တႃႇၵမ်ႉၸွႆႈသိုၵ်းမၢၼ်ႈၼႆသေ ၵၢင်ႉၵႄႇၵဵပ်းငိုၼ်းတီႈၵူၼ်းမိူင်း တီႈဝဵင်းယႂႃႇငၢၼ်ႇ ၊ ၶၢၼ်းၵူၼ်းမိူင်း သူင်ႇႁေႃႇၶဝ်ႈပၼ်သိုၵ်းမၢၼ်ႈ ဢၼ်မႃးပၵ်းတပ်ႉဝႆႉတီႈၼႂ်းဝၢၼ်ႈၵုင်းသိမ်ႇ( သိမ်ကုန်း)ၼၼ်ႉထႅင်ႈ ဝႃႈၼႆ ။

  ဝၼ်းတီႈ 19/07/2025 သိုၵ်းမၢၼ်ႈ ဢဵၼ်ႁႅင်းသိုၵ်းမွၵ်ႈ 30 ၶဝ်ႈတဝ်ၼႂ်းဝၢၼ်ႈ ၵုင်းသိမ်ႇ တီႉၵူၼ်းဝၢၼ်ႈ တဵင်ၵႂၢမ်းၼၵ်းဝႆႉလွင်ႈဝႃႈ ႁၢမ်ႈတိတ်းတေႃႇၵမ်ႉထႅမ်ၸုမ်းလုၵ်ႉၽိုၼ်ႉ၊  တေလႆႈၸွႆႈထႅမ်ၸုမ်း ၵမ်ႉထႅမ် သိုၵ်းမၢၼ်ႈ ၸဵမ်ၸိူဝ်းၼႆႉသေ – ၶဝ်ႈပၵ်းပၢင်သဝ်း ယူႇဝႆႉၼႂ်းဝၢၼ်ႈ။ လိူဝ်ၼၼ်ႉ ႁႂ်ႈၵူၼ်းဝၢၼ်ႈ သူင်ႇႁေႃႇၶဝ်ႈ ၸွၵ်းၽၵ်းပၼ်ၶဝ်ၵူႈဝၼ်း – ဝႃႈၼႆ။  

ၵူၼ်းၸၢႆးဢႃယု 40 ပီ ၸဝ်ႈၼႃးယူႇဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ မႃးယူႇတီႈၼႂ်းဝၢၼ်ႈမီး 3 ဝၼ်းယဝ်ႉ ၊ ၶဝ်မႃးပၵ်းတပ်ႉဝႆႉတီႈ တၢင်းၵုင်းၽြႃး ၵုင်းသိမ်ႇ ။ ၵူၼ်းဝၢၼ်ႈ  လႆႈၵႂႃႇသူင်ႇပၼ်ႁေႃႇၶဝ်ႈၸွၵ်းၽၵ်း တၢင်းၵိၼ်တၢင်းယမ်ႉ ၵူႈဝၼ်း ၊ လိူဝ်ၼၼ်ႉၶဝ်ၶၢၼ်း ၵူၼ်းဝၢၼ်ႈဝႆႉဝႃႈ –  တေလႆႈၵဵပ်းငိုၼ်းၵၼ်သေမႃးပၼ်ၶဝ်  တႃႇၵမ်ႉၸွႆႈၶဝ် ၼိုင်ႈဝၢၼ်ႈ 5 သႅၼ်ၼႆထႅင်ႈ ၊ တွၼ်ႈတႃႇႁဝ်းၶႃႈၵူၼ်းဝၢၼ်ႈတႄႉ ပေႃးၶဝ်ၶဝ်ႈမႃးယူႇၼႂ်းဝၢၼ်ႈၼႆႉ ႁဝ်းၶႃႈဢမ်ႇမီးလွင်ႈႁူမ်ႇလူမ်ႈသေဢိတ်းလႆႈၵူဝ်ႇႁႅင်းၼႃႇ”- ဝႃႈၼႆ ။

 သိုၵ်းမၢၼ်ႈၸိူဝ်းမႃးပၵ်းတပ်ႉယူႇၼႂ်းဝၢၼ်ႈၼႆႉ ယၢမ်းၵၢင်ၶမ်ႈၵၢင်ၶိုၼ်း ၵႆႉလၼ်ႇၵွင်ႈ ယိုဝ်းလွၵ်ႇ ၵူၼ်းမိူင်း ႁဵတ်းႁႂ်ႈၵူၼ်းမိူင်းတူၵ်းၸႂ် ။   ၾၢႆႇတၢင်း ဝၢၼ်ႈမျႃႉတဵင်းတၢၼ်ႇ ၊ မျႃႉၸေႇတီႇ ၸိူဝ်းၼႆႉၵေႃႈ ၶဝ်ထႅမ်ႁႅင်းသိုၵ်းၶဝ်ႈမႃးထႅင်ႈတင်းၼမ်။ ပေႃးသိုၵ်းမၢၼ်ႈၶဝ်ႈဝၢၼ်ႈ  လႅင်းၾူၼ်ႊ လႅင်းဢိင်ႊတႃႊၼဵတ်ႊ ၵေႃႈၶၢတ်ႇၵမ်းလဵဝ်  ဝႃႈၼႆ ။

