ၵၢပ်ႈပၢၼ်မႂ်ႇၼႆႉ   ၵႆႉႁၼ်လဵင်ႉလူသတ်းဝႆႉၵိုၵ်းႁိူၼ်းယေး ။ ဝႆႉၸႂ်မိူၼ်ၵူၼ်းႁူမ်ႈႁိူၼ်းၵေႃႉၼိုင်ႈလူးၵွၼ်ႇ ။ ၵူၺ်းၵႃႈ သတ်းဢၼ်ဢဝ်မႃးလဵင်ႉၵိုၵ်းႁိူၼ်းၸိူဝ်းၼၼ်ႉ သင်ဝႃႈ ႁၵ်ႉၶဝ်လၢႆလၢႆၵူၺ်း ဢမ်ႇမေႃလုမ်းလႃးၶဝ်ၸိုင် ၸၢင်ႈပဵၼ်ၽေးတေႃႇတူဝ်ၸဝ်ႈၵဝ်ႇၶိုၼ်းယူႇ။ၵူၼ်းၸိူဝ်းႁၵ်ႉမႃသေ လဵင်ႉမႃဝႆႉ ၵူၺ်းၵႃႈ ဢမ်ႇမီးလွင်ႈသမ်းယႃႁႄႉၵင်ႈတၢင်းပဵၼ်ဝႆႉၼႆ ဢမ်ႇသၢင်ႇတေႃႇၺႃးၶူပ်းၶိုၼ်းသေ ၵွင်ႉမႃၼၼ်ႉ တေၸွတ်ႇၼႂ်းတူဝ် ၸၢင်ႈၸပ်းတၢင်းပဵၼ်မႃမႃႈ သေထိုင်တၢႆလႆႈ။

မိူဝ်ႈလုမ်ႈၾႃႉ ပႆႇပိုတ်ႇပၢင်ႇ မိူင်းၼိုင်ႈလႄႈမိူင်းၼိုင်ႈ ပႆႇတိတ်းတေႃႇၵပ်းသိုပ်ႇၵၼ်လႆႈၼၼ်ႉတႄႉ ၾိင်ႈမိူင်းၼိုင်ႈလႄႈမိူင်းၼိုင်ႈၵေႃႈ ပႆႇၶူၼ်းၶဝ်းလေႃးလႄးၵၼ်။ တိုၵ်ႉယူႇၸွမ်းၾိင်ႈၽႂ်ထုင်းမၼ်းၵူၺ်း။ ဝၢႆးသေ လူၵ်ႈလုမ်ႈၾႃႉၼႆႉ လႅၵ်ႈလၢႆႈပဵၼ်ၵၢပ်ႈဢၢႆႊထီႊယဝ်ႉတႄႉ ယူႇမိူင်းလႂ် ၵုၼ်လႂ်ၵေႃႈ ၵပ်းသိုပ်ႇႁူႉႁၼ်လွင်ႈၽႂ်မၼ်းလႆႈ။

ဢိင်ၼိူဝ်လွင်ႈ ႁူႉၾိင်ႈၵၼ်မႃးငၢႆႈငၢႆႈသေ ဢမ်ႇယူႇတီႈလဵဝ်ၵၼ်သေတႃႉ မေႃယိူင်ႈၵၼ်မႃး။ ၸဵမ်ဢဝ်လွင်ႈၵိၼ်လွင်ႈယူႇ လွင်ႈႁဵတ်းသၢင်ႈတူင်ႉၼိုင်မိူၼ်ၵၼ်မႃး။ ပေႃးတူၺ်း လွင်ႈလဵင်ႉသတ်းတီႈႁိူၼ်းၼႆၵေႃႈ မေႃယိူင်ႈၵၼ် မေႃသူင်ၵၼ်မႃး။

