ထွမ်ႇတူၺ်းၶေႃႈၵႂၢမ်းၸိုင် ၸုမ်းသိုၵ်းယိုတ်းမိူင်းၼႆႉ လုၵ်ႉတီႈၼၸၵ (နစက) ၶွင်ႇသီႇၽွင်းငမ်းၸိုင်ႈမိူင်းသေ လႅၵ်ႈပဵၼ်ၶွမ်ႊမသျိၼ်ႊႁူမ်ႇလူမ်ႈၸိုင်ႈမိူင်းယဝ်ႉၼႆ ပွင်ႇၸႂ်လႆႈငၢႆႈငၢႆႈသေတႃႉ ၽဝပၢၼ်ပဵၼ်ၵူၼ်းမိူင်းၼႆႉ တေတိူဝ်းၵပ်ႉၵိၼ်းၶၢၼ်ၸႂ်လိူဝ်ၵဝ်ႇတိူၵ်ႈတႅၵ်ႉယဝ်ႉ ဢၼ်ဝႃႈၼၼ်ႉ ႁူႉႁၼ်သႅၵ်ႇလႅၵ်ႇယူႇၵေႃႈ ၵွပ်ႈပိူဝ်ႈလိူဝ်ဢမ်ႇၸၢင်ႈလႄႈ ၵႃႈလႆႈမူၵ်းယူႇမူၵ်းၵိၼ်ၵႂႃႇၵူၺ်း။

ၶၢဝ်းႁူၵ်းလိူၼ် ၵွၼ်ႇပႆႇပဵၼ်ပၢင်လိူၵ်ႈတင်ႈ ႁူႉတေလႆႈယူႇၵႂႃႇမူထူမႃထႃယဝ်ႉ ၸိူဝ်းဝႃႈၼႆၵေႃႈတေမီးယူႇ။ ပေႃးၼႆ ဝၢႆးပၢင်လိူၵ်ႈတင်ႈယဝ်ႉ ၸွင်ႇသမ်ႉတေပူၼ်ႉလွတ်ႈထၢင်ႇႁၢင်ႈလူမ်ၸႂ်တႄႉယူႇႁႃႉ၊ ဢမ်ႇၼႄႉၼွၼ်းသႄႈ။

ၸုမ်းသိုၵ်းယိုတ်းမိူင်းၼႆႉ တႄႇၸဵမ်ဝၼ်းတီႈ 29 ပိုၼ်ဢွၵ်ႇပၵ်းပိူင်မူၼ်ႉမႄးၵၢၼ်လိူၵ်ႈတင်ႈဝႃႇ၊ ပၵ်းပိူင်ႁႄႉၵင်ႈ ပၢင်လိူၵ်ႈတင်ႈဝႃႇ၊ ပၵ်းပိူင်ႁၢမ်ႈႁႅတ်ႉၼိူဝ်ၵၢၼ်ဢွၼ်ႊလၢႆႊဝႃႇ ၶပ်ႉၶပ်ႉတၢမ်းတၢမ်း။

ထိုင်ဝၼ်းတီႈ 30 ႁဵတ်းပၢင်ၵိၼ်ၶဝ်ႈသုမ်လီသေ ပိုၼ်ၽၢဝ်ႇဝႃႈ ၵၢၼ်ၵုမ်းၵွၼ်းမၢၼ်ႈမိူင်းၶဝ် ယဝ်ႉတူဝ်ႈဢွင်ႇမၢၼ်ယဝ်ႉလႄႈ ဢႃႇၼႃႇဢၼ်ၶဝ်ယိပ်းၵမ်မႃး ၶၢဝ်းတၢင်း 4 ပီပၢႆ ၼၼ်ႉ တေဢူၼ်းမွပ်ႈပၼ် ၼႂ်းမိုဝ်းၶွင်ႇသီႇၵႅတ်ႇၶႄႁူမ်ႇလူမ်ႈၸိုင်ႈမိူင်း ဝႃႈၼႆ။

ၾၢႆႇၼိူဝ်ၶွင်ႇသီႇၵႅတ်ႇၶႄႁူမ်ႇလူမ်ႈသမ်ႉ မီးထႅင်ႈၶွမ်ႊမသျိၼ်ႊႁူမ်ႇလူမ်ႈၸိုင်ႈမိူင်း ဢၼ်ၸုမ်းသိုၵ်းတင်းပိုၵ်း ဢွၼ်ႁူဝ်ၵုမ်းၵမ် ၼၼ်ႉယဝ်ႉ။

