ရူဝ်ႊမၢၼ်ႊသတႃႊရူဝ်ႊပွတ်ႉ ၽွင်းလူင် ၾၢႆႇၵပ်းသိုပ်ႇတေႃႉသူင်ႇ မိူင်းရတ်ႉသျႃး ၶႃႈတူဝ်တၢႆၵႂႃႇ ဝၢႆးလင် ၺႃးပူတ်းဢွၵ်ႇတၼ်းႁဵင်း ဢမ်ႇပႆႇႁိုင် ဝႃႈၼႆ။
ဝၼ်းတီႈ 07/07/2025 ယၢမ်းၵၢင်ၼႂ်ၸဝ်ႉၼၼ်ႉ ၽွင်းလူင်ၾၢႆႇၵပ်းသိုပ်ႇတေႃႉသူင်ႇ မိူင်းရတ်ႉသျႃး ၺႃးၸွမ်ၸိုင်ႈ ပူႊတိၼ်ႊ ပူတ်းတၼ်းႁဵင်းပႅတ်ႈ၊ ယွၼ်ႉလွင်ႈတၢင်းသင် ဢၼ်ဝႃႈၼၼ်ႉ ဢမ်ႇပိုၼ်ၽၢဝ်ႇဝႆႉပႃး။ ဝၢႆးၼၼ်ႉ လၢႆၸူဝ်ႈမူင်းၵူၺ်း မၼ်းၸၢႆးၶႃႈတူဝ်တၢႆၵႂႃႇ ဝႃႈၼႆ။
ၽူႈမီးပုၼ်ႈၽွၼ်း ၾၢႆႇၵူတ်ႇထတ်းၶဝ်လၢတ်ႈဝႃႈ ထူပ်းႁၼ်တူဝ်တၢႆမၼ်းၸၢႆး တီႈၼႂ်းရူတ်ႉၵႃးသုၼ်ႇတူဝ် ဢၼ်မီးတီႈႁိမ်းဝဵင်းမေႃႊသၵူဝ်ႊ လႆႈႁၼ်မီးဝႆႉပႃး ႁွႆးမၢၵ်ႇၵွင်ႈ ဝႃႈၼႆ။
ရူဝ်ႊမၢၼ်ႊသတႃႊရူဝ်ႊပွတ်ႉၼႆႉ လႆႈႁပ်ႉတၼ်းႁဵင်းပဵၼ် ၽွင်းလူင်ၾၢႆႇၵပ်းသိုပ်ႇတေႃႉသူင်ႇ ၼႂ်းလိူၼ်မေႊ ပီ 2024 ။ ၵွၼ်ႇၼႃႈၼၼ်ႉ လႆႈႁပ်ႉပုၼ်ႈၽွၼ်းပဵၼ် ၽူႈၵွၼ်းၾၢႆႇၽွင်းငမ်း ၼႂ်းပိုၼ်ႉတီႈၵၢတ်ႉသ်၊ လႅၼ်လိၼ်မိူင်းယူႇၶရဵၼ်း ၶၢဝ်းတၢင်းၸမ် 6 ပီ။
ၽူႈၵွၼ်းၾၢႆႇၽွင်းငမ်း ၼႂ်းပိုၼ်ႉတီႈၵၢတ်ႉသ် ၵေႃႉၵဝ်ႇၼၼ်ႉၵေႃႈ ၺႃးတီႉၺွပ်း မိူဝ်ႈလိူၼ်ဢေႊပရိူဝ်ႊ ပူၼ်ႉမႃး လူၺ်ႈလွင်ႈၵိၼ်သူးၵိၼ်လၢပ်ႈ ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ႁွင်ႈၵၢၼ်သိုဝ်ႇၶၢဝ်ႇ ၼႂ်းမိူင်းရတ်ႉသျႃး ႁၢႆးငၢၼ်းဝႃႈ ၽွင်းလူင် ၾၢႆႇၵပ်းသိုပ်ႇတေႃႉသူင်ႇ ၵေႃႉၶႃႈတူဝ်တၢႆၵႂႃႇၼႆႉၵေႃႈ လႅပ်ႈတေၺႃးမၢပ်ႇမႂ် မိူၼ်ၼင်ႇ ၽွင်းလူင်ၵေႃႉၵဝ်ႇၼၼ်ႉၵူၺ်း ဝႃႈၼႆ။
မိူဝ်ႈၼႂ်းလိူၼ်ဢေႃႊၵတ်ႊသ် ပီ 2024 ပူၼ်ႉမႃးၼၼ်ႉ တပ်ႉသိုၵ်းမိူင်းယူႇၶရဵၼ်း ထူဝ်းသိုၵ်းၶဝ်ႈတိုၵ်း ၼႂ်းပိုၼ်ႉတီႈၵၢတ်ႉသ် မိူင်းရတ်ႉသျႃး ပွတ်းတူၵ်းသေ ယိုတ်းၵုမ်းလႆႈၼႃႈလိၼ်ၵမ်ႈၽွင်ႈ။ ၵူၺ်းၵႃး ဝၢႆးလင်ၼၼ်ႉ သိုၵ်းရတ်ႉသျႃး ၶိုၼ်းယိုတ်းလႆႈၼႃႈလိၼ်ယဝ်ႉသေ သိုၵ်းယူႇၶရဵၼ်း ၵုမ်းလႆႈဝႆႉၵမ်ႈၽွင်ႈၵူၺ်း – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