ဝၼ်းတီႈ 12/08/2025 ယၢမ်းၵၢင်ၼႂ် 09:00 ထိုင် 4:30 မူင်းဝၢႆးဝၼ်း တႃႇမၢႆတွင်း ဝၼ်းၵူၼ်းၼုမ်ႇလုမ်ႈၾႃႉၼႆသေ ယူႇတီႈ ၵူၼ်းၼုမ်ႇတင်း ၵူၼ်းပိုၼ်ႉတီႈ ႁူမ်ႈၵၼ်ၸတ်းႁဵတ်း ပၢင်မၢႆတွင်းၵႂႃႇ ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း တီႈၼိုင်ႈ။
ၽူႈၶဝ်ႈႁူမ်ႈ ပၢင်မၢႆတွင်း ဝၼ်းၵူၼ်းၼုမ်ႇလုမ်ႈၾႃႉ တီႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ယိူင်းဢၢၼ်းတႄႉ တႃႇႁႂ်ႈၵူၼ်းၼုမ်ႇၼေႃႇတႅၼ်းၶိူဝ်းႁဝ်း ပၼ်ၵၢၼ်ၵူၼ်းၼုမ်ႇ ၵႂႃႇ ၼင်ႇႁိုဝ် တေႁူၼ်ႈမုၼ်းလႅင်းမႃး တႃႇၵၢပ်ႈပၢၼ်မႂ်ႇၼႆႉၵႂႃႇၶႃႈဢေႃႈ။ ၼႂ်းဝၼ်းၵူၼ်းၼုမ်ႇလုမ်ႈၾႃႉ တီႈဝဵင်းမိူင်းပၼ်ႇပွၵ်ႈၼႆႉ ၸတ်းႁဵတ်းမႃး ပဵၼ်ပွၵ်ႈဢွၼ်တၢင်းသုတ်းၶႃႈယဝ်ႉ”- ဝႃႈၼႆ။
မၢႆတွင်း ဝၼ်းၵူၼ်းၼုမ်ႇလုမ်ႈၾႃႉ တီႈဝဵင်းမိူင်းပၼ်ႇ ပွၵ်ႈၵမ်းႁႅၵ်ႈၼႆႉသေ မီးၵူၼ်းၼုမ်ႇလႄႈ ၵူၼ်းပိုၼ်ႉတီႈၶဝ်ႈႁူမ်ႈမွၵ်ႈ 100 ၵေႃႉ။ ၼႂ်းၼၼ်ႉ လႆႈဢုပ်ႇဢူဝ်းလႅၵ်ႈလၢႆႈပၼ်တၢင်းႁူႉၵၼ်ၵႂႃႇ မိူၼ်ၼင်ႇ – လွင်ႈပၢႆးယူႇလီ၊ လွင်ႈပၢႆးပၺ်ႇၺႃႇ၊ လွင်ႈၸၢႆးယိင်းၽဵင်ႇပဵင်းၵၼ်၊ လွင်ႈယူႇသဝ်းၵိၼ်သၢင်ႈ၊ လွင်ႈမၢၵ်ႈမီး၊ လွင်ႈသိင်ႇဝႅတ်ႉလွမ်ႉလႄႈ လွင်ႈငမ်းယဵၼ် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