ၸွမ်ၸိုင်ႈမိူင်းၵူဝ်ႊရီႊယိူဝ်းၸၢၼ်း လီႊၵျေႊမျွင်ႊ (Lee Jae Myung) လၢတ်ႈဝႃႈ ၼပ်ႉယမ်ပၵ်းပိူင်ၵၢၼ်မိူင်း မိူင်းၵူဝ်ႊရီႊယိူဝ်ႊႁွင်ႇသေ တေၶိုၼ်းၶတ်းၸႂ်ၵေႃႇသၢင်ႈ လွင်ႈယုမ်ႇယမ်ၼႂ်းၵႄႈၵၢင် တပ်ႉသိုၵ်းသွင်ၸိုင်ႈမိူင်းၵႂႃႇ ဝႃႈၼႆ။

ပူၼ်ႉမႃးဢမ်ႇႁိုင်သင်ၼႆႉ ၶိမ်ႊယူဝ်ႊၵျုင်ႊ(Kim Yo Jong) ၼွင်ႉယိင်း ၽူႈဢွၼ်ႁူဝ်မိူင်းၵူဝ်ႊရီႊယိူဝ်ႊႁွင်ႇ ၶိမ်ႊၵျုင်ႊဢၢၼ်ႊ(Kim Jong Un) လၢတ်ႈၵႂႃႇဝႃႈ ဢမ်ႇသူၼ်ၸႂ်တႃႇတေ ႁဵတ်းႁႂ်ႈလွင်ႈၵပ်းသိုပ်ႇ ၵၼ်တၢင်းမိူင်းၵူဝ်ႊရီႊၸၢၼ်း လီၶိုၼ်ႈမႃး ဝႃႈၼႆ။

ဝၢႆးလင်ၼၼ်ႉယဝ်ႉ ဝၼ်းၼိုင်ႈ ၸွမ်ၸိုင်ႈမိူင်းၵူဝ်ႊရီႊယိူဝ်ႊၸၢၼ်း ၸင်ႇလၢတ်ႈဢွၵ်ႇမႃး ၼင်ႇၼႆ။

ပူၼ်ႉမႃး မိူဝ်ႈၼႂ်းလိူၼ်ၵျုၼ်ႊ ပီ 2025 ၼႆႉ လီႊၵျေႊမျွင်ႊ (Lee Jae Myung) ဢွင်ႇပေႉပၢင်လိူၵ်ႈတင်ႈသေ ပဵၼ်မႃးၸွမ်ၸိုင်ႈမိူင်းၵူဝ်ႊရီႊယိူဝ်ႊၸၢၼ်း။ မၼ်းၸၢႆးလၢတ်ႈပၼ်ၵႂၢမ်းမၼ်ႈဝႆႉဝႃႈ တေၶတ်းၸႂ်လူတ်းယွမ်း လွင်ႈၶဵင်ႈၶႅင်ၵၼ်တင်း မိူင်းၵူဝ်ႊရီႊယိူဝ်ႊႁွင်ႇသေ တေဢုပ်ႇၵုမ်ၵေႃႇသၢင်ႈ လွင်ႈယုမ်ႇယမ်ၸမ်ၸႂ်ၵၼ်ၵႂႃႇ ဝႃႈၼႆ။

လွင်ႈၼႆႉ ပဵၼ်ဢၼ်သၢၼ်ၶတ်းၵၼ်တင်း မႁႃႇပိဝ်ႇႁႃႇ ၸွမ်ၸိုင်ႈ (ၵဝ်ႇ) Yoon Suk Yeol ဝႆႉ။

ၼႂ်းလိူၼ်ၵျုၼ်ႊပူၼ်ႉမႃးၼၼ်ႉ တပ်ႉသိုၵ်းမိူင်းၵူဝ်ႊရီႊယိူဝ်ႊၸၢၼ်း ပိုၼ်ၽၢဝ်ႇဝႃႈ လႆႈပူတ်းပႅတ်ႈၶိူင်ႈၸၢၵ်ႈပွႆႇသဵင် လွင်ႈပိုၼ်ၽႄႈဝႃႇတ ၸွမ်းပိုၼ်ႉတီႈႁၢမ်းပၢင်သိုၵ်း ၼႂ်းၵႄႈၵၢင်သွင်ၸိုင်ႈ မိူင်းၼၼ်ႉယဝ်ႉ ဝႃႈၼႆ။ ၵဵဝ်ႇလူၺ်ႈလွင်ႈၼႆႉသေ ၾၢႆႇမိူင်းၶူဝ်ႊရီႊယိူဝ်ႊႁွင်ႇတႄႉ တွပ်ႇထဵင်ဝႆႉ – သိုဝ်ႇၶၢဝ်ႇ CNA ဢွၵ်ႇဝႆႉၼင်ႇၼႆ။