ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်း ၼႂ်းႁၢင်ပီ 2025 ဢမ်ႇၼၼ် ႁူဝ်ပီ 2026 ၼႆႉ သိုၵ်းမၢၼ်ႈ ယိုတ်းမိူင်း ႁၢင်ႈႁႅၼ်းဝႆႉ တေၸႂ်ႉတိုဝ်းၶိူင်ႈၸၢၵ်ႈသေ ႁႂ်ႈၵူၼ်းမိူင်းပၼ်သဵင်ၵၢင်ၸႂ်ၵႂႃႇ ပိူဝ်ႈတႃႇပဵၼ်တၢင်းၵမ်ႉယၼ် ၼႂ်းၶၵ်ႉၵၢၼ်ပၢင်လိူၵ်ႈတင်ႈ ၼႆယူႇ။

ၶေႃႈမုလ်းလပ်ႉ ၶႃႈႁၢပ်ႇၵၢၼ်ၶုၼ် ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ဝႆႉၼၼ်ႉ လၢတ်ႈဝႃႈ – ၵုမ်းၵမ် ၵႅတ်ႇၵင်ႈဝႆႉၼႅၼ်ႈၼႅၼ်ႈၼႃၼႃၼႆၼၼ်ႉ ၼႂ်းလိူၼ်ၵျူႊလၢႆႊၼႆႉ ၺႃးၸုမ်းႁဵတ်းၵၢၼ်တူင်ႇဝူင်းၵူၼ်း ၸိူဝ်း ၵတ်ႉၶႅၼ်ႇၾၢႆႇဢၢႆႊထီႊ (IT) ၶဝ် လၵ်ႉၶဝ်ႈၼႂ်း Server ၵဵပ်းၶေႃႈမုလ်းလမ်ႇလွင်ႈ သိုၵ်းမၢၼ်ႈ ၼၼ်ႉသေ ၶဝ်ႈႁႅၵ်ႉ (Hack) ဢဝ်ၵႂႃႇ ပိူဝ်ႈတႃႇပိုၼ် ၽႄ သူင်ႇပၼ်တီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းတိုၵ်ႉပိုတ်းယိုဝ်းတိုၵ်းတေႃးၽဵဝ်ႈမူၺ်ႉ ၸုမ်းသိုၵ်းမၢၼ်ႈယိုတ်းမိူင်းၼၼ်ႉယူႇ – ဝႃႈၼႆ။

ၶေႃႈမုလ်းလမ်ႇလွင်ႈသိုၵ်းမၢၼ်ႈ ၸိူဝ်းၺႃးႁႅၵ်ႉမႃးၼၼ်ႉ ပဵၼ်ၶေႃႈမုလ်း ၵူၼ်းၸိူဝ်းတိုၵ်ႉႁဵတ်းၵၢၼ်ပၼ် တႃႇသိုၵ်းမၢၼ်ႈပၼ်ႇၵူင်းၸၢၵ်ႈ ၵၢၼ်ၽွင်းငမ်းလႆႈ-  တႃႇ 37,701 ၾၢႆႊလ်(Files)၊ 18 ၾူဝ်ႊလ်တႃႇ (Folder)၊ Excel  990 ၾၢႆႊလ်(Files)။ ၼႂ်းၼၼ်ႉ ပႃးဝႆႉသဵၼ်ႈၸိုဝ်ႈ ၶႃႈႁၢပ်ႇၵၢၼ်ၶုၼ် ထိုင်ၸၼ်ႉၽွင်းလူင် ၵူႈႁွင်ႈၵၢၼ် – ပႃးၸိုဝ်ႈ၊ တူဝ်ၼပ်ႉ မၢႆၾၢင်၊ ႁွင်ႈၵၢၼ်၊ ငိုၼ်းလိူၼ်၊ ၸၼ်ႉထၢၼ်ႈ၊ ပီလိူၼ်ဝၼ်းၵိူတ်ႇ၊ ဢႃယု၊ ၸၢႆး၊ ယိင်း၊  သႅၼ်းလိူတ်ႈ ၸဵမ်ၸိူဝ်းၼႆႉၵူၺ်းဢမ်ႇၵႃး ယင်းပႃးဢွင်ႈတီႈယူႇသဝ်းလႄႈ မၢႆၾူၼ်း ၸဵမ်ၸိူဝ်းၼႆႉထႅင်ႈလူးၵွၼ်ႇ ဝႃႈၼႆ။

