မိူဝ်ႈၼႆႉ ဝၼ်းတီႈ 4 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇ ၼႂ်းဝဵင်းၵျွၵ်ႉမႄး ၼႃႈတီႈသိုၵ်းတဢၢင်း ၵုမ်းၵမ်ၸူဝ်ႈၶၢဝ်း ၸိုင်ႈတႆးပွတ်းႁွင်ႇ။

ၵူၼ်းမိူင်းၵေႃႉယူႇၼႂ်းဝဵင်းၵျွၵ်ႉမႄး လၢတ်ႈၼႄဝႃႈ “ တိုၵ်ႉမႃးပွႆႇၵႂႃႇ မိူဝ်ႈၵႆႈၼႆႉ။ ပဵၼ်တၢင်းလႂ်တေႉတေႉတႄႉၵေႃႈ ပႆႇလႆႈႁူႉၸွမ်း။ မၢၵ်ႇၵႂႃႇတူၵ်းတၢင်း ပွၵ်ႉ 6 ၼၼ်ႉ – တူၵ်းႁိမ်းၵၢတ်ႇ တႃႈရူတ်ႉၾႆး – တၢင်းၼႃႈႁွင်ႈယႃ “ၸေႇယႃႇၽဵဝ်း” ၼႆ။ ၵူၼ်းမၢတ်ႇၸဵပ်းလူႉတၢႆတႄႉပႆႇလႆႈႁူႉၸွမ်း ” ၼႆယဝ်ႉ။

ဝဵင်းၵျွၵ်ႉမႄးၼႆႉပႃးၼႂ်း 63 ဝဵင်းဢၼ်သိုၵ်းမၢၼ်ႈပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉ မိူဝ်ႈဝၼ်းတီႈ 31/07/2025 ၼၼ်ႉသေ ဝႃႈတေၸတ်းၽႅၼ်တိုၵ်း တေႃႇ ၼႆၼၼ်ႉ။ ၵူၼ်းပၵ်းတႃၵၢၼ်မိူင်းၶဝ်လၢတ်ႈဝႃႈ ဝဵင်းၸိူဝ်းပႃးၼႂ်းသဵၼ်ႈမၢႆသိုၵ်းမၢၼ်ႈပိုၼ်ၽၢဝ်ႇၼၼ်ႉ ၸၢင်ႈၺႃးႁိူဝ်းမိၼ်သိုၵ်းမၢၼ်ႈ မႃးပွႆႇမၢၵ်ႇလႄႈ ႁႂ်ႈၵူၼ်းမိူင်းၾၢင်ႉယူႇၾၢင်ႉၵိၼ်ပႃး ဝႃႈၼႆဝႆႉ။

တႅမ်ႈ-ၽူၺ်းၼုမ်ႇ