ဝၼ်းတီႈ 06 -07/08/2025 ၸွမ်ၽွင်းလူင်မိူင်းတႆး ၸုမ်းသိုၵ်းမၢၼ်ႈ ဢူးဢွင်ႇဢွင်ႇ ဢွၼ်ၼမ်းၽူႈၶဝ်ႈၸုမ်း၊ ဢိၵ်ႇၸုမ်းၶွင်ႇသီႇ ၾၢႆႇၵႅတ်ႇၶႄၸိူဝ်ႉၸၢတ်ႈမိူင်းႁူမ်ႈတုမ် ပဵၼ်တူဝ်တႅၼ်း ၸုမ်းလူင်ပွင်ၸိုင်ႈမိူင်းႁူမ်ႈတုမ် တႂ်ႈသိုၵ်းမၢၼ်ႈၵုမ်းၵမ်သေ ၵႂႃႇႁူပ်ႉထူပ်းၽူႈၼမ်း ၸုမ်းသိုၵ်းဝႃႉ (UWSA) တီႈဝဵင်းပၢင်သၢင်း။

ႁွင်ႈၵၢၼ်ၶၢဝ်ႇ ၸုမ်းသိုၵ်းဝႃႉ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ – ဝၼ်းတီႈ 6 ယၢမ်းဝၢႆးဝၼ်း တူဝ်တႅၼ်း ၸုမ်းလူင်ပွင်ၸိုင်ႈမိူင်းတႆး ႁွတ်ႈၽႅဝ်ဝဵင်းမိူင်းပွၵ်ႉသေ ႁူပ်ႉထူပ်းဢုပ်ႇဢူဝ်း ၸွမ်း ၽူႈမီးပုၼ်ႈၽွၼ်း ၼႂ်းဝဵင်းမိူင်းပွၵ်ႉယဝ်ႉ သိုပ်ႇၶၢဝ်းတၢင်းၵႂႃႇႁူပ်ႉထူပ်း ၽူႈၼမ်းၸုမ်းသိုၵ်းဝႃႉ တီႈဝဵင်းပၢင်သၢင်းထႅင်ႈ – ဝႃႈၼႆ။

တီႈပၢင်ႁူပ်ႉထူပ်းၵၼ်တင်းၸုမ်းသိုၵ်းဝႃႉၼၼ်ႉ ၸွမ်ၽွင်းလူင်မိူင်းတႆး ၸုမ်းသိုၵ်းမၢၼ်ႈ ဢူးဢွင်ႇဢွင်ႇ လၢတ်ႈၵႂႃႇဝႃႈ – “ၸွမ်းၼင်ႇၶေႃႈပူင် ငဝ်ႈငုၼ်းၶွင်ႇသီႇၾၢႆႇႁူမ်ႇလူမ်ႈလႄႈ ၵႅတ်ႇၶႄၸိူဝ်ႉၸၢတ်ႈ မိူင်းႁူမ်ႈတုမ် ၸီႉသင်ႇမႃးၼၼ်ႉတႄႉ ပေႃးထိုင်မႃး ၵၢင်လိူၼ်တီႊသႅမ်ႊပိူဝ်ႊ ပီ 2025 ၼႆႉ တေၵမ်ႉၸွႆႈႁဵတ်းသၢင်ႈပၼ်ၵႂႃႇ တႃႇႁႂ်ႈၶၵ်ႉၵၢၼ်ပၢႆးပၺ်ႇၺႃႇ၊ ပၢႆးယူႇလီလႄႈ ၼႃႈၵၢၼ်တၢင်ႇလွင်ႈ ၼႂ်းပိုၼ်ႉတီႈ သုၼ်ႇလႆႈၽွင်းငမ်းႁင်းၶေႃသိုၵ်းဝႃႉ မီးလွင်ႈၶိုၼ်ႈယႂ်ႇတိူဝ်းတွၼ်းၶိုပ်ႈၼႃႈၵႂႃႇ”- ဝႃႈၼႆ။

ဢၼ်ႁူပ်ႉထူပ်းၵၼ်ၵႂႃႇၼႆႉပဵၼ် ၸွမ်ၽွင်းလူင်မိူင်းတႆး (တႂ်ႈသိုၵ်းမၢၼ်ႈ) ဢူးဢွင်ႇဢွင်ႇ၊ ၽူႈၼမ်းၼႂ်း ၸုမ်းလူင်ပွင်ၸိုင်ႈမိူင်းတႆး ဢူးတၢၼ်ႉသျူႇဝိၼ်း၊ ၽွင်းလူင် ၸုမ်းလူင်ပွင်ၸိုင်ႈမိူင်းတႆး ဢူးမိၼ်းမိၼ်းလုၼ်ႇ၊ ၽူႈၵွၼ်းတိူင်းသိုၵ်း သၢမ်ၸဵင်ႇၶမ်း မိူင်းတႆးပွတ်းဢွၵ်ႇ ၸွမ်သိုၵ်းၸူဝ်းလၢႆႇ၊ ၽွင်းလူင်ၾၢႆႇႁူမ်ႇလူမ်ႈ ၶုၼ်သိုၵ်းလူင် သဵင်ႇဝိၼ်း ၶဝ်ႈႁူမ်ႈၸွမ်းသေ ၾၢႆႇတူဝ်တႅၼ်း ၸုမ်းသိုၵ်းဝႃႉ (UWSA) တႄႉ ၵႅမ်ႁူဝ်ပဝ်ႈ ဢူးလေႃးယႃႇၵူႉ ဢွၼ်ႁူဝ်ၼမ်းၼႃႈသေ ၶဝ်ႈႁူမ်ႈပၢင်ဢုပ်ႇဢူဝ်းၵႂႃႇၼႆ – ၾၢႆႇႁွင်ႈၵၢၼ်ၶၢဝ်ႇ ၸုမ်းသိုၵ်းဝႃႉ ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။

