ၼႂ်းဝူင်ႈၼႆႉ မီးၶၢဝ်ႇၼႂ်းတူင်ႇဝူင်းသိုၵ်းမၢၼ်ႈ လိုဝ်းဢွၵ်ႇမႃးဝႃႈ ၽူႈၵွၼ်းတပ်ႉၸုမ်းလူင် (တပ်ႉမ) – 99 ၵႅမ်ၸွမ်ႁၢၼ် တိၼ်ႇမွင်ႇၵျေႃႇ ၺႃးသိုၵ်းမၢၼ်ႈ တီႉၺွပ်းၶိုၼ်းသေ ပူတ်းၸၼ်ႉပႅတ်ႈ ဝႃႈၼႆ။

မၼ်းၸၢႆး ၺႃးတီႉၺွပ်း ၼႂ်းႁၢင်လိူၼ်မေႊပူၼ်ႉမႃးၼႆႉ ၵွၼ်ႈၼႃႈ ပႆႇၺႃးတီႉၺွပ်းၼၼ်ႉ မီးၶၢဝ်ႇလိုဝ်းဢွၵ်ႇဝႆႉဝႃႈ တေလုၵ်ႉၽိုၼ်ႉတပ်ႉသိုၵ်းမၢၼ်ႈၶိုၼ်းသေ တေယွၼ်းႁူမ်ႈၸွမ်း  ၸုမ်းသိုၵ်းရၶႅင်ႇ AA။ ဝၢႆးၼၼ်ႉဢမ်ႇႁိုင် ၺႃးတီႉၺွပ်းပူတ်းၸၼ်ႉပႅတ်ႈသေ တိုၵ်ႉၵူတ်ႇထတ်းဝႆႉ ဝႃႈၼႆ။

လွင်ႈတေႁူမ်ႈၸွမ်း သိုၵ်းရၶႅင်ႇၼၼ်ႉတႄႉ ပႆႇမီးၽႂ်ယိုၼ်ယၼ်။ တပ်ႉၸုမ်းလူင် (တပ်ႉမ) – 99 ၼႆႉ ပၵ်း တပ်ႉဝႆႉတီႈ ဝဵင်းမဵတ်ႉထီႇလႃႇ တိူင်းဝဵင်းလိူဝ်ႇ (မၼ်းတလေး)။

ၵႅမ်ၸွမ်ႁၢၼ် တိၼ်ႇမွင်ႇၵျေႃႇၼႆႉ တိုၵ်ႉႁပ်ႉပဵၼ်ၽူႈၵွၼ်းတပ်ႉၸုမ်းလူင် 99 ၼႂ်းႁူဝ်ပီ 2025 ၼႆႉၵူၺ်း။ ဝၢႆးႁပ်ႉပဵၼ် ၽူႈၵွၼ်းတပ်ႉၸုမ်းလူင်ယဝ်ႉ လႆႈဢဝ်ပုၼ်ႈၽွၼ်း ၽႅၼ်ယၼ်ႇသိုၵ်း တီႈလႅၼ်လိၼ် မၵူၺ်းတင်း တိူင်းပႃႇၵိူဝ် ဢွင်ႈတီႈပဵၼ်ပၢင်တိုၵ်းၵၼ်တင်း သိုၵ်းရၶႅင်ႇ ႁၢဝ်ႈႁႅင်း။ ၽွင်းပၢင်တိုၵ်းၼၼ်ႉ လုၵ်ႈၸုမ်းတပ်ႉၸုမ်းလူင် 99 လူႉတၢႆမၢတ်ႇၸဵပ်းတင်းၼမ်။

တႄႇမိူဝ်ႈၽႅၼ်ယၼ်ႇသိုၵ်း 1027 မႃး တေႃႇထိုင်ယၢမ်းလဵဝ် ၼႂ်းၶၢဝ်းတၢင်းပီပၢႆၼႆႉ သိုၵ်းမၢၼ်ႈပူတ်းလၢႆႈ ၽူႈၵွၼ်းတပ်ႉၸုမ်းလူင် 99 ၼႆႉ မီးၵႂႃႇ 5 ၵေႃႉယဝ်ႉ။ ၼႂ်းၼၼ်ႉ ၵႅမ်ၸွမ် ႁၢၼ် ဢွင်ႇၵျေႃႇလုၼ်ႇ လူႉတၢႆ ၼႂ်းပၢင်တိုၵ်း၊ ၸဝ်ႈသိုၵ်းလူင် မူဝ်းမျိၼ်ႉထုၼ်းလႄႈ ၵႅမ်ၸွမ်ႁၢၼ် တိၼ်ႇမွင်ႇၵျေႃႇ ၺႃးတပ်ႉသိုၵ်း တီႉၺွပ်ႉဝႆႉၶိုၼ်း၊ ၸွမ်ႁၢၼ် ၸူဝ်းလၢႆႇ ယၢမ်းလဵဝ်ပဵၼ်ၽူႈၵွၼ်းတိူင်း ငဝ်ႈငုၼ်းတိူင်းသိုၵ်းသၢမ်ၸဵင်ႇလႄႈ ၸဝ်ႈသိုၵ်းလူင် ၸူဝ်းဝိၼ်းထုၼ်း တိုၵ်ႉႁၢပ်ႇၵၢၼ်ဝႆႉ ယၢမ်းလဵဝ် – သိုဝ်ႇၶၢဝ်ႇ People’s Spring ဢွၵ်ႇဝႆႉၼင်ႇၼႆ။