ဝၼ်းတီႈ 25/06/2025 ယၢမ်းဝၢႆးဝၼ်း 3 မူင်း ၸုမ်းပျီႇၸိတ်ႉတီႈဝဵင်းမူႇၸေႊ ၸိုင်ႈတႆးပွတ်းႁွင်ႇ ယိုဝ်းၼုမ်ႇၸၢႆးဢႃယု 20 ပၢႆၵေႃႉၼိုင်ႈတၢႆ ၼႂ်းဝၢၼ်ႈပၢင်ႇလူင်မႂ်ႇ  ၊  မၼ်းၸၢႆးဢၢၼ်းလၵ်ႉၶူဝ်းၶွင်ၼႆသေ လမ်းယိုဝ်း ၼႂ်းဝၢၼ်ႈၼႂ်းၶူင်ႇ ၵူၼ်းမိူင်းတူၵ်းၸႂ် ။

မိူဝ်ႈၼုမ်ႇၸၢႆးၵေႃႉၼႆႉ တေဢၢၼ်းလၵ်ႉၶူဝ်းၶွင် ၼၼ်ႉ ၵူၼ်းႁိမ်းႁွမ်းသမ်ႉတၼ်းႁၼ်လႄႈ ၸုမ်းပျီႇတူႉၸိတ်ႉဢၼ်ဢဝ်လွင်ႈႁူမ်ႇလူမ်ႈႁိမ်းၼၼ်ႉ ၸင်ႇလမ်းယိုဝ်း ၼႆ ၵူၼ်းပိုၼ်ႉတီႈလၢတ်ႈ။

ၵူၼ်းမူႇၸေႊၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပႆႇလႆႈႁူႉၶႃႈ ပဵၼ်ၵူၼ်းတီႈလႂ် မိူဝ်ႈလဵဝ်တႄႉ ပိူၼ်ႈဢဝ်ၵႂႃႇၵူတ်ႇထတ်းတူၺ်းဝႆႉတီႈႁူင်းယႃ ။ၵူၼ်းၶိူဝ်းသင် လုၵ်ႉမိူင်းလႂ်မႃးၼႆတႄႉၵေႃႈ ပႆႇႁူႉၸွမ်းၶႃႈ ။ မိူဝ်ႈဝူင်ႈပူၼ်ႉမႃးၵေႃႈ ၵူၼ်းႁဵတ်းၵၢၼ်ၵျႃႊၽျႅၼ်ႉၵေႃႉၼိုင်ႈ ၺႃးယိုဝ်းတၢႆၸိူင်ႉၼႆၼင်ႇၵဝ်ႇ ။ လွင်ႈယိုဝ်းၵၼ်ႁဵတ်းၼႆၵေႃႈ မီးမႃးၶိူဝ်းယႂ်းယဝ်ႉ ” – ဝႃႈၼႆ။    

ၽူႈလၵ်ႉၵေႃႉၼၼ်ႉ မၼ်းၸၢႆးပႃးတင်းထူင်ၼိုင်ႈလုၵ်ႈသေ ၵႂႃႇလၵ်ႉတၢင်းမၢၼ်ႈဝဵင်း။ ၽိူဝ်ႇပျီႇတူႉၸိတ်ႉႁၼ်ယဝ်ႉလမ်းၸွမ်းမၼ်း မၼ်းၸၢႆးလႅၼ်ႈပၢႆႈမႃးတၢင်းဝၢၼ်ႈပၢင်ႇလူင်မႂ်ႇသေ ၺႃးယိုဝ်းတၢႆတီႈဝၢၼ်ႈပၢင်ႇလူင်မႂ်ႇ။ ထူင်မၼ်းၸၢႆးၵေႃႈ တၼ်းဢဝ်ထိုမ်ႈပႅတ်ႈပွတ်းတၢင်း- ၼႆ ၵူၼ်းမူႇၸေႊ လၢတ်ႈၼင်ႇၼႆ။

ၼႂ်းဝဵင်းမူႇၸေႊၼႆႉ  မီးႁၢၼ်ႉဢၼ်ပိုတ်ႇဝႆႉပၢင်တေႃႇလွင်းၼမ် ၵူၼ်းတေႃႇၵူၼ်းလွင်းၵေႃႈၼမ် ၼႂ်းၼၼ်ႉ ၵူၼ်းၸိူဝ်းပႂ်ႉႁႃလၵ်ႉႁႃၸူၼ်ၵေႃႈ မီးတႃႇသေႇၼႆ ၵူၼ်းပိုၼ်ႉတီႈလၢတ်ႈ။

