မိူဝ်ႈၼႆႉ ဝၼ်းတီႈ 18/08/2025 ယၢမ်းၵၢင်ဝၼ်း ၶွင်ႇသီႇသိုၵ်းမၢၼ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ မၵ်းမၼ်ႈပိုၼ်ၽၢဝ်ႇ ဝၼ်းတေၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်း။

ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ – ပၢင်လိူၵ်ႈတင်ႈၼႆႉ တေၸတ်းႁဵတ်းၵႂႃႇ ပဵၼ်ၶၵ်ႉပဵၼ်တွၼ်ႈ ၸွမ်း ၼင်ႇ ပိူင်ငဝ်ႈပိုင်းမိူင်း 2008 တွၼ်ႈ 399 (က) ၊ ၾိင်ႈမိူင်း ၶွမ်ႊမသျိၼ်ႊ ၵၢၼ်လိူၵ်ႈတင်ႈတွၼ်ႈ 10 ။ ပၢင်လိူၵ်ႈတင်ႈၶၵ်ႉတွၼ်ႈ 1 ၼႆႉ တေတႄႇၸတ်းႁဵတ်းၵႂႃႇ ၼႂ်းဝၼ်းတီႈ 28/12/2025 တူၵ်းမႅၼ်ႈ 1387 ၶု လိူၼ်ၵမ်မႂ်ႇ 10 ၶမ်ႈ ၼႂ်းဝၼ်းဢႃးတိတ်ႉ ဝႃႈၼႆဝႆႉ။

ပၢင်လိူၵ်ႈတင်ႈပွၵ်ႈၼႆႉ သိုၵ်းမၢၼ်ႈ တေၸႂ်ႉတိုဝ်း ၶိူင်ႈၸၢၵ်ႈပၼ်ၶႅပ်းၵၢင်ၸႂ် ဢွၼ်ႊလၢႆႊ (MEVM) သေ ႁႂ်ႈၵူၼ်းမိူင်းပၼ်ၶႅပ်းၵၢင်ၸႂ်ၵႂႃႇ ဝႃႈၼႆ။

ပၢင်လိူၵ်ႈတင်ႈ ဢၼ်တေၸတ်းၼႆႉ တွၼ်ႈတႃႇ သၽႃးၵူၼ်းမိူင်း 330 တီႈၼင်ႈၼၼ်ႉ တေၸႂ်ႉပိူင်လၢႆး ၽူႈပေႉၵိၼ်ၶၢတ်ႇ FPTP သေလိူၵ်ႈတင်ႈၵႂႃႇ၊ တွၼ်ႈတႃႇ သၽႃးၸိူဝ်ႉၸၢတ်ႈ (သၽႃးၼိူဝ်) 110 တီႈၼင်ႈသမ်ႉ တေၸႂ်ႉလၢႆးၼပ်ႉသွၼ်ႇၸွမ်းဝၢၵ်ႈ တူဝ်တႅၼ်း MMP သေလိူၵ်ႈတင်ႈ၊ ၼႂ်းၼၼ်ႉ တေၶိုၼ်းၸႂ်ႉလၢႆးၽူႈပေႉၵိၼ်ၶၢတ်ႇ FPTP သေလိူၵ်ႈဢဝ် 84 တီႈၼင်ႈ (84 ၶဵတ်ႇလိူၵ်ႈတင်ႈ/ မဲဆန္ဒနယ်) ၊ တေၸႂ်ႉလၢႆး ပိူင်လိူၵ်ႈတင်ႈၸွမ်းပုၼ်ႈသုၼ်ႇ PR သေ လိူၵ်ႈ 26 တီႈၼင်ႈ (26 ၶဵတ်ႇလိူၵ်ႈတင်ႈ/ မဲဆန္ဒနယ်)။

တွၼ်ႈတႃႇ သၽႃးၸႄႈမိူင်းလႄႈ တိူင်းသမ်ႉ တေၸႂ်ႈပိူင်လိူၵ်ႈတင်ႈ လၢႆးၼပ်ႉသွၼ်ႇၸွမ်းဝၢၵ်ႈတူဝ်တႅၼ်း MMP သေ လိူၵ်ႈမႃးၽူႈတႅၼ်း 364 တီႈၼင်ႈ။ ၼႂ်းၼၼ်ႉၶိုၼ်းတေဢဝ်လၢႆးၽူႈပေႉၵိၼ်ၶၢတ်ႇ FPTP သေ လိူၵ်ႈၽူႈတႅၼ်း 322 တီႈၼင်ႈ၊ ဢဝ်လၢႆးၼပ်ႉသွၼ်ႇၸွမ်းဝၢၵ်ႈ/ ပိူင်လိူၵ်ႈတင်ႈၸွမ်းပုၼ်ႈသုၼ်ႇ PR သေလိူၵ်ႈမႃး 42 တီႈၼင်ႈ။ ၼႂ်း 364 တီႈၼင်ႈၼၼ်ႉ တေပႃးၽူႈတႅၼ်းၸၢဝ်းၶိူဝ်း 29 ၵေႃႉ (29 ၶဵတ်ႇ) – လႆႈႁူႉၼင်ႇၼႆ။

