မိူဝ်ႈၼႆႉ ဝၼ်းတီႈ 05/09/2024 ယၢမ်းၵၢင်ၼႂ် 9 မူင်း ထိုင် 11 မူင်း ၵၢင်ဝၼ်း ယူႇတီႈ ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA ဢွၼ်ၸတ်းႁဵတ်း ပၢင်ပွႆးယွင်ႈၵုင်ႇ တွၼ်ႈသူးလုၵ်ႈႁဵၼ်း ၸုမ်းတၢင်းၵႃႈ ၾိင်ႈငႄႈတႆး ပီၵၢၼ်သွၼ်ႁဵၼ်း 2024 – 2025 တီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။
ၵူၼ်းပိုၼ်ႉတီႈ ဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ယိူင်းဢၢၼ်း မေႃသွၼ်ၶဝ်တႄႉ ႁႂ်ႈၼေႃႇတႅၼ်းၶိူဝ်း မီးၸႂ် ႁၵ်ႉၾိင်ႈငႄႈ ႁၵ်ႉၸိူဝ်ႉၶိူဝ်း ႁႂ်ႈလုၵ်ႈႁဵၼ်း မီးႁႅင်းၸႂ် တႃႇမိူဝ်းၼႃႈ။ ပီၼႃႈမႃး ႁႂ်ႈလုၵ်ႈႁဵၼ်းမီး ႁႅင်းၸႂ် တိူဝ်းၼမ်မႃးလိူဝ်ၼႆႉ ယဝ်ႉၵေႃႈ ငိၼ်းၸူမ်းထိုင် RCSS မႃးယုၵ်ႉယွင်ႈၼမ်ႉၸႂ် ၸုမ်းမေႃသွၼ် တင်းသဵင်ႈ”- ဝႃႈၼႆ။
ၸုမ်းလုၵ်ႈႁဵၼ်းတၢင်းၵႃႈ တီႈဝဵင်းမိူင်းပၼ်ႇၼႆႉ လႆႈၶဝ်ႈၶႄႉၶဵင်ႇ ၼႂ်းၸႄႈတွၼ်ႈလၢင်းၶိူဝ်းၼႆႉ လႆႈႁပ်ႉသူးထီႉၼိုင်ႈသေ တေသိုပ်ႇၶဝ်ႈၶဵင်ႉၶႅင်ႇထႅင်ႈ တီႈဝဵင်းလူင်တူၼ်ႈတီး ဝႃႈၼႆ။
“ၵွပ်ႈၼႆလႄႈ ၸဝ်ႈၼႃႈတီႈ တပ်ႉၵွင် 101 ၵေႃႈ ႁၼ်လီၵမ်ႉထႅမ်တၢင်းၵႃႈ ၾိင်ႈငႄႈၾိင်ႈထုင်းတႆးၼႆႉ ၼင်ႇႁိုဝ် တေမီးႁႅင်းၸႂ် လုၵ်ႈႁဵၼ်း ၶဝ်တင်းသဵင်ႈၼႆသေ ၸင်ႇလႆႈတွၼ်ႈသူး။ တွၼ်ႈတႃႇပီ 2025 ႁႂ်ႈ ပေႃးသိုပ်ႇႁဵတ်းယႂ်ႇၵႂၢင်ႈၵႂႃႇထႅင်ႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ပၢင်ယွင်ႈၵုင်ႇ တွၼ်ႈသူးလုၵ်ႈႁဵၼ်း ၸုမ်းတၢင်းၵႃႈ ၾိင်ႈငႄႈတႆး တီႈဝဵင်းမိူင်းပၼ်ႇ ပီၼႆႉ မီးၽူႈယႂ်ႇ ၵူႈႁွင်ႈၵၢၼ် ၶဝ်ႈ ႁူမ်ႈ 70 ၵေႃႉ လုၵ်ႈႁဵၼ်းၸုမ်းတၢင်းၵႃႈ 24 ၵေႃႉ ၼႆယဝ်ႉ။
