မိူဝ်ႈဝၼ်းတီႈ 15/07/2025 ၼႆႉ ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင်ႊ Xi Jinping တင်း ၸွမ်ၽွင်းလူင် ၼွၵ်ႈမိူင်း မိူင်းရတ်ႉသျႃႊ သိူဝ်ႊၵျီႊ လႅပ်ႉၾ်လွပ်ႉ Sergey Lavrov ႁူပ်ႉဢုပ်ႇၵၼ် တီႈမိူင်းပေႊၵျိၼ်ႊ ၼႂ်းၸိုင်ႈမိူင်းၶႄႇ။
တီႈပၢင်ႁူပ်ႉထူပ်းၵၼ်ၼၼ်ႉ ဢုပ်ႇဢူဝ်းၵၼ် လွင်ႈၶၵ်ႉၵၢၼ်မၢၵ်ႈမီး လႄႈ လွင်ႈ ႁူမ်ႇလူမ်ႈသေ တေၶတ်းၸႂ်ႁူမ်ႈ ၵၼ်ႁဵတ်းသၢင်ႈႁၵ်ႉသႃ ၵၢၼ်ႁုၼ်ႈမုၼ်းတင်းသွင်မိူင်းၵႂႃႇၵွႆးဢမ်ႇၵႃး တေယုၵ်ႉမုၼ်းပႃး ပိဝ်ႇႁႃႇ ၵၢၼ်ၵပ်းသိုပ်ႇ မိူင်းၶႄႇ- မိူင်းရတ်ႉသျႃႊ ႁႂ်ႈပေႃးၶိုတ်းၸၼ်ႉမႃးလိူဝ်ၵဝ်ႇထႅင်ႈ။ ၾၢႆႇၼိုင်ႈၵေႃႈ တႃႇႁူမ်ႈသၢင်ႈႁဵတ်းၵၢၼ် ႁုၼ်ႈမုၼ်း လွင်ႈႁူမ်ႇလူမ်ႈ ၼၼ်ႉ ၸိုင်ႈမိူင်းတင်းသွင်ၾၢႆႇ တေၵမ်ႉထႅမ်ပၼ်ၵၼ် ဝႃႈၼႆ။
သျီႊၵျိၼ်ႊၽိင်ႊ ၸွမ်ၸိုင်ႈမိူင်းၶႄႇ လၢတ်ႈဝႃႈ “ ၶၵ်ႉၵၢၼ် ႁၵ်ႉသႃ လႄႈ ၵၢၼ်ႁုၼ်ႈမုၼ်းၶိုၼ်ႈယႂ်ႇ ၼိမ်တဵင်ႈ၊ ၵၢၼ် ငမ်းယဵၼ် ဢၼ်ၸုမ်းၽွမ်ႉႁူမ်ႈ သျႅၼ်ႊႁၢႆႊ (ဢၼ်မိူင်းၶႄႇ လႄႈ မိူင်းရတ်ႉသျႃႊၶွတ်ႇၽွတ်ႈဝႆႉ) ႁဵတ်းယူႇၼၼ်ႉ လမ်ႇလွင်ႈတႃႇမိူင်းၶႄႇ တေႉတေႉ” – ဝႃႈၼႆ။
လႆႈႁူႉဝႃႈ ပိူဝ်ႈတႃႇ ပၢင်ႁူပ်ႉထူပ်း ၽူႈၼမ်းၸိုင်ႈမိူင်းၶႄႇ လႄႈ မိူင်းရတ်ႉသျႃႊ တေဢွင်ႇမၢၼ်ၼႆႉ ၸုမ်းႁူမ်ႈႁွမ်းသျႅၼ်ႊႁၢႆးဢွၼ် ၼမ်းၸတ်းသေ ႁူဝ်ပဝ်ႈၸုမ်းႁူမ်ႈႁွမ်းသျႅၼ်ႊႁၢႆးၼႆႉၵေႃႈ တင်းသွင်မိူင်းတေပၼ်ႇပုၼ်ႈၵၼ် ႁဵတ်းသၢင်ႈၵႂႃႇ။ ပီၼႃႈမႃး ၾၢႆႇမိူင်းၶႄႇ တူၵ်းပုၼ်ႈၽွၼ်းပဵၼ်ႁူဝ်ပဝ်ႈသေ တေသိုပ်ႇၸတ်းႁဵတ်းပၢင်ႁူပ်ႉထူပ်းၵႂႃႇတီႈ တီႊယႅၼ်ႊၸျိၼ်ႊ ၼႂ်းမိူင်းၶႄႇထႅင်ႈ ဝႃႈၼႆ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