ၵူၼ်းပိုၼ်ႉတီႈလၢတ်ႈ ။

ဢူးၵျေႃႇမူဝ်းဢူး ၽူႈၸတ်းၵၢၼ် တီႈႁွင်ႈၵၢၼ် ၾၢႆႇၾိင်ႈၾႃႉၾူၼ်လူမ်းမိူင်းမၢၼ်ႈ လၢတ်ႈဝႃႈ –  ၼႂ်းၶမ်ႈဝၼ်းတီႈ 26 (ဝၼ်းၸၼ်)ၼႆႉ လူမ်းလႅင်ႉ ၶႃႊၵျိၵိ တေၽတ်ႉထွင်းၶဝ်ႈ ၼႂ်းမိူင်းဝႅတ်ႉၼမ်း လူၺ်ႈဢဵၼ် ႁႅင်းယႂ်ႇႁၢဝ်ႈႁႅင်း။ ႁႅင်းလူမ်းတေဢူၼ်ႈၵႂႃႇ ၽွင်းႁွတ်ႈထိုင်တီႈၼႂ်း မိူင်းလၢဝ်း။ မိူင်းႁူမ်ႈတုမ်မၢၼ်ႈၵေႃႈ တေၺႃးၽွၼ်းတုမ်ႉယွၼ်ႈၸွမ်း မိူၼ်ၼင်ႇ ၼမ်ႉၼွင်းထူမ်ႈ၊ လိၼ်ၵူၼ်ႇ  လႄႈ ၾႃႉၽႃႇ ၸိူဝ်းၼႆႉ ဝႃႈၼႆ။

ႁွင်ႈၵၢၼ်ၾၢႆႇၾိင်ႈၾႃႉၾူၼ်လူမ်း မိူင်းမၢၼ်ႈ ၶၢတ်ႈလၢမ်းဝႆႉဝႃႈ –  ဝၼ်းတီႈ 27/08/2025  ၼႆႉ လူမ်းလႅင်ႉႁႅင်းလဵၵ်ႉ တေၶဝ်ႈၸွမ်း လႅၼ်လိၼ် မိူင်းထႆး – မိူင်းလၢဝ်း – မိူင်းမၢၼ်ႈ၊ ၼႂ်းဝၼ်းတီႈ 28 သမ်ႉ လူမ်းလႅင်ႉ ၶႃႊၵျိၵိ ႁႅင်းတေဢူၼ်ႈၵႂႃႇသေ ၽတ်ႉထွင်ႈၶဝ်ႈၼႂ်း မိူင်းတႆးပွတ်းဢွၵ်ႇ လႄႈ ပွတ်းၸၢၼ်း ဝႃႈၼႆ ။