မိူင်းၶႄႇပိုၼ်ၽၢဝ်ႇဝႃႈ ၼႂ်းလိူၼ်သႅပ်ႊထိမ်ႊပိူဝ်ႊ ပီၼႆႉ တေၸတ်းႁဵတ်း ပၢင်ပွႆးၼႄ ၾၢင်ႁၢင်ႈသိုၵ်း ပိူဝ်ႈတႃႇပဵၼ်လွင်ႈမၢႆတွင်း ပၢင်တိုၵ်းသိုၵ်းလုမ်ႈၾႃႉယဝ်ႉတူဝ်ႈၵႂႃႇၶွပ်ႈတဵမ်  80 ပီ ဝႃႈၼႆ။

ပၢင်ၼႄၾၢင်ႁၢင်ႈသိုၵ်းၼႆႉ တေၸတ်းႁဵတ်းၼႂ်းဝၼ်းတီႈ 3 လိူၼ်သႅမ်ႊထိမ်ႊပိူဝ်ႊ တီႈဝဵင်းလူင်ပေႊၵျိၼ်ႊ၊ ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင်ႊၵေႃႈတေၶဝ်ႈႁူမ်ႈၸွမ်းၼႆ – ၽူႈမီးၸၼ်ႉသုင် ၼႂ်းတပ်ႉသိုၵ်းမိူင်းၶႄႇ လၢတ်ႈၵႂႃႇ တီႈၼႂ်းပၢင်သပ်းၸႅင်ႈၶၢဝ်ႇၼင်ႇၼႆ။

တီႈၼႂ်းပၢင်ၼႄၾၢင်ႁၢင်ႈသိုၵ်းၼၼ်ႉ တေၼႄပႃးဢဵၼ်ႁႅင်းၾၢႆႇတပ်ႉလိၼ်၊ ၶိူင်ႈမိၼ်တိုၵ်း တပ်ႉလူမ်း၊ ၶိူင်ႈမိၼ်ႁၢမ်း ၵူၼ်းၶပ်း၊ ၵႃးၵၢပ်ႇလဵၵ်း လႄႈ ၶိူင်ႈၵွင်ႈၵၢင်ႇတိုၵ်းတေႃး ၸိူဝ်းၸႂ်ႉလွၵ်းလၢႆးပၢႆးပၺ်ႇၺႃႇ ၸၼ်ႉသုင် ၸိူဝ်းၼႆႉဝႃႈၼႆ။

တီႈၼႂ်းပၢင်ၵႅဝ်ႈၼၼ်ႉ ၸွမ်ၸိုင်ႈမိူင်းရတ်ႉသျႃႊ လႄႈ ၽူႈဢွၼ်ႁူဝ်လၢႆလၢႆၸိုင်ႈမိူင်းၵေႃႈ တေၶဝ်ႈႁူမ်ႈပႃး ၼႆယဝ်ႉ။

ဝၢႆးၸွမ်ၸိုင်ႈ မိူင်းဢမေႊရိၵၼ်ႊ တေႃႊၼႄႊထရမ်ႉ ၸတ်းႁဵတ်းပၢင်ၼႄၾၢင်ႁၢင်ႈသိုၵ်း ၶိုၵ်ႉယႂ်ႇလူင် ၼႂ်းဝၼ်းၵိူတ်ႇၶွပ်ႈၶူပ်ႇ 79 ပီ ပူၼ်ႉမႃးပႆႇႁိုင်ၼႆႉယဝ်ႉ မိူင်းၶႄႇၵေႃႈ ၸင်ႇပိုၼ်ၽၢဝ်ႇဢွၵ်ႇမႃးဝႃႈ တေ ၸတ်းႁဵတ်း ပၢင်ပွႆးၼႄၾၢင်ႁၢင်ႈသိုၵ်း ။

မိူင်းၶႄႇၼႆႉ မိူဝ်ႈပီ 2015 ပူၼ်ႉမႃးၼၼ်ႉၵေႃႈ ယၢမ်ႈၸတ်းႁဵတ်း ပၢင်ပွႆးၼႄၾၢင်ႁၢင်ႈသိုၵ်း ၶိုၵ်ႉယႂ်ႇလူင် မႃးယဝ်ႉပွၵ်ႈၼိုင်ႈ ။ မိူဝ်ႈၽွင်းၼၼ်ႉ လႆႈၼႄၵႂႃႇဢဵၼ်ႁႅင်းတပ်ႉသိုၵ်းၼပ်ႉႁဵင်၊ ၵႃးတႅင်ႉ၊ မၢၵ်ႇၼူၾႆး လႄႈ ၶိူင်ႈမိၼ်သိုၵ်းဢမ်ႇယွမ်း 200 လမ်း ၼႆယဝ်ႉ ။