ႁူဝ်လိူၼ်ၵျူႊလၢႆႊၼႆႉမႃး ၵူၼ်းမိူင်းၼႂ်းဝဵင်းမူႇၸေႊလၢႆလၢႆၵေႃႉ ၺႃးၼၢင်းယိင်းၸၢဝ်းမၢၼ်ႈ ဢၼ်မႃးၶိုၼ်ႈပႂ်ႉ ၵူၼ်းပွၵ်ႉၸၢၼ်းၼၼ်ႉ ႁူၺ်းလႅၼ်ဢဝ်ငိုၼ်းၵႂႃႇဢမ်ႇယွမ်း 3 ႁဵင်သႅၼ်ပျႃး။  

ၼၢင်းယိင်းၸၢဝ်းမၢၼ်ႈၼၼ်ႉ ၸိုဝ်ႈႁွင်ႉ မတီႇတႃႇတႅတ်ႉဝိၼ်း (မသီတာသက်ဝင်း) ဢႃႇယု 34 ပီ ပဵၼ်ၵူၼ်းယိပ်း မၢႆၾၢင် ယူႇပွၵ်ႉ 10 ၶဵတ်ႇ (နယ်မြေ) 7 ဝဵင်းလႃႈသဵဝ်ႈ။ မၼ်းၼၢင်းတႄႇၼႃႈႁိူၼ်းၸွမ်း မွင်ႇဢွင်ႇႁဵင်းထႅၵ်ႉ (မောင်အောင်ဟိန်းထက်)  (ၶႄႇတႆးၸၢပ်ႈၵၼ်) ဢႃႇယု 30 ပီ  လုၵ်ႈၸၢႆးၵေႃႉယႂ်ႇ ၸဝ်ႈႁၢၼ်ႉၶၢႆၶဝ်ႈမုၼ်းၵဵၵ်ႉ “ဝၼ်းပိူင်း (Wann Pane Bakery)” ဢၼ်တင်ႈလၢၼ်ႉဝႆႉ တီႈပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၼၢင်းယိင်းၵူၼ်းမိူင်းဝဵင်းမူႇၸေႊ ဢၼ်ၺႃးလႅၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ  “ မိူဝ်ႈမၼ်းမႃးလႅၼ်ပီႈၼႆႉ မၼ်းဝႃႈ ပၢၼ်ႇဢၵွင်ႉ(မၢႆယေးငိုၼ်း)မၼ်း ၺႃးဢိုတ်းဝႆႉၼႆႁႄ ယွၼ်းၵူႈငိုၼ်းတီႈပီႈ။ မၼ်းဝႃႈ ပေႃးဝူင်ႈၼႃႈ တေဢဝ်မႃးပၼ်ၶိုၼ်း။ မၼ်း ၼႄပီႈ ဝႂ်သလိပ်ႉဢၼ်ပိူၼ်ႈဢူၼ်းငိုၼ်းမႃးဝႆႉၼႂ်းၽူၼ်းမၼ်း မၢင်ၸိူဝ်းသူင်ႇဝႆႉပၼ် ႁူဝ်ႁဵင်သႅၼ်မၼ်း။ မၢင်ၸိူဝ်းသူင်ႇဝႆႉ ပၼ်ႁူဝ်ပၢၵ်ႇ သႅၼ်မၼ်းၼႆႁႄ ႁဵတ်းႁႂ်ႈပီႈယုမ်ႇမၼ်းတေႉတေႉဝႃႈဝႃႈ။ ပီႈႁဝ်းၶဝ်ၵေႃႈ ႁၼ်ထိုင်ဝႃႈ လုၵ်ႈႁဝ်း တင်း လုၵ်ႈၶဝ်ၵေႃႈ ၶိုၼ်ႈႁူင်းႁဵၼ်း တီႈလဵဝ်ၵၼ်။ ၾၢႆႇၼိုင်ႈၵေႃႈ ႁဝ်းႁူႉၸၵ်းၵၼ်မႃးၵေႃႈ ႁိုင်ၼၢၼ်းယဝ်ႉလႄႈ ၼႃႈၵၢၼ်ၼႃႈႁိူၼ်းၶဝ်ၵေႃႈၶႅမ်ႉယူႇၼႆႁႄ ၸင်ႇပၼ်ၵႂႃႇ ၼၼ်ႉၼႃႇ” ဝႃႈၼႆ။