ၼႂ်းဢၼ်သိုၵ်းမၢၼ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ ပိုၼ်ၽၢဝ်ႇသဵၼ်ႈမၢႆ ၸႄႈဝဵင်းဢၼ် တေၸတ်းႁဵတ်းပၢင်လိူၵ်ႈတင်ႈၼၼ်ႉသမ်ႉ ၼႂ်းမိူင်းတႆးပွတ်းႁွင်ႇ ပႃးၸႄႈဝဵင်းၸိူဝ်းၸုမ်းသိုၵ်းၸၢဝ်းၶိူဝ်း သိုၵ်းၵဝ်ႈၵၢင်ႉ (MNDAA)၊ သိုၵ်းတဢၢင်း (TNLA)၊ သိုၵ်းရၶႅင်ႇ (AA) ၶဝ်ယိုတ်းလႆႈၵုမ်းၵမ်ဝႆႉၸိူဝ်းၼၼ်ႉပႃး။ မိူၼ်ၼင်ႇ ၸႄႈဝဵင်းၼမ်ႉၶမ်း၊ ၸႄႈဝဵင်းမၢၼ်ႈပဵင်း (မဘိမ်းမြို့နယ်)၊ ၸႄႈဝဵင်းမိူင်းမိတ်ႈ၊ ၸႄႈဝဵင်းၵုၼ်လူင်၊ ၸႄႈဝဵင်းသႅၼ်ဝီ၊ ၸႄႈဝဵင်းလႃႈသဵဝ်ႈ၊ ၸႄႈဝဵင်းၵျွၵ်ႉမႄး၊ ၸႄႈဝဵင်းသီႇပေႃႉ၊ ၸႄႈဝဵင်းၼွင်ၶဵဝ်၊ ၸႄႈဝဵင်းၼမ်ႉတူႈ၊ ၸႄႈဝဵင်းၵူတ်ႉၶၢႆ ၊ ၸႄႈဝဵင်းၼမ်ႉသၼ်ႇ၊ ၸႄႈဝဵင်းမၢၼ်ႈတူင်ႈ၊ ၸႄႈဝဵင်းၵွင်းၸၢင်ႉ (ကုန်းကြမ်း) ၊ ၸႄႈဝဵင်းၵၢတ်ႇၵဝ်ႇ (လၢဝ်ႇၵၢႆး) ၸဵမ်ၸိူဝ်းၼႆႉ။

လိူဝ်ၼၼ်ႉ ၸိူဝ်းပဵၼ်ၸႄႈဝဵင်း ၼႂ်းၼႃႈတီႈသိုၵ်းဝႃႉ(UWSA) ၊ တပ်ႉသိုၵ်းမိူင်းလႃး (NDAA/ESS) လႄႈ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ၵုမ်းၵမ်ဝႆႉၸိူဝ်းၼၼ်ႉၵေႃႈ သိုၵ်းမၢၼ်ႈ ပိုၼ်ၽၢဝ်ႇဝႆႉဝႃႈ တေၸတ်းႁဵတ်းပၢင်လိူၵ်ႈတင်ႈ။

မိူဝ်ႈႁူဝ်လိူၼ်ဢေႃႊၵတ်ႊသ်ၼႆႉၵေႃႈ ၸုမ်းၸွမ်ၽွင်းလူင်မိူင်းတႆးလႄႈ သိုၵ်းမၢၼ်ႈ ႁူမ်ႈၵၼ် ဢွၵ်ႇၶၢဝ်း တၢင်းၵႂႃႇ ႁူပ်ႉထူပ်းၽူႈၼမ်း ၾၢႆႇၸုမ်းသိုၵ်းဝႃႉ (UWSA) တီႈဝဵင်းပၢင်သၢင်းလႄႈ ၸုမ်းသိုၵ်းမိူင်းလႃး (NDAA/ESS) တီႈဝဵင်းမိူင်းလႃး။ ၵႂႃႇဢုပ်ႇဢူဝ်းႁူၺ်းသူၼ်း ႁႂ်ႈတင်းသွင်ၸုမ်း ႁူမ်ႈႁဵတ်းသၢင်ႈၸွမ်း ၼႂ်းၶၵ်ႉၵၢၼ်ပၢင်လိူၵ်ႈတင်ႈ ႁၢင်ပီ 2025 ၼႆႉ။

ၶွမ်ႊမသျိၼ်ႊၵၢၼ်လိူၵ်ႈတင်ႈ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇပၼ်ၶေႃႈၾၢင်ႉဝႆႉပဵၼ်တၢင်းၵၢၼ်ဝႃႈ- ပၢင်လိူၵ်ႈတင်ႈ ပွၵ်ႈၵမ်းၼႆႉ တၵ်းတေလႆႈၸတ်းႁဵတ်းၵႂႃႇ ႁႂ်ႈပေႃးဢွင်ႇမၢၼ်။ ၽႂ် ဢမ်ႇပၼ်ႁႅင်းပၢင်လိူၵ်ႈတင်ႈ၊ ၽႂ်တင်ႈၸႂ်ယႃႉၵဝ်းပၢင်လိူၵ်ႈတင်ႈ၊ လၢတ်ႈၸႃႁဵတ်းသၢင်ႈ ပိုၼ်ၽၢဝ်ႇ သေႉၼႄးလွင်ႈပၢင်လိူၵ်ႈတင်ႈ၊ ၽႂ်ႁူၺ်းသူၼ်းႁႂ်ႈၵူၼ်းမိူင်း ဢမ်ႇၶဝ်ႈႁူမ်ႈပၢင်လိူၵ်ႈတင်ႈ – လူၺ်ႈလၢႆးတၢင်းဢွမ်ႈၵေႃႈလီ ၵမ်းသိုဝ်ႈၵေႃႈယဝ်ႉ တေလႆႈၺႃးတၢမ်ႇၶွၵ်ႈ ဢေႇသုတ်း 3 ပီ တေႃႇတင်းၸူဝ်ႈၸၢတ်ႈ။ တေပၼ်တူတ်ႈတၢမ်ႇၵႂႃႇ ၼၵ်းၼၵ်းၼႃၼႃ ဝႃႈ ၼႆဝႆႉ။

တႅမ်ႈ – ၽူၺ်းၼုမ်ႇ