ယိင်းသၢဝ်သႅၼ်းပၢၼ်ဢႃယု 20 ပၢႆ လၢတ်ႈၽူႈတွႆႇႁွၵ်ႈဝႃႈ -“တလဵဝ် တၢင်းဝၢၼ်ႈမျႃႉတဵင်းတၢၼ်ႇ ၊ မျႃႉၸေႇတီႇ ၼၼ်ႉလႅင်းၾူၼ်ႊၶၢတ်ႇဝႆႉ ၊ ၵပ်းသိုပ်ႇႁႃၽႂ်ဢမ်ႇလႆႈ ၊ သိုၵ်းမၢၼ်ႈၵေႃႈ ထႅမ်ႁႅင်းသိုၵ်း ၶဝ်ႈမႃးၵူႈဝၼ်း ။ ယဝ်ႉၵေႃႈ ၶဝ်ႈပၵ်းတပ်ႉ ဝႆႉတီႈၵျွင်းမုၼ်ၸဝ်ႈ ၊ ႁိူၼ်းၵူၼ်းဝၢၼ်ႈၸိူဝ်းၼႆႉ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇႁတ်းၵႂႃႇမႃးလွတ်ႈလႅဝ်း”- ဝႃႈၼႆ ။ 

မိူဝ်ႈဝၼ်းတီႈ 11/6/2025  ၵူၼ်းဢမ်ႇႁူႉၾၢႆႇၶဝ်ႈတီႉၺွပ်း  ၶႃႈႁၢပ်ႇၵၢၼ်ၶုၼ် ၼႂ်းၸႄႈဝဵင်းယႂႃႇငၢၼ်ႇ ႁွင်ႈၵၢၼ်ၾၢႆႇၽွင်းငမ်း ၵူႈလွင်ႈလွင်ႈ တႂ်ႈသိုၵ်းမၢၼ်ႈၵႂႃႇ 3 ၵေႃႉ။  ထိုင်ယၢမ်းလဵဝ် ပႆႇလႆႈတၢင်းၵပ်းသိုပ်ႇ ။ ဝၢႆးၼၼ်ႉမႃး ၾၢႆႇ သိုၵ်းမၢၼ်ႈၵေႃႈ  ထႅမ်ႁႅင်းသိုၵ်းၶဝ်ႈမႃး ၼႂ်းဝၢၼ်ႈမျႃႉတဵင်းတၢၼ်ႇလႄႈ မျႃႉၸေႇတီႇ သေတူင်ႉၼိုင်ၶဝ်ႈဢွၵ်ႇၵႂႃႇမႃး – ႁဵတ်းႁႂ်ႈၵူၼ်းမိူင်းသုၵ်ႉႁူသုၵ်ႉၸႂ်ယူႇၵူႈဝၼ်း- ၵူၼ်းပိုၼ်ႉတီႈလၢတ်ႈၼင်ႇၼႆ။

 တီႈဝၢၼ်ႈၼပၢၼ်းၵျီး  ၼႂ်းၸႄႈဝဵင်းယႂႃႇငၢၼ်ႇၼၼ်ႉၵေႃႈ သိုၵ်းမၢၼ်ႈၶဝ်ႈပၵ်းတပ်ႉဝႆႉသေ  ၵူတ်ႇထတ်းၵူၼ်းၶဝ်ႈၵူၼ်းဢွၵ်ႇဝဵင်းႁၢဝ်ႈႁႅင်း ၊ ပေႃးတေဢွၵ်ႇၼွၵ်ႈဝၢၼ်ႈၵူၺ်းၵေႃႈ ၶဝ်ယွၼ်း မၢႆၾၢင်ၵူၼ်းဝၢၼ်ႈဝႆႉ    – ၵူၼ်းဝၢၼ်ႈၼပၢၼ်းၵျီးလၢတ်ႈၼင်ႇၼႆ။

ဝၼ်းတီႈ 17/7/2025 ယၢမ်းၵၢင်ၼႂ် 8 မူင်း ၸုမ်းပိဝ်ႇသေႃးထီး (ၶွၼ်ႉတဝ်ႉသိုၵ်းမၢၼ်ႈ) ႁွင်ႉဢဝ်သိုၵ်းမၢၼ်ႈ ၶဝ်ႈၼႂ်းဝၢၼ်ႈၵုင်းသိမ်ႇ(တဵင်ႇၵူင်း) သေလွၵ်ႇငိုတ်ႈ ၵူၼ်းမိူင်း ႁႂ်ႈၵူၼ်းဝၢၼ်ႈ လုမ်းလႃးတူၺ်းလူ ဢဝ်ႁူမ်ႇလူမ်ႈပၼ် ၸုမ်းပိဝ်ႇသေႃးထီး (ၸုမ်းၶွၼ်ႉတဝ်ႉ- ၽူႈပၼ်ၶၢဝ်ႇၶဝ်) ၊ ပေႃးပိဝ်ႇသေႃးထီး ပဵၼ်ၵႂႃႇသေၸိူဝ်ႉသေလွင်ႈ ၵူၼ်းဝၢၼ်ႈတေၺႃးၵိၼ် ဝႃႈၼႆ ပႃး။