လၢႆးလႅၼ်ငိုၼ်းၼၢင်းယိင်းၵေႃႉၼႆႉ တီႈၼိုင်ႈၵေႃႉလႄႈ ၼိုင်ႈၵေႃႉဢမ်ႇမိူၼ်ၵၼ်။ မၢင်ၵေႃႉၺႃးလႅၼ်ႁူၺ်းႁွင်ႉ ႁႂ်ႈႁူမ်ႈႁုၼ်ႈႁဵတ်းပၢႆးမၢၵ်ႈမီးၸွမ်းၵၼ် တီႈမၢင်ၵေႃႉသမ်ႉ ၵႂႃႇယွၼ်းၵူႈတူဝ်ငိုၼ်း၊ တီႈမၢင်ၸိူဝ်းသမ်ႉ ၵႂႃႇလႅၼ်ဝႃႈ ၵူၼ်းၼႂ်းမုင်ႉႁေႃႁိူၼ်းမၼ်း ၺႃးၺွပ်း ၊  လူဝ်ႇထုတ်ႇတူဝ် လႄႈ   ၶႂ်ႈယွၼ်းယိမ်ၸႂ်ႉငိုၼ်းၵႅပ်ႉၼိုင်ႈ၊ တီႈမၢင်ၸိူဝ်း သမ်ႉၵႂႃႇလႅၼ်ဝႃႈ လူဝ်ႇၸႂ်ႉငိုၼ်းတိုၼ်း ၼႂ်းၵၢၼ်ပၢႆးမၢၵ်ႈမီးၼႃႇလႄႈ တေဢဝ်ဝႂ်ၵရႅၼ်ႇႁိူၼ်း မႃးၵမ်ႉသေ ၶႂ်ႈလႆႈတူဝ် ငိုၼ်းၸဵမ်ၸိူဝ်းၼႆႉဝႃႈၼႆ။

ၵူၼ်းၸိူဝ်းၺႃးလႅၼ် ၵမ်ႈၼမ်ပဵၼ်ဢူၺ်းၵေႃႉမၼ်းၼၢင်း၊ ၵမ်ႈၽွင်ႈပဵၼ်ၵူၼ်းႁူႉၸၵ်းလႄႈယုမ်ႇၸႂ်ၵၼ်သေ ၸွႆႈထႅမ် ပၼ်ယိမ်ငိုၼ်း။ ၾၢႆႇၼိုင်ႈၵေႃႈ ႁၢၼ်ႉၶၢႆၶဝ်ႈမုၼ်း ၽူဝ်မၼ်းၼၢင်းၼႆႉ ၸိုဝ်ႈသဵင်လိုဝ်းလင်ဝႆႉၼႂ်းပိုၼ်ႉတီႈ။ မၼ်းၼၢင်းလၢတ်ႈဝႃႈ တေႁဵတ်းၵၢၼ်ပၢႆးမၢၵ်ႈမီး တေသင်ႇသိုဝ်ႉၸၢၵ်ႈႁဵတ်းၶဝ်ႈမုၼ်းမႃးၶၢႆပၼ်ဝႃႈၼႆ။

တူဝ်မၼ်းၼၢင်းသမ်ႉ ပဵၼ်ၵူၼ်းသွၼ်ၵႃႈ Zumba လဵၼ်ႈႁႅင်းဢွၵ်ႇႁိူဝ်ႇတႃႇပၢႆးယူႇလီ။ ၾၢႆႇၼိုင်ႈ မၼ်းၼၢင်း  ႁဵတ်းၶၢႆၶူဝ်ႉမွၵ်ႇ  ။    ၼၢင်းယိင်းၵေႃႉၺႃးလႅၼ်ၼၼ်ႉ သိုပ်ႇလၢတ်ႈၼေၼင်ႇၼႆ။