တူၺ်းၽိဝ်မၼ်းတႄႉ တေႁၼ်ဝႃႈလုၵ်ႉတီႈၸွမ်သိုၵ်းလူင်မိၼ်းဢွင်ႇလၢႆႇ ဢူၼ်းမွပ်ႈပၼ် ၸွမ်ၸိုင်ႈမိၼ်းဢွင်ႇလၢႆႇ ၶိုၼ်းၵူၺ်း။

တီႈပွင်ႇလိုၵ်ႉၼႂ်းၸိုင် လုၵ်ႉတီႈၵွၼ်းၵုမ်းဝႆႉဢႃႇၼႃႇၸိုင်ႈမိူင်းသေ လႅၵ်ႈလၢႆႈၶိုၼ်ႈပဵၼ် ၸၼ်ႉယိုတ်းသိမ်းဢႃႇၼႃႇၵႂႃႇ ပဵၼ်တၢင်းၵၢၼ် ၼၼ်ႉယဝ်ႉ။

ၵွပ်ႈၼႆ ၸင်ႇပူင်ဢွၵ်ႇမႃး ၶေႃႈပိုၼ်ၽၢဝ်ႇတမ်းဝၢင်းလၢႆးၽွင်းငမ်းသိုၵ်း ၼႂ်း 63 ၸႄႈဝဵင်းဝႃႇ၊ ပၵ်းပိူင်ယုၵ်ႉလိူၵ်ႈၶိုၼ်း သုၼ်ႇလႆႈလႄႈ လွင်ႈႁူမ်ႇလူမ်ႈၵူၼ်းမိူင်းဝႃႇ ပေႃးဢမ်ႇၸၢင်ႈသုတ်းၸၢင်ႈသဵင်ႈ။

တီႈပွင်ႇတႄႉမၼ်းၸိုင် ၼႂ်းႁူၵ်းလိူၼ်ၵွၼ်ႇပႆႇႁဵတ်းလႆႈပၢင်လိူၵ်ႈတင်ႈၼႆႉ ပၵ်းပိူင်ဢၼ်ဝႃႈၼၼ်ႉ မီးၼႂ်းသူပ်းၼႂ်းပၢၵ်ႇၶဝ်လုမ်းလုမ်းယဝ်ႉ၊ ၶဝ်ႁဵတ်းသင်တီႈၵူၼ်းမိူင်းၵေႃႈ တိုၼ်းၶဝ်ႈတၢင်းၵၢၼ် တိုၼ်းမၢႆထိုင်ပဵၼ်လွင်ႈတဵင်ႈထမ်းယဝ်ႉ ၶႂ်ႈဝႃႈၼၼ်ၵူၺ်း။

ယၢမ်းလဵဝ် ယၼ်ၼိူဝ်ၶေႃႈဢၢင်ႈဢၼ်ဝႃႈ တေႁဵတ်းပၢင်လိူၵ်ႈတင်ႈသေ ၼႂ်းၶၢဝ်းယၢမ်းႁူၵ်းလိူၼ် ၶဝ်တေထၢင်ႇႁၢင်ႈႁဵတ်းသင်လၢႆလၢႆ … တေတိုၵ်းဢဝ်ၶိုၼ်း ၸိူဝ်းၸႄႈဝဵင်းဢၼ် ၶဝ်လႆႈပွႆႇသုမ်း။

တေထင်ႉယူႇတီႈပၢင်သဝ်းတပ်ႉ ဢၼ်ၶဝ်ၸၢင်ႈယူႇလႆႈဝႆႉၼၼ်ႉသေ ၸၼ်ၶၢဝ်းယၢမ်းတေႃႇထိုင် ၾၢႆႇလုၵ်ႉၽိုၼ်ႉ ပေႃးၸွပ်ႈယွၼ်ႇၵႂႃႇ။ မိူၼ်ဝႃႈ တေၵုမ်းႁႂ်ႈၸႄႈဝဵင်း 267 ဢၼ်ၶဝ်ဝႃႈ တေႁဵတ်းႁႂ်ႈပဵၼ်ပၢင်လိူၵ်ႈတင်ႈၼၼ်ႉၵႅၼ်ႇၶႅင်။

လိူဝ်ၼၼ်ႉ ဢမ်ႇလိူၵ်ႈမိုဝ်ႉလိူၵ်ႈယၢမ်းသေ တေဢၢၼ်းၶဝ်ႈတိုၵ်း 63 ၸႄႈဝဵင်း ဢၼ်ၶဝ်ပိုၼ်ၽၢဝ်ႇဝႃႈ မီးတႂ်ႈၵၢၼ်ၽွင်းငမ်းပိူင်သိုၵ်း ၼၼ်ႉယဝ်ႉ။

