ဝၼ်းတီႈ 13/07/2025 ယၢမ်းၵၢင်ၶမ်ႈ 10 မူင်းၶိုင်ႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းဝဵင်းမိူင်းၵုတ်ႈ ၼႃႈတီႈသိုၵ်းတဢၢင်းၵုမ်းၵမ်သေ လုၵ်ႈဢွၼ်ႇတၢႆၵႂႃႇ 2 ၵေႃႉ မီးၵူၼ်းမၢတ်ႇၸဵပ်းၵႂႃႇ 6 ၵေႃႉ ၼႆယဝ်ႉ။

မၢၵ်ႇလူင်သႅၼ်း 500 ပွၼ်ႊ ၶွင်သိုၵ်းမၢၼ်ႈ ၵႂႃႇတူၵ်းသႂ်ႇႁိမ်းၵျွင်းမုၼ်ၸဝ်ႈ ဝၢၼ်ႈပၢၼ်းမထဵၵ်ႉ (ပန်းမထိပ်) ၼၼ်ႉလႄႈ ၼၢင်းယိင်းတၢႆၵႂႃႇၵေႃႉၼိုင်ႈ၊ လုၵ်ႈဢွၼ်ႇတၢႆ 2 ၵေႃႉ ၵူၺ်းဢမ်ႇၵႃး ၵူၼ်းမိူင်းၼႂ်းပိုၼ်ႉတီႈ မၢတ်ႇၸဵပ်းၵႂႃႇၸွမ်းထႅင်ႈ 6 ၵေႃႉလႄႈ ႁိူၼ်းယေးလူႉၵွႆၵႂႃႇမွၵ်ႈ 10 လင်ၼႆ – ၵူၼ်းၼႂ်းပိုၼ်ႉတီႈ ဝဵင်းမိူင်းၵုတ်ႈ လၢတ်ႈၼႄၼင်ႇၼႆ။

“တူၵ်းၺႃးၾၢႆႇတႂ်ႈဝၢၼ်ႈပၢၼ်းမထဵၵ်ႉ ၵႂႃႇတိူဝ်ႉသႂ်ႇၺႃးႁိမ်းႁိူၼ်းၵူၼ်းလႄႈ တိူဝ်ႉမၢတ်ႇၵႂႃႇၼမ်ယူႇ။ မိူဝ်ႈလဵဝ် လုၵ်ႈဢွၼ်ႇၸိူဝ်းမၢတ်ႇၸဵပ်းၼၼ်ႉၵေႃႈ တိုၵ်ႉလႆႈယူတ်းယႃတူဝ်ဝႆႉတီႈႁူင်းယႃယူႇ။ ၼႂ်းလိူၼ်ၵျူႊလၢႆႊၼႆႉၵူၺ်း ၶဝ်မႃးပွႆႇမၢၵ်ႇၼႆႉ မီးၵႂႃႇသၢမ်ပွၵ်ႈယဝ်ႉ”။

မိူဝ်ႈဝၼ်းတီႈ 09/07/2025 ယၢမ်းၵၢင်ၶမ်ႈၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ဢဝ်မၢၵ်ႇလူင် ႁႅင်း 250 ပွၼ်ႊ ပွႆႇသႂ်ႇတီႈဝၢၼ်ႈပၢၼ်းမထဵၵ်ႉ (ပန်းမထိပ်) တႃႇ 2 လုၵ်ႈလႄႈ လုၵ်ႈဢွၼ်ႇတၢႆၵႂႃႇ 4 ၵေႃႉ ၵူၼ်းမိူင်းမၢတ်ႇၸဵပ်းၵႂႃႇ 8 ၵေႃႉ။

မိူဝ်ႈဝၼ်းတီႈ 8 ယၢမ်းၵၢင်ၼႂ်ၼၼ်ႉၵေႃႈ ႁူင်းႁဵၼ်းၸၼ်ႉသုင် သုၼ်ႇလဵဝ် ၸိုဝ်ႈႁွင်ႉ “ကြိုးစားသူများ” ၼႂ်းပွၵ်ႉၵွင်းဢူးပႃႇ (ဂေါင်းဉီးဘာ) ပွတ်းတူၵ်းဝဵင်းမိူင်းၵုတ်ႈ ၺႃးမၢၵ်ႇလူင်ႁိူဝ်းမိၼ်သိုၵ်းမၢၼ်ႈလႄႈ ၵူၼ်းမိူင်းတၢႆၵႂႃႇ ဢမ်ႇယွမ်း 3 ၵေႃႉသေ မၢတ်ႇၸဵပ်းၵႂႃႇတင်းၼမ် ၼႆယဝ်ႉ။

ၼႂ်းၶၢဝ်းတၢင်းသွင်ဝူင်ႈ လိူၼ်ၵျူႊလၢႆႊၼႆႉၵူၺ်း သိုၵ်းမၢၼ်ႈၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ဝဵင်းမိူင်းၵုတ်ႈလႄႈ လုၵ်ႈဢွၼ်ႇ၊ ၵူၼ်းလူင်တၢႆၵႂႃႇ 5 ၵေႃႉယဝ်ႉသေ မၢတ်ႇၸဵပ်းၵႂႃႇ 20 ၵေႃႉပၢႆ၊ ႁိူၼ်းၵူၼ်းမိူင်းလူႉၵွႆၵႂႃႇ 30 လင် ၼႆယဝ်ႉ။

ပေႃးထိုင်မႃး လိူၼ်ၼႃႈ (ၼႂ်းလိူၼ်ဢေႃးၵတ်ႊသ်) ၼႆႉ သိုၵ်းတဢၢင်းတင်း သိုၵ်းမၢၼ်ႈ တေႁူပ်ႉဢုပ်ႇၵၼ် ၼႂ်းမိူင်းၶႄႇ ပိူဝ်ႈတႃႇၵၢၼ်ၵိုတ်းတိုၵ်းၵၼ်ၼႆလႄႈ ၼင်ႇႁိုဝ် တေမီးၶေႃႈသဵတ်ႈၵၢၼ်မိူင်းၵၢၼ်သိုၵ်း ၼႂ်းပၢင်ၵုမ်ၼၼ်ႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းလႄႈ တရူၼ်ႊ ပွႆႇမၢၵ်ႇသႂ်ႇ ၼႂ်းဝဵင်းၼွင်ၶဵဝ်၊ ဝဵင်းၵျွၵ်ႉမႄး၊ ဝဵင်းသီႇပေႃႉ၊ ဝဵင်းမိူင်းမိတ်ႈလႄႈ ဝဵင်းမိူင်းၵုတ်ႈ ၸိူဝ်းပဵၼ်ၼႃႈတီႈသိုၵ်းတဢၢင်း ၵုမ်းၵမ်ၼၼ်ႉယူႇ ဢမ်ႇထၢတ်ႇ။

တႅမ်ႈ – ၽူၺ်းၼုမ်ႇ