“မၼ်းၵေႃႈႁတ်းတေႉ ၵႂႃႇလၢတ်ႈလႅၼ်ၵူႈတီႈၵူႈတၢင်း။ ပေႃးလၢတ်ႈတီႈပိူၼ်ႈတႄႉဝႃႈ ၵေႃႉၼၼ်ႉ ၵေႃႉၼႆႉယင်းမႃးၵူႈငိုၼ်းမၼ်းဝႆႉ။ ၵူၺ်းယႃႇၵႂႃႇလၢတ်ႈၼႄမၼ်းၶိုၼ်းၼႃႉ – ၼႆ  ႁဝ်းၵေႃႈ ထၢင်ႇဝႃႈ ပဵၼ်ၼိုင်ႈၵေႃႉ သွင်ၵေႃႉၵွႆးၼၼ်ႉၼႃႇၼေႃ။ လႅၼ်တေႉလႅၼ်ဝႃႈ  ယဝ်ႉ။ ၵူၺ်းၵႃႈ ႁမ်ႉႁဵတ်းႁႂ်ႈႁဝ်းယုမ်ႇၼၼ်ႉၼႃႇ။ ၽိူဝ်ႇထိုင်ဝၼ်း မၼ်းလူဝ်ႇမႃးတႅၼ်းငိုၼ်း ပၼ်ၶိုၼ်းတီႈပီႈၼၼ်ႉ မၼ်း ပေႃးပၢႆႈၵႂႃႇယဝ်ႉၼႃႇ။ ၵႂႃႇႁႃၵေႃႈဢမ်ႇႁၼ်။ မိူဝ်ႈတႄႇတႄႉ ၽူဝ်မၼ်းဝႃႈ တေႁပ်ႉဢဝ်ပုၼ်ႈၽွၼ်းမူတ်းမူတ်းၼႆ  ယင်းမႃးတွင်း ပၢၼ်ႇတီႈပီႈၵွၼ်ႇ။ ထႅင်ႈဝၼ်းၼိုင်ႈၵေႃႈ ၽူဝ်မၼ်းၵေႃႈႁၢႆ  ပၢႆႈၵႂႃႇၸွမ်းမၼ်းယဝ်ႉ။ မိူဝ်ႈမၼ်းၵႂႃႇၸွမ်းၵူႈငိုၼ်း ယိမ်ငိုၼ်းပိူၼ်ႈ ၼၼ်ႉ ၵူၼ်းၼႂ်းၼႃႈႁိူၼ်းၶဝ် ႁူႉၸွမ်းမူတ်းမူတ်း။ ၵွၼ်ႇၼႃႈ ၶိုၼ်းမၼ်းတေပၢႆႈၼၼ်ႉ မုင်ႉႁေႃႁိူၼ်းၶဝ် ယင်းၵိၼ်မူၼ်ႈၸွမ်းၵၼ် ယူႇ။ ၽိူဝ်ႇၶဝ်ၽူဝ်မေးပၢႆႈယဝ်ႉၼႆၵေႃႉ ဢူႈမႄႈၶဝ်ၼၼ်ႉ သမ်ႉဝႃႈ ၶႃသွင်ၵေႃႉၼၼ်ႉ ဢမ်ႇၵဵဝ်ႇသင်ၵၼ်တင်းႁဝ်းၼႆဝႃႇ။”

လႆႈႁူႉဝႃႈ မတီႇတႃႇတႅတ်ႉထုၼ်း တင်း ၽူဝ်မၼ်းၼၢင်း ၵေႃႉပဵၼ်လုၵ်ႈၸၢႆး ႁၢၼ်ႉႁဵတ်းၶဝ်ႈမုၼ်းၵဵၵ်ႉ “ဝၼ်းပိူင်း” “ဝမ်းပိန်းမုန့် တိုက်” “ Wann Pane Bakery” ၼႆႉ ပၢႆႈၵႂႃႇ ၸဵမ်မိူဝ်ႈ ဝၼ်းတီႈ 11-12/07/2025  ယဝ်ႉ။  ယၢမ်းလဵဝ် ၵူၼ်းၼႂ်းဝဵင်းမူႇၸေႊ ၸိူဝ်းၺႃးလွၵ်ႇဢဝ်ငိုၼ်းၵႂႃႇၼၼ်ႉ ၸွမ်းႁႃတူဝ်ဝႆႉယူႇ ၼႆယဝ်ႉ။

ၵဵဝ်ႇၵပ်းလွင်ႈၼႆႉၽူႈတွႆႇႁွၵ်ႈ ၶတ်းၸႂ်ႁႃလၢႆးတၢင်းတိတ်းတေႃႇၸူဝ်းတူဝ်သွင်ၽူဝ်မေးၼၼ်ႉယူႇၵေႃႈ ႁႃတၢင်းတိတ်းတေႃႇပႆႇလႆႈ။