ထႅင်ႈၾၢႆႇၼိုင်ႈတႄႉ တေၶုတ်းၶႃႁႃၶူၼ်ႉၶၢႆဢွၵ်ႇ ၶူဝ်းၶွင်ႁႄႈလိၼ်လႄႈ ၼႃႈၵၢၼ်ၾင်တိုၼ်း ပႅင်ႈၼင်ႇတိုတ်ႉတၢႆး ၶိုတ်းထိုင်လႆႈၼၼ်ႉ ပိူဝ်ႈတႃႇၼႄလႆႈၾၢင်ႁၢင်ႈလွင်ႈဝႃႈ ၶဝ်ၼႆႉ ၸင်ႇၸႂ်ႈလူင်ပွင်ၸိုင်ႈလႄႈ လွင်ႈဝႃႈသၢႆငၢႆမိူဝ်းၼႃႈၸိုင်ႈမိူင်း မီးဝႆႉၼႂ်းမိုဝ်းၶဝ်ၼၼ်ႉယဝ်ႉ။

ယၼ်ၼိူဝ်ငိုၼ်းလႆႈမႃးသေ တေသိုပ်ႇယုၵ်ႉသၢင်ႈမႃႇႁႅင်းသိုၵ်းၶဝ်၊ ပိူင်ယႂ်ႇ တေဝႆႉၼၵ်းယုၵ်ႉသၢင်ႈႁႅင်းတိုၵ်း ၾၢႆႇသၢႆမိၼ်လႄႈ တရူၼ်ႊ။

ၵၢၼ်ၵဵပ်းၵူၼ်းမႂ်ႇၶဝ်ၼၼ်ႉၵေႃႈ တေၶတ်းၸႂ်သႂ်ႇႁႅင်းႁဵတ်းလိူဝ်ၵဝ်ႇယူႇ၊ ယွၼ်ႉႁႅင်းသိုၵ်းမႂ်ႇၵမ်ႈၼမ်သေ ၶဝ်ၸင်ႇယိုတ်းလႆႈၶိုၼ်း ၼွင်ၶဵဝ်၊ ၽိတ်ႉၶျၢင်းၼၼ်ႉယိုင်။

ယွၼ်ႉႁႅင်းသိုၵ်းမႂ်ႇၸိူဝ်းၼႆႉၵူၺ်းၼင်ႇၵဝ်ႇ ၶဝ်ၸင်ႇၸၢင်ႈဢဝ်ႁဵတ်းတႅၼ်ႈမီးၸႂ်သေ ၸီးၶဝ်ႈလႆႈၽႃၵၢၼ်ႉ၊ မၢၼ်ႈမေႃႇ၊ ႁူၺ်ႈၵူႈ ၸဵမ်ၸိူဝ်းၼႆႉၶႃႈလူး။

လိူဝ်သေၼႆႉ ယၼ်ၼိူဝ်မိူင်းၶႄႇ၊ ဢိၼ်းတီးယိူဝ်း၊ ထႆးလႄႈ ရတ်ႉသျႃး ၸဵမ်ၸိူဝ်းၼႆႉ ၵမ်ႉထႅမ်ႁၼ်လီၼိူဝ် လွင်ႈၶတ်းႁႅင်းၶိုင်ပဵၼ်ပၢင်လိူၵ်ႈတင်ႈသေ ၶဝ်တေၽိုတ်ႉၶဝ်ႈၸူးၵူႈမိူင်းမိူင်း ႁႂ်ႈပေႃးယွမ်းႁပ်ႉသိုဝ်ႇသၢၼ်ႇတေႃႇၶဝ် လူၺ်ႈလၢႆးၵၢၼ်ၽွင်းတၢင်ၼၼ်ႉယဝ်ႉ။

ၸၢမ်းႁႂ်ႈပၢင်လိူၵ်ႈတင်ႈၶဝ် ယဝ်ႉတူဝ်ႈၵႂႃႇလႃႈ ဢမ်ႇၵႃးၵူၺ်း မိူင်းၶႄႇ၊ ဢိၼ်းတီးယိူဝ်း၊ ထႆးလႄႈ ရတ်ႉသျႃး ၸိူဝ်းၼႆႉ ၵူႈမိူင်းမိူင်း ဢၼ်ဢမ်ႇယုၵ်ႉလိူၵ်ႈဝႆႉ သၢႆၵၢၼ်ၽွင်းတၢင်ၶဝ်ၼၼ်ႉ ႁူႉတၵ်းတေၶိုၼ်းတူင်ႉတိုၼ်ႇ ၶဝ်ႈဢွၵ်ႇတေႃႇလူင်ပွင်ၸိုင်ႈမႂ်ႇ ဢၼ်လုၵ်ႉတီႈ ၸုမ်းသိုၵ်းယိုတ်းမိူင်း လွၵ်ႈၶၢပ်ႈၶိၼ်ပဵၼ်မႃးၼၼ်ႉယူႇၵူၺ်း။