ၸၢႆးၵေႃႉဢၼ် ၵႂႃႇႁႅၵ်ႉလၵ်ႉဢဝ်ၶေႃႈမုလ်းၼၼ်ႉ တႅမ်ႈတၢင်ႇဝႆႉၼိူဝ်သိုဝ်ႇတူင်ႇဝူင်းၵူၼ်းမၼ်းဝႃႈ -“ ၶေႃႈမုလ်းၸိူဝ်းၼႆႉ သင်ဝႃႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းၶႂ်ႈလႆႈၼၼ်ႉ ၵပ်းသိုပ်ႇယွၼ်းမႃးၸိုင် မၼ်းတေသူင်ႇပၼ်ယူႇ။ တေမီးၽွၼ်းယွၼ်ႈလီႁႃႉၸႃႉၼၼ်ႉတႄႉ ယူႇတီႈၸုမ်းဢၼ် ဢဝ်ၵႂႃႇၼၼ်ႉ မၼ်းတေၵႂႃႇၸႂ်ႉတီႈလႂ် တေႁဵတ်းသင်ၼႆၼၼ်ႉ ၵူၺ်း။ မၼ်းတေပဵၼ်ႁိုဝ်မႃးၼႆတႄႉ ၵူႈၵေႃႉတေႁူႉပွင်ႇၸႂ်ယူႇၵႂႃႈ။ သိုၵ်းမၢၼ်ႈၼႆႉ ၶဝ်ၶႂ်ႈၶိၼ်ႁဵတ်းလူင်ပွင်ၸိုင်ႈၵူၺ်း။ တေႃႈၼင်ႇၶေႃႈမုလ်းၵူၼ်းၸဝ်ႈၵဝ်ႇ 2 သႅၼ်ပၢႆၵူၺ်းၵေႃႈ ယင်းဢမ်ႇႁၵ်ႉသႃလႆႈ တႃႉလီဢၢႆတၢင်ၶဝ်။ တႃႇတေဢဝ်ၶိူင်ႈၵွင်ႈၵၢင်ႇႁဵတ်း ဢႃႇၼႃႇသေ ၵုမ်းဝၢၼ်ႈမိူင်း ၵုမ်းၵူၼ်းမိူင်း 50 လၢၼ်ႉၼႆတႄႉ ယင်းလီမီးၶေႃႈထၢမ်ယူႇ”- ဝႃႈၼႆ။

ယၢမ်းလဵဝ် သဵၼ်ႈမၢႆႁွင်ႈၵၢၼ်ၽွင်းလူင် ၾၢႆႇၵႅတ်ႇၶႄလႄႈ ႁွင်ႈၵၢၼ်ၾၢႆႇၵုမ်းၶင် ၼႂ်းမိူင်းႁူမ်ႈတုမ် မျၢၼ်ႇမႃႇၼႆႉ ၽႄႈၸွတ်ႇၵႂႃႇ ၼိူဝ်သိုဝ်ႇတူင်ႇဝူင်းၵူၼ်းဝႆႉသေ ၽူႈပၵ်းတႃပႂ်ႉတူၺ်း လွင်ႈတူင်ႉၼိုင် ႁွင်ႈၵၢၼ်ၾၢႆႇၵုမ်းၶင် မိူင်းႁူမ်ႈတုမ် ပတ်းပိုၼ်ႉၵေႃႈ ယိုၼ်ယၼ်ၸႅင်ႈဝႆႉဝႃႈ ၶေႃႈမုလ်းၸိူဝ်းၺႃးလၵ်ႉ ဢဝ်မႃးၽႄႈၸိူဝ်းၼၼ်ႉ မၢၼ်ႇမႅၼ်ႈၵူႈလွင်ႈသေ ပဵၼ်ၶေႃႈမုလ်းဢၼ်တႄႉမၼ်း ၼႆယဝ်ႉ။

လႆႈႁူႉဝႃႈ ၼႂ်းသဵၼ်ႈမၢႆၸိူဝ်းၼၼ်ႉ ပႃးဝႆႉၶေႃႈမုလ်း ၶႃႈႁၢပ်ႇၵၢၼ်ၶုၼ် တႂ်ႈသိုၵ်းမၢၼ်ႈယိုတ်းမိူင်း ၵုမ်းၵမ် ၵူၺ်းဢမ်ႇၵႃး သဵၼ်ႈမၢႆၵူၼ်းၸိူဝ်းသၢၼ်ၶတ်းသိုၵ်းမၢၼ်ႈသေ ႁဵတ်း CDM ယဝ်ႉ ပၢႆႈဢွၵ်ႇၵႂႃႇယူႇဝႆႉ မိူင်းၼွၵ်ႈလႄႈ ၵူၼ်းၼုမ်ႇ ၸိူဝ်းၵႂႃႇ ႁဵၼ်းလိၵ်ႈဝႆႉၼွၵ်ႈမိူင်း ၸိူဝ်းၼႆႉၵေႃႈပႃး ၼႆယဝ်ႉ။

လိူဝ်ၼၼ်ႉ ၶေႃႈမုလ်းလပ်ႉၸိူဝ်းၼႆႉ ပဵၼ်တၢင်းၵၢၼ်ဝႆႉထိုင် တေႃႇပီ 2025 လိူၼ်ၵျုၼ်ႊသဵင်ႈ။ ပႃးဝႆႉၶေႃႈမုလ်း ၶႃႈႁၢပ်ႇၵၢၼ်ၶုၼ် ၸိူဝ်းတေလႆႈငိုၼ်းလိူၼ်ၽိူမ်ႉ၊ မၢင်ၸိူဝ်း တေလႆႈၶၢႆႉဢွင်ႈတီႈလႄႈ ၶေႃႈမုလ်းလပ်ႉ တႃႇတေႁပ်ႉၵူၼ်းႁဵတ်းၵၢၼ်မႂ်ႇၸိူဝ်းၼႆႉ တင်းၼမ် ဝႃႈၼႆ။

တႅမ်ႈ – ၽူၺ်းၼုမ်ႇ