ၵၢၼ်လဵင်ႉသတ်းတီႈႁိူၼ်းၼႆႉ မိူဝ်ႈလၢႆပၢၵ်ႇပီပူၼ်ႉမႃးၵေႃႈ လဵင်ႉယူႇသေတႃႉ ဢမ်ႇသူႈဢဝ်ႁွပ်ႇဢဝ်ဢုမ်ႈ ဢမ်ႇသူႈဢဝ်ဝႆႉၼႂ်းႁိူၼ်းၼိူဝ်ၵူႇၼိူဝ်ၽိူၼ် ၊ ၵၢပ်ႈပၢၼ်မႂ်ႇၼႆႉတႄႉ ဝႆႉမိူၼ်ၼင်ႇ ၵူၼ်းႁူမ်ႈႁိူၼ်းၵေႃႉၼိုင်ႈၼၼ်ႉယူႇ။

မိူဝ်ႈၸူဝ်ႈပူႇပၢၼ်မွၼ်ႇၼၼ်ႉတႄႉ မီးလွင်ႈလဵင်ႉလူ မူမႃၵႃၵႆႇၵိုၵ်းႁိူၼ်းယူႇသေတႃႉ ၵမ်ႈၼမ်ဝႆႉၸွမ်း သၽႃႇဝ ပိူင်ပဵၼ်မၼ်းၵူၺ်း ဢမ်ႇဢဝ်မႃးၸုပ်ႇမႃးၼူမ်။ၸူဝ်ႈႁူဝ်ပၢၵ်ႇပီ 21 ၼႆႉတႄႉ မီးမႃးၵူႈလၢႆး မူ မႃ မႅဝ်း ၵႆႇ ၼူၵ်ႉ – လိူဝ်ၼၼ်ႉ ၸိူဝ်းဢဝ်ငူး ဢဝ်ၶဵတ်ႇမႃးလဵင်ႉၵိုၵ်းႁိူၼ်းၵေႃႈ မီးမႃး။

ၼႂ်းတွၼ်ႈၼႆႉ ၶႂ်ႈလၢတ်ႈၼႄလွင်ႈ တၢင်းပဵၼ်မႃမႃႈ ဢၼ်ၾၢႆႇမၢၼ်ႈႁွင်ႉဝႃႈ ခွေးရူး ၼႆၼၼ်ႉ။  တၢင်းပဵၼ်သႅၼ်းၼႆႉ သင်ဝႃႈ မၼ်းသေလႆႈပဵၼ်ယဝ်ႉ လူႉသဵင်ႈသၢႆၸႂ်လႆႈ။ မိူဝ်ႈပဵၼ်ယူႇၼၼ်ႉၵေႃႈ တေလိူဝ်ၸႂ်ႁႅင်း ဢမ်ႇၵုမ်းတူဝ်ၵုမ်းၸႂ်လႆႈ။

ဢၼ်လႆႈ ၸပ်းတၢင်းပဵၼ်မႃမႃႈၼႆႉ ၵမ်ႈၼမ် တေပဵၼ်ယွၼ်ႉ သတ်းလဵင်ႉတီႈႁိူၼ်း မိူၼ်ၼင်ႇ မႃ ၊ မႅဝ်း ၊ မႃႉ ၊ ဝူဝ်း ၊ ပႄႉ လႄႈ သတ်းၼႂ်းထိူၼ်ႇ ဝိင်ႇ ၊ မူၼ်ႈ ၊ မႃလိၼ် ၊ လိင်း ၊ ၸွၼ်ႈ ၸဵမ်ၸိူဝ်းၼႆႉ။ လိူဝ်သေၼၼ်ႉ သတ်းထႅင်ႈလၢႆသႅၼ်းၵေႃႈ ၸၢင်ႈပဵၼ်လႆႈထႅင်ႈ။