ၵဵဝ်ႇၵပ်းလူၺ်ႈ လွင်ႈၶေႃႈတူၵ်းလူင်း ႁူဝ်ယွႆႈၼႂ်းပၢင်ႁူပ်ႉထူပ်း ၸုမ်းတူဝ်တႅၼ်းသိုၵ်းမၢၼ်ႈလႄႈ ၸုမ်းသိုၵ်းဝႃႉၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇ တွင်ႈထၢမ်ဝႆႉတီႈ ၽူႈၶၢၼ်ပၢၵ်ႇ ၸုမ်းသိုၵ်းဝႃႉသေတႃႉ ဢမ်ႇႁပ်ႉတွပ်ႇပၼ်။ 

လႆႈႁူႉဝႃႈ ဝၢႆးလင် ႁူပ်ႉထူပ်းၵၼ်ယဝ်ႉ ၸုမ်းတူဝ်တႅၼ်းၾၢႆႇၽွင်းငမ်း တႂ်ႈသိုၵ်းမၢၼ်ႈ သိုပ်ႇၶၢဝ်းတၢင်း ၵႂႃႇတၢင်းၼႃႈလိၼ်ၶိုၵ်ႉတွၼ်းမၢႆ 4 ဝဵင်းမိူင်းလႃးထႅင်ႈ။ ၾၢႆႇမိူင်းလႃး တုၵ်းယွၼ်းသိုၵ်းမၢၼ်ႈ ႁႂ်ႈပူတ်းပၼ်ၶိုၼ်းၸိုဝ်ႈမိူင်းလႃး ဢၼ်ပိုၼ်ၽၢဝ်ႇဝႆႉပႃး ၼႂ်းပိူင်ၽွင်းငမ်းသိုၵ်း ၼႂ်း 63 ၸႄႈဝဵင်းၼၼ်ႉ ဝႃႈၼႆ။

လွင်ႈၼႆႉ ႁူဝ်ၼႃႈ တူဝ်တႅၼ်းၸုမ်းသိုၵ်းမၢၼ်ႈ ဢူးဢွင်ႇဢွင်ႇ လၢတ်ႈဝႃႈ – တေဢဝ်မိူဝ်းလၢတ်ႈပၼ် တၢင်းၼိူဝ်ၵူၺ်း – ဝႃႈၼႆ။

ပေႃးထိုင်မႃးႁၢင်ပီ 2025 လိူၼ်တီႊသႅမ်ႊပိူဝ်ႊၼႆႉ ၸွမ်ၸိၵ်းသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ ဢၼ်ယုၵ်ႉယွင်ႈၸဝ်ႈၵဝ်ႇ ၶိုၼ်ႈမႃးပဵၼ် ၸၼ်ႉၸွမ်ၸိုင်ႈၸူဝ်ႈၶၢဝ်း ၼႂ်းမိူင်းႁူမ်ႈတုမ်ဝႆႉၼၼ်ႉ တေၸတ်းႁဵတ်း ပၢင်လိူၵ်ႈတင်ႈပတ်းပိုၼ်ႉၸိုင်ႈမိူင်းၼႆလႄႈ ၼင်ႇႁိုဝ် တေပဵၼ်တၢင်းၵမ်ႉၸွႆႈ ပၢင်လိူၵ်ႈတင်ႈပွၵ်ႈၼႆႉ ႁႂ်ႈဢွင်ႇမၢၼ်ၼၼ်ႉ တႄႇႁူဝ်လိူၼ်ဢေႃႊ ၵတ်ႊသ်ၼႆႉမႃး ၸိူဝ်းပဵၼ်တူဝ်တႅၼ်း ၸုမ်းသိုၵ်းမၢၼ်ႈ ၵူႈႁွင်ႈၵၢၼ် ၸိူဝ်းၵဵဝ်ႇၶွင်ႈၼၼ်ႉ ဢွၼ်ၵၼ်ႁၢင်ႈႁႅၼ်းတူင်ႉၼိုင် တႄႇႁဵတ်းသၢင်ႈၵၢၼ်ငၢၼ်းဝႆႉယူႇ။

တႅမ်ႈ – ၽူၺ်းၼုမ်ႇ