ၾၢႆႇလိူမ်ႈလႆႇ ၸီႉသင်ႇၸႂ်ႉလႅၵ်ႈပၢႆႉ (ဆိုင်းဘုတ်) ၶိုၼ်း ဢၼ်တႅမ်ႈဝႆႉၽႃသႃဢင်းၵဵတ်းၼၼ်ႉ ႁႂ်ႈပိၼ်ႇၶိုၼ်းၽႃသႃမၢၼ်ႈမူတ်းမူတ်း ဝႃႈၼႆ။

ယၢမ်းလဵဝ် ၸွမ်းၼင်ႇ ပၢႆႉႁၢၼ်ႉၶၢႆၵုၼ်ႇ၊ ပၢႆႉၵၢတ်ႇလႄႈ ပၢႆႉႁူင်းၵၢၼ် ၸိူဝ်းၼႆႉ ဢၼ်တႅမ်ႈဝႆႉ ၽႃသႃလိၵ်ႈ ဢင်းၵိတ်းၸိူဝ်းၼၼ်ႉ ႁႂ်ႈၶိုၼ်းႁဵတ်းပၢႆႉမႂ်ႇ သႂ်ႇၶိုၼ်းၽႃသႃမၢၼ်ႈမူတ်းမူတ် ၼႂ်းၸႄႈဝဵင်းတူၼ်ႈတီး ၸိုင်ႈပွတ်းၸၢၼ်း။  

ၵူၼ်းပိုၼ်ႉတီႈ ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်မႃးၸီႉသင်ႇလၢတ်ႈၼႆႉ ပဵၼ်ၾၢႆႇလိူမ်ႈ လႆႇတင်း ၽူႈၵွၼ်းပွၵ်ႉၶဝ်။ ၶဝ်ႁႂ်ႈႁဝ်းႁဵတ်းပၢႆႉမႂ်ႇ ႁႂ်ႈပိၼ်ႇပဵၼ်ၽႃသႃမၢၼ်ႈ။ ၵွပ်ႈသင်လႄႈ ၶဝ်ၸႂ်ႉလႅၵ်ႈ တႄႉ ဢမ်ႇႁူႉ။ ယၢမ်းလဵဝ် ပိူၼ်ႈဢွၼ်ၵၼ်လႅၵ်ႈၼမ်ယဝ်ႉ။ ၸိုဝ်ႈပၢႆႉ မၢင်ႁၢၼ်ႉၼႆႉ ပေႃးပဵၼ်ၽႃသႃဢင်းၵိတ်း ပိၼ်ႇၽႃသႃမၢၼ်ႈၸိုင် တီႈပွင်ႇမၼ်းတေပိူင်ႈသေ ပဵၼ်ဢၼ်လီၶႂ်ႈၶူဝ်ဝႆႉ။ ဢၼ်ၶဝ်ၸႂ်ႉပိၼ်ႇၼႆႉ ၵွပ်ႈၶဝ်ဢမ်ႇမေႃလူလိၵ်ႈဢင်းၵိတ်းၶႃႈယူဝ်ႉ”- ဝႃႈၼႆ။

ဢိင်ၼိူဝ် ဢၼ်ၶဝ်ၸႂ်ႉပိၼ်ႇၽႃသႃၼႆႉသေ ႁဵတ်းႁႂ်ႈၸဝ်ႈၶွင်ႁၢၼ်ႉၶၢႆၵုၼ်ႇ မၢင်ၸိူဝ်း ပဵၼ်ဢၼ်ယၢပ်ႇၽိုတ်ႇဝႆႉ ယွၼ်ႉဝႃႈ ၽႃသႃဢင်းၵိတ်းၼၼ်ႉ တေလႆႈမႃးပိၼ်ႇဢဝ်တီႈပွင်ႇၽႃသႃမၢၼ်ႈ ၸိူင်ႉၼၼ်သေ ၸင်ႇတေလႆႈပူၵ်းပၢႆႉၶိုၼ်း ၼႆယဝ်ႉ။

ၵဵဝ်ႇလူၺ်ႈ ၾၢႆႇလိူမ်ႈလႆႇၶဝ် ၸီႉသင်ႇ ၸႂ်ႉလႅၵ်ႈလၢႆႈၶိုၼ်းပၢႆႉ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆၼႆႉ ၶဝ်ဝႆႉၶၢဝ်း ယၢမ်းႁိုင် 15 ဝၼ်းသေ သင်ဝႃႈ ၽူႈလႂ်ၽႂ်ဢမ်ႇလႅၵ်ႈလၢႆႈၼႆၸိုင် တေဢဝ်တၢင်းၽိတ်းၵႂႃႇ ဝႃႈၼႆ။

“ၶဝ်ႁႂ်ႈလႅၵ်ႈပၢႆႉၼႆႉ ၶဝ်ပၼ်ၶၢဝ်းယၢမ်း 15 ဝၼ်းၵူၺ်း။ မိူၼ်ၼင်ႇ ၵၢတ်ႇဢူဝ်ႊသျိၼ်ႊ (Ocean) ၼၼ်ႉ တေပိၼ်ႇၸိူင်ႉႁိုဝ်ၼၼ်ႉ တေပိၼ်ႇ တမူၵ်ႉတယႃႇ (သမုဒ္ဒရာ) ၸိူင်ႉၼၼ်ႁိုဝ်။ ဢၼ်ၶဝ်ၸႂ်ႉပိၼ်ႇၸိူင်ႉ ၼႆၼႆႉ မိူၼ်ႁိုဝ် ၵေႃႈဢမ်ႇႁူႉ။ ပၢႆႉမၢင်ႁၢၼ်ႉ ပေႃးတေပိၼ်ႇတင်းၾၢႆႇမၢၼ်ႈၼႆ တီႈပွင်ႇမၼ်းတေပိူင်ႈ မူတ်းယဝ်ႉ။ သင်ဝႃႈ ဢမ်ႇပိၼ်ႇၽႃသႃမၢၼ်ႈၸိုင် ၽူႈယႂ်ႇၵူၼ်းလူင်ၶဝ် တေမႃးဢဝ်လိူင်ႈၼႆၶႃႈဝႃႇ”- ၵူၼ်းပိုၼ်ႉတီႈ ဝဵင်းတူၼ်ႈတီး သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းတူၼ်ႈတီးၼႆႉ ၾူၼ်တူၵ်းထပ်းၵၼ်ႁၢဝ်ႈႁႅင်းသေ မၢင်ပွၵ်ႉမၢင်ယွမ်ႇ ထိုင်တီႈၼမ်ႉ လုပ်ႇၼွင်းထူမ်ႈ ၸိူဝ်းၼႆႉၵေႃႈမီး။

တႅမ်ႈ – ၼၢင်းၶမ်းၵူႇ ပိၼ်ႇ – ၸၢႆးယွတ်ႈၶမ်း