တၢင်းပဵၼ်သႅၼ်းၼႆႉ ပေႃးဢဝ်ၾၢႆႇပၢႆးမေႃယႃၶဝ်လၢတ်ႈတႄႉ တေႁွင်ႉဝႃႈ Rabies Virus ၊ ပဵၼ်ၸိူဝ်ႉမႅင်းသႅၼ်းၼိုင်ႈ ဢၼ်ၸပ်းမႃးတီႈသတ်း။

လွင်ႈဢၼ်တေႁဵတ်းႁႂ်ႈၵူၼ်းၼိုင်ႈၵေႃႉ တိတ်းၸပ်းလႆႈၼၼ်ႉတႄႉ ဢမ်ႇၸႂ်ႈဝႃႈ ၺႃးသတ်းၸိူဝ်းၼၼ်ႉၶူပ်းၵူၺ်း မိူဝ်ႈတူဝ်ၸဝ်ႈၵဝ်ႇမီးႁွႆးၸဵပ်းသေတီႈတီႈ သမ်ႉၵႂႃႇတိူဝ်ႉၺႃးၼမ်ႉလၢႆးမႃႇမႅဝ်းၸိူဝ်းၼႆႉၵေႃႈ ၸၢင်ႈၸပ်းၸိူဝ်ႉမႅင်းလႆႈငၢႆႈ။ ပေႃးဢမ်ႇမီးႁွႆးၸဵပ်းသင်ဝႆႉတႄႉ မႃ မႅဝ်း ၸိူဝ်းၼႆႉ လေးၵေႃႈ တေဢမ်ႇပဵၼ်သင် ။

သင်ဝႃႈ ၺႃးၸိူဝ်ႉမႅင်းလႄႈ ၵွင်ႉငူၼ်ႉသတ်းၸိူဝ်းၼၼ်ႉ လၢမ်းတူဝ်ႈထိုင်ၼႂ်းတူဝ်ၵူၼ်းယဝ်ႉၸိုင် တေၸိုမ်းၶဝ်ႈထိုင် သၢႆဢႃရူင်ႇ ႁိုဝ် သၢႆလိူတ်ႈဢွၵ်းဢေႃႈၸိူဝ်း ၼႆႉၵမ်းလွႆးလွႆး။

သင်ဝႃႈ  ၵူၼ်းၵေႃႉၼိုင်ႈ ၺႃးၸိူဝ်ႉမႅင်းတၢင်းပဵၼ်မႃမႃႈ လၢမ်းၶဝ်ႈထိုင်ၼႂ်းတူဝ်ယဝ်ႉတႄႉ ၼိူဝ်ႉလိူတ်ႇၼိူဝ်ႉမႆႈ တေၼၢဝ် ၊ ၶေႃးၸဵပ်း ၊ ဢမ်ႇၵိၼ်ဢမ်ႇယမ်ႉ ၊ ဢဵၼ်ၼႂ်းတူဝ်တေတိုတ်ႉတေၸၼ်  တေၸၢင်ႈလိုမ်းတူဝ် ၊ ပဵၼ်ငၢၼ်း  ၊ ႁူဝ်ၶႆႈ ၊ ၶူပ်းၶိုၼ်ႈ ၸဵမ်ၸိူဝ်းၼႆႉ။