ၵမ်းၼႆႉ ပေႃးၶိုၼ်းလုၵ်ႉတီႈ ၶွမ်ႊမသျိၼ်ႊသိုၵ်း ပိၼ်ႇပဵၼ်လူင်ပွင်ၸိုင်ႈလုၵ်ႈၶိုင်ႈသိုၵ်းယဝ်ႉပႄႇ ၸုမ်းၸၢဝ်းၶိူဝ်း ၸိူဝ်းလုၵ်ႉၽိုၼ်ႉၶဝ် တေၸုၵ်းၸင်ႈၸိူင်ႉႁိုဝ်၊ တေသိုပ်ႇလုၵ်ႉၽိုၼ်ႉႁႃႉ ဝႃႈလႃးတေမႃႈႁႃႁဵတ်းၵေႃႉတေႃႇ ၸုမ်းလူင်ပွင်ၸိုင်ႈလုၵ်ႈၶိုင်းသိုၵ်းသေ ႁူမ်ႈၵိၼ်ႁူမ်ႈငၢၼ်ႈ တႂ်ႈႁူမ်ႈၵိုတ်းတိုၵ်းငမ်းယဵၼ်ပွမ်ၼၼ်ႉၼႄႇ။

ဢမ်ႇၼၼ် တေႁူမ်ႈၶွတ်ႇၽၼ်ႈ တပ်ႉႁူမ်ႈတုမ်လုၵ်ႉၽိုၼ်ႉသေ ၶိုၼ်ႈၼႃႈတေႃႇသူႈ လၢႆးမူတၢႆမႃမၢတ်ႇႁႃႉၼႆ ထိုင်ယၢမ်းတေလႆႈလိူၵ်ႈပႆ တႅၵ်ႇလႅင်းပုတ်းၶၢတ်ႇယူႇယဝ်ႉ။

ငဝ်းလၢႆးဢၼ်ပဵၼ်ယူႇမီးယူႇၼႆႉ ႁူမ်ႈဝႃႈၾၢႆႇၸုမ်းသိုၵ်းယိုတ်းမိူင်း ဢမ်ႇပႆၸွမ်းသဵၼ်ႈတၢင်းပဵၼ်ထမ်းၵေႃႈယဝ်ႉ တႃႈမုင်ႈမၼ်းတိုၼ်းၸႅင်ႈလႅင်းပုတ်းၶၢတ်ႇ၊ ၼင်ႇႁိုဝ် တေလႆႈ ဢႃႇၼႃႇ တိူၵ်ႈတီႈလႆႈဢဝ်သၢႆၸႂ်ၵူၼ်း ၼပ်ႉဢၢၼ်ႇမိုၼ်ႇၵႆႈလႅၵ်ႈၵေႃႈ ၶဝ်တိုၼ်းသိူဝ်းလႆႈႁဵတ်းယဝ်ႉ။

ၾၢႆႇလုၵ်ႉၽိုၼ်ႉပႄႇ တိုၵ်ႉတေဝႃႈ ၸုမ်းၵဝ်ၸုမ်းမႂ်း၊ ၶိူဝ်းၵဝ်ၶိူဝ်းမႂ်း ၽႂ်တိုၵ်းလႆႈမၼ်းဢဝ်ယူႇၵူၺ်းၸိုင် ထိုင်တီႈၵမ်ႇၾႃႇလွင်ႇ ၸင်ႇၸၢင်ႈၶိုၼ်းၽိုၼ်ႉလႆႈယူဝ်ႉ တႃႉလီဝႃႈၼႆယူႇႁင်းၵၼ်ယဝ်ႉ။ ယွၼ်ႉပိူဝ်ႈ လၢႆးၵႃၼႄးၵဝ်ႉ ၵဝ်ႉၼႄးၵႃ ဢမ်ႇၶႆႈႁႃငိူၼ်ႈသေၶုတ်းၶၢတ်ႇမူၺ်ႉပႅတ်ႈၼၼ်ႉ ႁဝ်းဢမ်ႇတွၼ်ႉတတ်းၶၢတ်ႇၵၼ်လႆႈ ဢမ်ႇၸႂ်ႈၶႃႈႁိုဝ်။

ၵမ်းၼႆႉ ယင်းပႆႇႁူႉတူဝ်ၵေႃႈ တၵ်းလႆႈမူၵ်းႁူဝ်သွၼ်ႉသေႃႈ တႂ်ႈသွၵ်းတိၼ်သိုၵ်းထႅင်ႈ ပီယၢဝ်းၶၢဝ်းၵႆ ၵႂႃႇၼႃႈ မိူဝ်းႁိုင်ၵူၺ်းယဝ်ႉ။