ၸဵမ်မိူဝ်ႈဝၢၼ်ႈမိူင်းတႄႇသုၵ်ႉယုင်ႈမႃးၼႆႉသေ ၵၢၼ်တေႃႇၵၢၼ်လွင်းၵေႃႈ လိူင်ႇၽႄႈမႃး ၊ ၸိူဝ်းပိုတ်ႇႁၢၼ်ႉလဵၼ်ႈၵဵမ်းၵေႃႈၼမ်။ လုၵ်ႈဢွၼ်ႇၵူၼ်းလူင်ၸိူဝ်းၵႂႃႇၸပ်းယိၼ်ႉၵဵမ်း ယိၼ်ႉယႃႈ ၵေႃႈၼမ်မႃးၵူႈဝၼ်း။

ႁၢၼ်ႉၵဵမ်း ႁၢၼ်ႉတေႃႇလွင်း ၸိူဝ်းၼႆႉ တေဝႃႈဢမ်ႇလီၼႆၵေႃႈ ၸုမ်းဢၼ်လွင်ႈႁူမ်ႇလူမ်ႈၶဝ်သမ်ႉ ပၼ်ၶႂၢင်ႉပိုတ်ႇဝႆႉတင်းၼမ်။ယႃႈမဝ်းၵမ်ၵေႃႈလိူင်ႇ ။ ၸိူဝ်းၶဝ်ဢဝ်ႁူမ်ႇလူမ်ႈပၼ်ၵူၼ်းမိူင်းႁႃႉ ဢဝ်ႁူမ်ႇလူမ်ႈပၼ်ၵၢၼ်တေႃႇလွင်းႁိုဝ်ၼႆ ၵူၼ်းပိုၼ်ႉတီႈသမ်ႉပေႃးဢမ်ႇပွင်ႇၸႂ်လႆႈ ဝႃႈၼႆ။

ၵူၼ်းမူႇၸေႊၵေႃႉၼိုင်ႈလၢတ်ႈဝႃႈ – “ ၸုမ်းယိပ်းၵွင်ႈၵၢင်ႇတီႈမူႇၸေႊၼႆႉ မီးပဵၼ်သိပ်းပဵၼ်သၢဝ်း ၸုမ်းဢၼ်ဢဝ်လွင်ႈႁူမ်ႇလူမ်ႈပၼ်ၵူၼ်းဝၢၼ်ႈၵူၼ်းမိူင်းၼႆႉ ဢမ်ႇႁူႉဝႃႈ ပဵၼ်ၸုမ်းလႂ်တႄႉတႄႉ ၶႂ်ႈယိုဝ်းၽႂ်ၵေႃႈယိုဝ်းႁဵတ်းၼၼ် ၊ ပေႃးၶဝ်ၺွပ်းလႆႈဝႃႈ ပဵၼ်ၵူၼ်းမီးတၢင်းၽိတ်းၼႆၵေႃႈ ႁႅမ်တၢႆပႅတ်ႈ ” – ဝႃႈၼႆ။

လွင်ႈၼႆႉ ၼၢင်းယိင်းဢႃယု 40 ပၢႆ ယူႇမူႇၸေႊ လၢတ်ႈဝႃႈ – လၢႆးႁဵတ်းၸုမ်းယိပ်းၵွင်ႈၵၢင်ႇ တီႈဝဵင်းမူႇၸေႊၼႆႉ မိူၼ်ဝၢၼ်ႈမိူင်းဢမ်ႇမီးပၵ်းမီးပိူင် ဝၢၼ်ႈမိူင်းဢမ်ႇမီးၶုၼ်လီလီယဝ်ႉ – ဝႃႈၼႆ။

ဢိင်ၼိူဝ် ၵၢၼ်မိူင်း ပႆႇၼိမ်သဝ်းၼႆႉသေ ဝၢၼ်ႈ ၊ ဝဵင်း ၸိူဝ်းမီးပၼ်ႁႃပၢင်တိုၵ်းသိုၵ်းသိူဝ်ၸိူဝ်းၼႆႉ ၵၢၼ်ပၢႆးမၢၵ်ႇမီးၵေႃႈတူၵ်း ၊ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ ၊ လွင်ႈဢၼ်ဢမ်ႇလီ မိူၼ်ၼင်ႇ ပၢင်တေႃႇလွင်း ယႃႈမဝ်းၵမ်ၸိူဝ်းၼႆႉသမ်ႉ ၼမ်ၶိုၼ်ႈမႃးၵူႈဝၼ်း လႆႈႁူႉၼင်ႇၼႆ။