မိူဝ်ႈဝၼ်းတီႈ 11/07/2025 သိုၵ်းဝႃႉ (UWSA) ဢွၵ်ႇၶေႃႈပူင် ၸီႉသင်ႇႁႂ်ႈႁုပ်ႈသိမ်း ယႃႉပႅတ်ႈၵဵတ်ႉလၢၼ်ႇ တင်းသဵင်ႈ ၸိူဝ်းတင်ႈဝႆႉၼိူဝ်ႈသဵၼ်ႈတၢင်းလူင် တႃႇၵူတ်ႇထတ်း ၵူၼ်းၸိူဝ်းၶဝ်ႈဢွၵ်ႇၵႂႃႇမႃး ၼႂ်းၼႃႈတီႈ ၶဝ်ၵုမ်းၵမ် ၼႂ်းၸႄႈဝဵင်းမိူင်းပွၵ်ႉ၊ မိူင်းလိူၼ်း၊ မိူင်းမွၵ်ႇ (မိုင်းမော)၊ ႁူဝ်ပၢင်ႇ ၸဵမ်ၸိူဝ်းၼႆႉ။
ၵဵတ်ႉလၢၼ်ႇၸိူဝ်းၺႃးသင်ႇယႃႉပႅတ်ႈၼႆႉ ပဵၼ်ၵဵတ်ႉလၢၼ်ႇ ၼိူဝ်သဵၼ်ႈတၢင်းလူင် ဢၼ်ၸုမ်းသိုၵ်းဝႃႉလႄႈ မိူင်းၶႄႇ ၸႂ်ႉတိုဝ်းႁဵတ်းၵၢၼ်ၵႃႉၶၢႆတေႃႉသူင်ႇၶူဝ်းၵုၼ်ႇၵၼ်ၵႂႃႇမႃးလႆႈၼၼ်ႉ ၸဝ်ႈၵႃးၵေႃႉလတ်း ၵႂႃႇမႃးၼိူဝ်သဵၼ်ႈတၢင်းၼၼ်ႉ လၢတ်ႈၼႄၼင်ႇၼႆ။
“ၵဵတ်ႉလၢၼ်ႇၸိူဝ်းၶဝ်ယႃႉၼၼ်ႉ ပဵၼ်ဢၼ်ၶဝ်တင်ႈမႂ်ႇမႂ်ႇ မိူဝ်ႈပီၵၢႆၼၼ်ႉၵူၺ်း။ ၶဝ်ဢမ်ႇၵူတ်ႇထတ်း သင်ၵေႃႈ ႁိုင်ယဝ်ႉ။ ယၢမ်းလဵဝ် ၸင်ႇမႃးယႃႉပႅတ်ႈတႄႉတႄႉ။ ပေႃးပဵၼ်ၵဵတ်ႉလၢၼ်ႇ တၢင်းမိူင်းမွၵ်ႇ (မိုင်းမော) ဢၼ်ၵူၼ်းမိူင်းလႆႈလူင်းပႆတၢင်းႁႄလတ်းၶၢမ်ႈၵဵတ်ႉၶဝ်ၼၼ်ႉတႄႉ ၶဝ်ဢမ်ႇထတ်းသင် ၸဵမ်မိူဝ်ႈပီ ၵၢႆယဝ်ႉဝႃႈ”။
သိုၵ်းဝႃႉ ၸီႉသင်ႇယႃႉပႅတ်ႈၵဵတ်ႉလၢၼ်ႇ ၸိူဝ်းတင်ႈဝႆႉ ၸွမ်းသဵၼ်ႈတၢင်း ၼႂ်းမိူင်းၵူၺ်းသေ ၸွမ်းလႅၼ်လိၼ်တိတ်းၸပ်းၵၼ်တင်း မိူင်းၶႄႇၼၼ်ႉတႄႉ ယင်းတိုၵ်ႉပိုတ်ႇဝႆႉမိူၼ်ၵဝ်ႇယူႇၼႆ ၽူႈၶၢၼ်ပၢၵ်ႇ ၸုမ်းသိုၵ်းဝႃႉ ဢူးၺီႇရၢၼ်း လၢတ်ႈၼႄဝႆႉၼင်ႇၼႆ။