သင်ဝႃႈ ႁၢင်ႈႁၢႆႉမႃးလိူဝ်ၵဝ်ႇတႄႉ ၼွၼ်းဢမ်ႇလပ်း ၊ မီးၸႂ်ၵူဝ်ႁႄ ၊ တေၵူဝ်ၼမ်ႉၵူဝ်လူမ်း ၊ ၸႂ်ႁုပ်ႇၸႂ်ႁဵဝ် ၊ ၸႂ်သၼ်ႇ ၊ ၶႂ်ႈတဵၼ်ႈၶႂ်ႈမႃႈ ယွၼ်ႉသၢႆလိူတ်ႈဢွၵ်းဢေႃ ႁဵတ်းၵၢၼ်ဢမ်ႇမိူၼ်ၵဝ်ႇ၊  ၵၢမ်ႈၼိူဝ်ႉၸိူဝ်းၼႆႉ တေၸဵပ်း ၊ တေၶႂ်ႈဢေႃႉၶႂ်ႈႁၢၵ်ႈ ၊ ၼမ်ႉလၢႆးပုၼ်း ၊ ၼႃႈတႃတေပိူင်ႈ ၊ သင်ဝႃႈ ၵိၼ်တၢင်းၵိၼ်ၵေႃႈ တေဢိုၼ်လူင်းၶေႃးယၢပ်ႇ ၊ ၶေႃးတေၶူမ်းတေၸဵပ်း ၊ တွင်ႉႁႄႈတွင်ႉၵႂႃႇ ၊ တီႈဢၼ်မီးႁွႆးၶူပ်းၼၼ်ႉ တေမႆႈတေလိူတ်ႇတေယူႇယၢပ်ႇၵိၼ်းၸႂ် ၊ ၵမ်းလိုၼ်း ၸၢင်ႈသုတ်းသဵင်ႈသၢႆၸႂ်။

သင်ဝႃႈ သတ်းသေသႅၼ်းသႅၼ်း ၸပ်းတၢင်းပဵၼ် ၵေႃႈ တေမီးပိူင်ၾၢင်မၼ်းၵိုင်ႉၵၢင်ႉလႅၵ်ႈလၢႆႈ ၊ တေမႃႈတေတဵၼ်ႈသေ လမ်းၶူပ်းတူဝ်ဢၼ်ၶဝ်ႁၼ် ၊ ၼမ်ႉၵႃႉတေယွႆႉ ၊ တေဢမ်ႇၵိၼ်ဢမ်ႇယမ်ႉ ၊ ၵမ်းလိုၼ်းထိုင်တီႈ ဢမ်ႇတူင်ႉတူဝ်လႆႈ ။

ဢမ်ႇၸႂ်ႈဝႃႈ တေၺႃးမႃၶူပ်း မႅဝ်းၶူပ်းသေ တေၼႄပိူင်ၾၢင်တၢင်းပဵၼ်ၵမ်းလဵဝ် ။ ဢိင်ၼိူဝ် ႁႅင်းၵမ်ႉတူဝ်လီဢမ်ႇလီ ၊ ယူႇတီႈႁွႆးၸဵပ်းၼၼ်ႉ ၸမ်ႁႃႉၵႆဢွၵ်းဢေႃၼၼ်ႉသေ တၢင်းပဵၼ်ၼၼ်ႉ ၸင်ႇတေၼႄပိူင်ၾၢင်မႃး။

သင်ဝႃႈ ပိူင်ၾၢင်တၢင်းပဵၼ်မႃမႃႈၼၼ်ႉ ဢွၵ်ႇယဝ်ႉတႄႉ ၵမ်ႈၼမ် တေယူတ်းယႃဢမ်ႇလႆႈသေ တေပဵၼ်ထိုင်သုတ်းသဵင်ႈသၢႆၸႂ်။ တေဢမ်ႇမီးယႃႈယႃဢၼ်လႂ် ယူတ်းယႃၶႅၼ်းလႆႈ ၼႆ မေႃယႃယိင်း CDM ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

သင်ဝႃႈ ၺႃးသတ်းသေသႅၼ်းသႅၼ်း ၶူပ်းၸဝ်ႈၵဝ်ႇၸိုင် ႁႂ်ႈဢဝ်ၼမ်ႉလၢင်ႉ ၊ ဢဝ်ၵွၼ်ႈသီ သုၵ်ႈလၢင်ႉပၼ် မွၵ်ႈ 15 မိၼိတ်ႉ ၊ ဢဝ်ၼမ်ႉယႃလၢင်ႉၸိူဝ်ႉမႅင်း ၸိူဝ်းၼႆႉ လၢင်ႉပႃး ။

