မိူဝ်ႈဝႃး ဝၼ်းတီႈ 25/08/2025 ယၢမ်းၵၢင်ၶိုၼ်းမွၵ်ႈ 10 မူင်းၶိုင်ႈ ႁိူဝ်းမိၼ်တိုၵ်း ၵျႅၵ်ႉၾၢႆႇတႃႇ သိုၵ်းမၢၼ်ႈ ပွႆႇမၢၵ်ႇလူင်သႅၼ်း 500 ပွင်ႊ တူၵ်းသႂ်ႇၾၢႆႇၼႃႈၵျွင်းၽြႃးၵေႃႇရၶႃး ပွၵ်ႉၸီႇပိၼ်ႇတႃႇယႃႇ ပွတ်းဝၼ်းဢွၵ်ႇ ဝဵင်းမိူင်းၵုတ်ႈ။
ၵူၼ်းမိူင်းၼႂ်းပိုၼ်ႉတီႈ ဝဵင်းမိူင်းၵုတ်ႈ လၢတ်ႈဝႃႈ -“မၢၵ်ႇႁိူဝ်းမိၼ်သိုၵ်းမၢၼ်ႈ တူၵ်းသႂ်ႇၼႂ်းသဵၼ်ႈတၢင်း ၾၢႆႇၼႃႈၵျွင်းၽြႃးၵေႃႇရၶႃး။ ၽွင်းၶဝ်မႃးပွႆႇမၢၵ်ႇၼၼ်ႉ ႁိူၼ်းပေႃးသၼ်ႇလူင်ၵႂႃႇၵမ်းသိုဝ်ႈ။ မီးပႃးၵူၼ်းလူႉမၢတ်ႇၸဵပ်းႁႄ။ လၢႆၵေႃႉတႄႉၵေႃႈ ပႆႇလႆႈႁူႉတႅတ်ႈတေႃး”- ဝႃႈၼႆ။
ယွၼ်ႉသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇလႄႈ ပွၵ်ႈၼႆႉ လင်ႁိူၼ်းၵူၼ်းမိူင်းလူႉၵွႆၵႂႃႇၸွမ်း 4 လင်၊ ၵူၼ်းမၢတ်ႇၸဵပ်းၵႂႃႇ ၵေႃႉၼိုင်ႈ။ ဝဵင်းမိူင်းၵုတ်ႈၼႆႉ ပဵၼ်ဝႆႉၼႂ်းၼႃႈတီႈသိုၵ်းတဢၢင်းလႄႈ ၸုမ်းသိုၵ်းႁူမ်ႈႁွမ်းၶဝ် ၵုမ်းၵမ်ဝႆႉၸူဝ်ႈၶၢဝ်းသေ တႃႇၵပ်းသိုပ်ႇတိတ်းတေႃႇၵူၼ်းၼႂ်းပိုၼ်ႉတီႈၵေႃႈ ဢမ်ႇမီးလႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႉၵေႃႈ ၵူၺ်းလႆႈပိုင်ႈဢိင် သတႃႊလိင်ႉၵူၺ်းလႄႈ ႁဵတ်းႁႂ်ႈၵပ်းသိုပ်ႇတိတ်းတေႃႇ ယၢပ်ႇၽိုတ်ႇဝႆႉသေ ၶေႃႈမုလ်းႁူဝ်ယွႆႈ လွင်ႈၵူၼ်းလူႉမၢတ်ႇၸဵပ်း ယွၼ်ႉမၢၵ်ႇလူင်ႁိူဝ်းမိၼ်ၼၼ်ႉ ပႆႇလႆႈႁူႉတႅတ်ႈတေႃး။
ပူၼ်ႉမႃး မိူဝ်ႈဝၼ်းတီႈ 14/08/2025 ယၢမ်းၵၢင်ၶမ်ႈ ၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၵျွင်းမုၼ်ၸဝ်ႈလိၼ်းယွင်ႇၶျီႇ ၼႂ်းပွၵ်ႉသူၺ်ႇၵူႇ ပွတ်းဝၼ်းဢွၵ်ႇ မိူင်းၵုတ်ႈလႄႈ ၵူၼ်းမိူင်းလူႉတၢႆၵႂႃႇ 21 ၵေႃႉ မၢတ်ႇၸဵပ်းၵႂႃႇ 7 ၵေႃႉ။
မိူၼ်ၼႆ ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄး ထုင်ႉၼွင်ပိင်သေ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းလႄႈ ၶိူင်ႈတရူၼ်ႊ ပွႆႇမၢၵ်ႇသႂ်ႇၼႂ်းၼႃႈတီႈသိုၵ်းတဢၢင်း ၵုမ်းၵမ်ဢမ်ႇထၢတ်ႇ ႁဵတ်းႁႂ်ႈသင်ၶၸဝ်ႈ လူႉလွၼ်ႇ၊ ၵူၼ်းမိူင်းလူႉတၢႆမၢတ်ႇၸဵပ်းၸွမ်း ၸမ်ထိုင် 100 ၵေႃႉ၊ ၵူၼ်းမိူင်းၼႂ်းပိုၼ်ႉတီႈ လႆႈပၢႆႈၽေးပၢင်တိုၵ်းဝႆႉ မွၵ်ႈ 7,000 ၵေႃႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