ၼင်ႇႁိုဝ် ၵူၼ်းတင်းၼမ် တေဢမ်ႇၺႃးလွၵ်ႇလႅၼ်သေ ပေႃးတေဝႄႈလႆႈလွင်ႈလွၵ်ႇလႅၼ်ၵိၼ်ၵၼ်ၼၼ်ႉ  ၵူႈၵေႃႉထုၵ်ႇလီႁူႉတူဝ်တိုၼ်ႇၸႂ် ၾၢင်ႉၵၼ်၊ ယႃႇယုမ်ႇၵႂၢမ်းလၢတ်ႈပိူၼ်ႈငၢႆႈ   ၼၢင်းယိင်းၵေႃႉၺႃးလႅၼ်ၼၼ်ႉ လၢတ်ႈၼႄပၼ်ၾၢင်ႉဝႆႉၼင်ႇၼႆ။

“ ယၢမ်းလဵဝ်ၼႆႉ ႁူႉယူႇဝႃႈ တေဢမ်ႇလႆႈၶိုၼ်းငိုၼ်းႁဝ်း။ ၵူၺ်းၵၢင်ၸႂ်ပီႈႁဝ်းတႄႉ ၶႂ်ႈႁႂ်ႈမၼ်းၼၢင်းမႃးၶုပ်ႉၶဝ်ႇယွမ်းတၢင်းၽိတ်းတီႈ ႁဝ်းၶဝ်ယူႇ။ လွင်ႈမၼ်းႁဵတ်းၵႂႃႇမိူဝ်ႈလဵဝ်ၼႆႉ ပဵၼ်ၵၢၼ်လူလၢႆၼိူဝ် ၼမ်ႉၸႂ်၊ လွင်ႈယုမ်ႇယမ်ၵၼ်။ မိူဝ်ႈလဵဝ်ၼႆႉ တိတ်းတေႃႇၶဝ်ၵေႃႈ ဢမ်ႇလႆႈသေတၢင်း။ မိူဝ်ႈလဵဝ် ပေႃႈမႄႈၶဝ်ၵေႃႈ ဢမ်ႇႁပ်ႉဢဝ်ပုၼ်ႈၽွၼ်းသင်ၸွႆႈသေမဵဝ်း။ လီဢၢမ်းၼမ်ႉၸႂ်ၶဝ်ၼႃႇ။ ၵွၼ်ႇလုၵ်ႈ ၸၢႆး လုၵ်ႈပႂ်ႉၶဝ် ပႆႇပၢႆႈဝၼ်းၼိုင်ႈၼႆႉတႄႉ ၶဝ်တိုၵ်ႉႁဵတ်းၵၢၼ်ၸွမ်းၵၼ်၊ ၵိၼ်ပျေႃႇၸွမ်းၵၼ်၊ ႁၵ်ႉၵၼ်ယူႇ။ ပဵၼ်ပၼ်ႁႃ ၸိူင်ႉၼႆမႃး ယဝ်ႉသမ်ႉ လၢတ်ႈႁဝ်းဝႃႈ ႁဝ်းပေႃးတတ်းၶၢတ်ႇၶဝ်ႁိုင်ယဝ်ႉၼႆၵွၼ်ႇ။”

သွင်ၵေႃႉပူႇဢွၵ်ႇၼႆႉ လွၵ်ႇႁူၺ်းလႅၼ်ဢဝ်ငိုၼ်းၵူၼ်းၸမ်ၸႂ် တီႈဢူၺ်းၵေႃႉ ဢူၺ်းသႄႈ ၽူႈႁူမ်ႈၽၢၵ်ႈၼႃႈၵၢၼ်ၵၼ်ၵႂႃႇ တီႈဝဵင်းမူႇၸေႊ ၼႆႉ   2 ပွၵ်ႈပႃးၼႆႉယဝ်ႉ။ ပွၵ်ႈၵမ်းၼိုင်ႈ ပဵၼ်မိူဝ်ႈပီ 2015 -2016 ။ ၵူၺ်းၵႃႈၽွင်းၼၼ်ႉ   ၵူၼ်းၸႂ်ႉတိုဝ်း သိုဝ်ႇတူင်ႇဝူင်းၵူၼ်းပႆႇၵႂၢင်ႈၶႂၢင်လႄႈ ဢမ်ႇလႆႈႁူႉႁူဝ်ၼပ်ႉငိုၼ်းထုၵ်ႇလႅၼ်- ၵူၼ်းမိူင်းမူႇၸေႊ လၢတ်ႈၼင်ႇၼႆ။  

တႅမ်ႈ-ၽူၺ်းၼုမ်ႇ