ၸဝ်ႈႁိူဝ်းလႄႈ ၸဝ်ႈႁိူၼ်းၼႂ်းၼွင်ႁၢႆးယႃႈ ၽိတ်းမေႃးၵၼ်ယွၼ်ႉႁေႃႈႁိူဝ်းဝႆး ၼမ်ႉၽၢင်ႇၽိူပ်ႈၶဝ်ႈႁိူၼ်း၊ ၸဝ်ႈႁိူၼ်းပိုတ်းၸဝ်ႈႁိူဝ်း သမ်ႉၵႂႃႇတိူဝ်ႉၺႃးလုင်းထဝ်ႈၽၢႆးႁိူဝ်းမႃးႁိမ်းၼၼ်ႉ တိူဝ်ႉၺႃးႁူၺ်ႇတႃလၼ် ဢွၵ်ႇလူႉသုမ်းၶွၼ်ၼိုင်ႈ။
မိူဝ်ႈဝႃး ဝၼ်းတီႈ 21/8/2025 ယၢမ်းၵၢင်ၼႂ် 11 မူင်း ထဝ်ႈၸၢႆးၵေႃႉၼိုင်ႈ လႄႈလုၵ်ႈၸၢႆးမၼ်း လုၵ်ႉတီႈ ႁိူၼ်းၽၢႆးႁိူဝ်းဢွၼ်ႇမႃးလမ်းၼိုင်ႈဢၢၼ်းတေၵႂႃႇႁဵတ်းၵၢၼ်ၵိၼ်ၸၢင်ႈထူမ်လိၼ်ၼႂ်းဝၢၼ်ႈ။ ၽွင်းႁွတ်ႈထိုင်တီႈဝၢၼ်ႈႁၢႆးၶမ်းဢူးၼၼ်ႉ ယူႇယူႇမၢၵ်ႇၵၢင်ႇၵွၼ်မႃးၸပ်းသႂ်ႇတႃ ထဝ်ႈၸၢႆးၵႅၼ်ႇတႃ လူႉၵွႆၶွၼ်ၼိုင်ႈ ယၢမ်းလဵဝ်လႆႈယူတ်းယႃတူဝ်ဝႆႉတီႈႁူင်းယႃလူင်ၸဝ်ႈၸၢမ်ႇထုၼ်း။
ၼၢင်းယိင်းၽူႈၶဝ်ႈၸုမ်းပရႁိတၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ မိူဝ်ႈႁဝ်းၶႃႈၵႂႃႇႁပ်ႉ တူဝ်လုင်းၼၼ်ႉ မၢၵ်ႇၵၢင်ႇၵွၼ်(မၢၵ်ႇလုင်းလိၼ်) ယင်းတိုၵ်ႉမီးၼိူဝ်ႁိူဝ်းမၼ်းယူႇဢေႃႈ။ လုင်းဝႃႈ ပဵၼ်ဢီႈသင်မႃးတိူဝ်ႉတီႈလႂ်မၼ်း မၼ်းတမ်ႉဢမ်ႇႁူႉ။ ၽိူဝ်ႇလိူတ်ႈဢွၵ်ႇမႃးၸင်ႇႁူႉဝႃႈတိူဝ်ႉတီႈတႃၼႆ။ ၽိူဝ်ႇထိုင်ႁူင်းယႃလႄႈမေႃယႃၶဝ်တူၺ်းၼႆႉႁူၺ်ႇတႃမၼ်းပေႃးလႅဝ်မူတ်းယဝ်ႉ။လႆႈၽႃႇဢွၵ်ႇပႅတ်ႈ။”- ဝႃႈၼႆ။
ထဝ်ႈၸၢႆးဢၼ်ၵၢင်ႇၵွၼ်တိူဝ်ႉတႃၼႆႉ ၸိုဝ်ႈႁွင်ႉ ဢူးမျႃႉဢွင်ႇ ဢႃယု 50 ပီ။ မီးလုၵ်ႈလၢင်း 4 ၵေႃႉ။ ပဵၼ်ၵူၼ်းဝၢၼ်ႈ ယႂႃႇၵျီးတွင်ႇ (ရွာကြီးတောင်) ၼွင်ႁၢႆးယႃႈ ၊ ႁဵတ်းၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉ ၊ ႁႃၸဝ်ႉၵိၼ်ၶမ်ႈ။ ယၢမ်းလဵဝ်တႄႉလႆႈယူတ်းယႃတူဝ်ဝႆႉယူႇတီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယၢမ်းလဵဝ်သမ်ႉပဵၼ်ၽွင်းၼမ်ႉၼႂ်းၼွင်ၼမ်ၶႃႈၼႃႇၼေႃႈ။ လႆႈယိၼ်းဝႃႈ လွင်ႈၼႆႉပဵၼ်ယွၼ်ႉ ၵူၼ်းႁေႃႈႁိူဝ်းၸၢၵ်ႈ ႁေႃႈဝႆးၼႃႇႁေ ႁဵတ်းႁႂ်ႈၼမ်ႉ ၽၢင်ႇၽၢပ်ႈ ၶဝ်ႈႁိူၼ်း ၵူၼ်းဝၢၼ်ႈ။ ၸဝ်ႈႁိူၼ်းသမ်ႉဢမ်ႇပေႃးၸႂ်သေ လမ်းဢဝ်ၵၢင်ႇၵွၼ်ပိုတ်းၸဝ်ႈႁိူဝ်းၸၢၵ်ႈ။ ဢမ်ႇတိူဝ်ႉႁိူဝ်းၸၢၵ်ႈသေ သမ်ႉမႃးတိူဝ်ႉလုင်းထဝ်ႈဢၼ်ၽၢႆးႁိူဝ်းဢွၼ်ႇမႃး- ၼႆ။ ပွင်ႇဝႃႈ လုင်းထဝ်ႈၺႃးၵိၼ်ၼႂ်းၵႄႈမၼ်းလၢႆလၢႆၶႃႈဢိူဝ်ႈတီႈပိူၼ်ႈ”- ဝႃႈၼႆ။
တေႃႇထိုင်မိူဝ်ႈၼႆႉယၢမ်းဝၢႆးဝၼ်းတႄႉလႆႈႁူႉဝႃႈပလိၵ်ႈမႃးတီႉၵူၼ်းဝၢၼ်ႈႁိမ်းၼၼ်ႉၵႂႃႇၵေႃႉၼိုင်ႈယဝ်ႉ – ၼႄးဝႃႈပဵၼ်ၵူၼ်းပိုတ်းမၢၵ်ႇၵၢင်ႇၼႆသေယၢမ်းလဵဝ်ၵႂႃႇမီးတီႈႁူင်းပလိၵ်ႈဝၢၼ်ႈၼမ်ႉပၼ်ႇ ၼႂ်းၼွင်ႁၢႆးယႃႈ ဝႃႈၼႆသေတႃႉ ပဵၼ်ၽႂ်တႄႉတႄႉၼႆပႆႇလႆႈႁူႉၸွမ်း။ ၸဝ်ႈႁိူဝ်းၸၢၵ်ႈၼၼ်ႉၵေႃႈပဵၼ်ၽႂ်ၼႆပႆႇလႆႈႁူႉၸွမ်း။
ယွၼ်ႉၾူၼ်တူၵ်းဢမ်ႇထၢတ်ႇ ၼႂ်းလိူၼ် ဢေႃႊၵၢတ်ႉသ် ၼႆႉသေ ႁဵတ်းႁႂ်ႈ ၼမ်ႉထူမ်ႈၼမ်ႉၼွင်း ၼႂ်းၼွင်ႁၢႆးယႃႈ ထိုင်ယၢမ်းလဵဝ် ၼမ်ႉပႆႇယွမ်းလူင်းၶိုၼ်း ။ ယွၼ်ႉၼၼ် ၼႂ်းၼွင်ႁၢႆးယႃႈ မီးပၼ်ႁႃ လၢႆလၢႆလွင်ႈ။ ပေႃးႁိူဝ်းၸၢၵ်ႈလႅၼ်ႈဝႆး ၼမ်ႉၽၢင်ႇၽၢပ်ႈၶဝ်ႈႁိူၼ်း တုမ်ႉလေႃႇၽႃႁိူၼ်းၽၵ်းတူႁိူၼ်းလူႉၵွႆ။ ၸင်ႇဝႃႈၸဝ်ႈႁိူၼ်းဢမ်ႇပေႃးၸႂ် ၸဝ်ႈႁိူဝ်းၸၢၵ်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးၼမ်ႉထူမ်ႈၸိူင်ႉၼႆႉ ၵူၼ်းႁေႃႈႁိူဝ်းတေလႆႈ ၾၢင်ႉ တႄႉတႄႉ။ ပေႃးၼမ်ႉၽၢင်ႈသႂ်ႇၼႆ ႁိူၼ်းပေႃးသၼ်ႇဝႆ၊ ႁိူၼ်းသမ်ႉၺႃးၼမ်ႉထူမ်ႈလၢႆၵမ်းသေ ဢမ်ႇလႆႈလၢႆႈလႆႈမႄးႁိုင်ယဝ်ႉမၼ်းၶႆႈၽင်ႉယဝ်ႉ။ ပေႃးဢမ်ႇၾၢင်ႉတႄႉ ပၼ်ႁႃမၼ်းၸၢင်ႈပဵၼ်မႃးၵူႈၸိူဝ်ႉၵူႈလွင်ႈ”- ဝႃႈၼႆ။
ၵူၼ်းပိုၼ်ႉတီႈလၢတ်ႈဝႃႈ ၼင်ႇႁိုဝ်ပၼ်ႁႃၸိူဝ်းၼႆႉတေဢမ်ႇၵိူတ်ႇၶိုၼ်ႈမီးမႃးၼႆႉ ၵၢင်ႉၵႄႇၼႂ်းဝၢၼ်ႈ ၼႂ်းၶူင်ႇထုၵ်ႇလီႁွင်ႉၸဝ်ႈႁိူဝ်း ၵူၼ်းဝၢၼ်ႈသေပၼ်ၾၢင်ႉယူႇ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