ပေႃးထိုင်မႃး ဝၼ်းတီႈ 31/08/2025 ၼႆႉ မိူင်းၶႄႇ တေၸတ်းႁဵတ်းပၢင်ၵုမ်ၸိၵ်းၸွမ် ၸုမ်းၾၢႆႇ ႁူမ်ႈႁွမ်းသျႅၼ်ႊႁၢႆႊ SCO တီႈဝဵင်းတီႊယႅၼ်ႊၵျိၼ်ႊ၊ ႁူဝ်ၼႃႈ သိုၵ်းမၢၼ်ႈ ယိုတ်းမိူင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တေၵႂႃႇၶဝ်ႈႁူမ်ႈ ဝႃႈၼႆ။

ၸုမ်းၾၢႆႇႁူမ်ႈႁွမ်းသျႅၼ်ႊႁၢႆႊ SCO ၼႆႉ ပဵၼ်ၸုမ်းလူင်ပွင်ၸိုင်ႈ ၵဵဝ်ႇၵပ်းပိုၼ်ႉတီႈ ဢၼ်ၵေႃႇတင်ႈမႃး တီႈဝဵင်းသျႅၼ်ႊႁၢႆႊ မိူဝ်ႈပီ 2001 သေ တေပႃး မိူင်းၶႄႇ၊ ရတ်ႉသျႃး၊ ၵႃႇသၵ်ႊသတၼ်ႊ၊ ၵႃႇၵျိတ်ႊသတၢၼ်ႊ၊ တႃႇၵျိတ်ႊၵိတ်ႊသတၢၼ်ႊလႄႈ ဢုသပၢတ်ႊၵိတ်ႊသတၢၼ်ႊ ၸိူဝ်းၼႆႉ။

မိူင်းမၢၼ်ႈ ဢမ်ႇၸႂ်ႈမိူင်းၶဝ်ႈႁူမ်ႈၼႂ်းၸုမ်းၼၼ်ႉသေတႃႉ ပဵၼ်မိူင်းၽူႈႁူမ်ႈၽၢၵ်ႈၵၼ် Dialogue Partner ဝႃႈၼႆ။

ဝၢႆးပၢင်ၵုမ်ၼၼ်ႉယဝ်ႉ ၼႂ်းဝၼ်းတီႈ 03/09/2025 သမ်ႉ တေသိုပ်ႇၵႂႃႇတီႈ ဝဵင်းလူင်ပေႊၵျိၼ်ႊသေ တေၶဝ်ႈႁူမ်ႈပၢင်ၵႅဝ်ႈ မၢႆတွင်း ဝၼ်းၶႄႇလုၵ်ႉၽိုၼ်ႉဢွင်ႇပေႉ ၵျပၼ်ႊ ဝႃႈၼႆ။

မိူဝ်ႈပီၵၢႆ လိူၼ်ၼူဝ်ႊဝႅမ်ႊပိူဝ်ႊၼၼ်ႉၵေႃႈ ႁူဝ်ၼႃႈသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ လႆႈၵႂႃႇၶဝ်ႈႁူမ်ႈပၢင်ၵုမ်ၸိၵ်းၸွမ် ထုင်ႉမႄႈၶူင် တီႈဝဵင်းၶုၼ်းမိင် မိူင်းၶႄႇ။ ယွၼ်ႉၼၼ် ၶၢဝ်းတၢင်းဢၼ် တေၵႂႃႇထႅင်ႈၼႂ်းႁၢင်လိူၼ်ၼႆႉ ပဵၼ်ၶၢဝ်းတၢင်းၵႂႃႇမိူင်းၶႄႇ ပွၵ်ႈၵမ်းသွင်ယဝ်ႉ – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။