“ၵဵတ်ႉလၢၼ်ႇ ၸွမ်းလႅၼ်လိၼ်တႄႉ တိုၵ်ႉပိုတ်ႇဝႆႉမိူၼ်ၵဝ်ႇၵူၺ်း။ မိူဝ်ႈလဵဝ်ၼႆႉ ယႃႉပႅတ်ႈၵဵတ်ႉလၢၼ်ႇ ဢၼ်တင်ႈဝႆႉၸွမ်းၼႂ်းဝဵင်းၵူၺ်း။ ပိူဝ်ႈတႃႇၵူၼ်းမိူင်းၵႂႃႇမႃးလႆႈငၢႆႈၼၼ်ႉ ၼႃႇ”။
ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 တႄႇႁၢင်လိူၼ်ဢေႃႊၵတ်ႊသ် ပီ 2024 ၼၼ်ႉမႃး ပိူဝ်ႈတႃႇ ၸုမ်းသိုၵ်းဢူၺ်းလီသၢမ်ၸုမ်း ၵိုတ်းပၢင်တိုၵ်းၼႆသေ ၾၢႆႇလူင်ပွင်ၸိုင်ႈမိူင်းၶႄႇ ဢိုတ်းပႅတ်ႈၵဵတ်ႉလၢၼ်ႇ လႅၼ်လိၼ်မိူင်းၶႄႇ – မိူင်းတႆး ၼႂ်းၼႃႈတီႈၸုမ်းသိုၵ်းဝႃႉ ၵုမ်းၵမ် တီႈၼမ်ႉတိုၵ်း – မၢၼ်ႈၶႃး။
လိူဝ်ၼၼ်ႉ သင်ႇႁၢမ်ႈယႃႇႁႂ်ႈၸုမ်းသိုၵ်းဝႃႉ သူင်ႇၶၢႆၶဝ်ႈၼမ်ႉတၢင်းၵိၼ်၊ ၶိူင်ႈၵွင်ႈၵၢင်ႇ၊ ၶိူင်ႈၶူဝ်းၼႂ်းၵၢၼ် ၵေႃႇသၢင်ႈ၊ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ)၊ ၶိူင်ႈၾႆးၾႃႉ ၸိူဝ်းၼႆႉ ပၼ်တီႈၸုမ်းသိုၵ်းၵဝ်ႈၵၢင်ႉလႄႈ သိုၵ်းတဢၢင်း ထႅင်ႈၵွၼ်ႇ။
တႄႇႁူဝ်ပီ 2025 လိူၼ်ၵျႅၼ်ႊၼိဝ်ႊရီႊမႃး သိုၵ်းၵဝ်ႈၵၢင်ႉတင်း သိုၵ်းမၢၼ်ႈ လႆႈၶေႃႈတူၵ်းလူင်းၵၼ် ၼႂ်းၶၵ်ႉၵၢၼ်ၵိုတ်းတိုၵ်းၼႆႉသေ ၾၢႆႇမိူင်းၶႄႇ ၸင်ႇတႄႇလူတ်းယွၼ်ႇပၼ် သုၼ်ႇလႆႈတေႃႉသူင်ႇၵႃႉၶၢႆတေႃႇၵၼ် ၸွမ်းလႅၼ်လိၼ်ၶိုၼ်း။ တႄႇၼၼ်ႉမႃးၵေႃႈ သိုၵ်းဝႃႉ ပိုတ်ႇပၼ်သဵၼ်ႈတၢင်း ႁႂ်ႈတေႃႉသူင်ႇၶဝ်ႈဢွၵ်ႇ ၶူဝ်းၵုၼ်ႇၵႂႃႇမႃးလႆႈ ၼႂ်းပိုၼ်ႉတီႈၶဝ်ၶိုၼ်း ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