မိူဝ်ႈတိုၵ်ႉႁဵတ်းလွင်ႈမူတ်းသႂ်ယူႇၼၼ်ႉ သင်ဝႃႈ လိူတ်ႈဢွၵ်ႇၼမ်ၸိုင် ႁႂ်ႈဢဝ်ၽႅၼ်ႇဢၼ်မူတ်းသႂ်ၼၼ်ႉ မႃးပူၵ်ႉဝႆႉ တူမ်းဝႆႉ။

ဝၢႆးၼၼ်ႉ ႁႂ်ႈၵႂႃႇႁူင်းယႃ ႁွင်ႈယႃ ဢၼ်ၸမ်ၸဝ်ႈၵဝ်ႇၼၼ်ႉသေ သမ်းယႃႁႄႉၵင်ႈတၢင်းပဵၼ်သတ်း ၸဵမ်ပႃး တၢင်းပဵၼ်မႃမႃႈ ၸိူဝ်းၼႆႉ ။ ၸင်ႇတေဢမ်ႇလႆႈၼႅင်ၸႂ်ဝၢႆးလင် ။

ႁူႉဝႆႉၶႅၼ်းသေဝႆႉႁူႉ – ႁႂ်ႈတူဝ်ၵဝ်ႇ မေႃလဵပ်ႈႁဵၼ်းဝႆႉပႃး လွင်ႈႁႄႉၵင်ႈတၢင်းပဵၼ်မႃမႃႈ ၊ တေလႆႈသမ်းယႃ ၵိၼ်ယႃၸိူင်ႉႁိုဝ်ၵေႃႈ ႁဵတ်းၸွမ်းၼင်ႇ မေႃယႃၶဝ်သင်ႇ လီတီႈသုတ်း။

သတ်းဢၼ်ယူႇၸွမ်းႁိူၼ်းယေးၸိူဝ်းၼႆႉ ဢမ်ႇၵွမ်ႉမႃလႄႈမႅဝ်းၵူၺ်း သင်ဝႃႈ ပဵၼ်သတ်းလဵင်ႉလူဝႆႉတီႈႁိူၼ်းၸိုင် ႁႂ်ႈဢဝ်သမ်းယႃႁႄႉၵင်ႈတၢင်းပဵၼ်ဝႆႉ ၸင်ႇတေလွတ်ႈၽေး။ပိူင်ယႂ်ႇသုတ်းၵေႃႈ ယႃႇႁႂ်ႈသတ်းၸိူဝ်းၼၼ်ႉ သၵ်း  ၶူပ်း ငၢၼ်ႈ ။

သင်ထူပ်းႁၼ်  မႃ မႅဝ်း ဢၼ်ယူႇၶၢင်ႈတၢင်းၸိူဝ်းၼၼ်ႉသေ မီးၸႂ်ငမ်းငဝ်းဝႃႈ တေမီးလူမ်းမႃမႃႈ ၼႆၸိုင် ႁႂ်ႈပွင်ႇၶၢဝ်ႇပၼ် ၵူၼ်းႁိမ်းႁွမ်းလႄႈသင် ၽူႈၵဵဝ်ႇၶွင်ႈၸိူဝ်းၼႆႉလႄႈသင် ၸိူဝ်းၼႆႉ။

ႁႂ်ႈၵူၼ်းႁိမ်းဢမ်ႇႁႂ်ႈထူပ်းလွင်ႈႁၢႆႉၸႃႉၸိူဝ်းၼႆႉ။ယွၼ်ႉဝႃႈ ၵၢပ်ႈယၢမ်းလဵဝ် ဢၼ်ဝႆႉမဝ်မၢင်ၼိူဝ်လွင်ႈသတ်းသေ တၢႆယွၼ်ႉ တၢင်းပဵၼ်မႃမႃႈမႃး ၼမ်ၼႃႇယဝ်ႉ။